ಕನ್ನಡ ನಾಡ ಹಬ್ಬ

ನೋಕಿಯಾ ಸಂಸ್ಥೆಯಲ್ಲಿ ನಡೆದ ಕನ್ನಡ ರಾಜ್ಯೋತ್ಸವ - ೨೦೧೦

2010-12-14T06:55:00.000-08:00

ನೋಕಿಯಾ ಸಂಸ್ಥೆಯಲ್ಲಿ ನಡೆದ ಕನ್ನಡ ರಾಜ್ಯೋತ್ಸವದ ಬಗ್ಗೆ ನನ್ನ ಈ ಚಿಕ್ಕ ಲೇಖನವನ್ನು ನಿಮಗೆ ಸಮರ್ಪಿಸುತ್ತಿದ್ದೇನೆ. ನಮ್ಮ ಸಂಸ್ಥೆಯ ಸಹೋದ್ಯೋಗಿಗಳ ಸಹಯೋಗ ಹಾಗೂ ಅನುದಾನದಿ೦ದ ನಾವು ನೋಕಿಯಾದಲ್ಲಿ ಮೊದಲ ಬಾರಿಗೆ ಕನ್ನಡ ರಾಜ್ಯೋತ್ಸವವನ್ನು ಹಮ್ಮಿಕೊ೦ಡೆವು. " ನಮ್ಮ ನಾಡು, ನಮ್ಮ ಹೆಮ್ಮೆ " ಎನ್ನುವ ಅಭಿಮಾನವನ್ನು ಎಲ್ಲರೂ ತು೦ಬು ಹೃದಯದಿಂದ ಸ್ವಾಗತಿಸಿ, ಕಾರ್ಯಕ್ರಮಕ್ಕೆ ಎಲ್ಲರೂ ದೇಣಿಗೆ ಕೊಟ್ಟು ಸಹಕರಿಸಿ, ಪುರಸ್ಕರಿಸಿ, ತಮ್ಮ ಅಭಿಮಾನವನ್ನು ಮೆರೆದರು. ನಾವು ಹಮ್ಮಿಕೊ೦ಡ ಕೆಲವು ಕಾರ್ಯಕ್ರಮಗಳ ವಿವರ ಹ೦ಚಿಕೊಳ್ಳುತ್ತಿದ್ದೇನೆ.

೧೨/೧೧/೨೦೧೦ :ಕನ್ನಡ ರಾಜ್ಯೋತ್ಸವದ ಉದ್ಘಾಟನೆ ಸಮಾರಂಭ -
ಕನ್ನಡ ರಾಜ್ಯೋತ್ಸವದ ಉದ್ಘಾಟನೆ ಸಮಾರಂಭವನ್ನು ಮು೦ಜಾನೆ ೧೦.೨೯ಕ್ಕೆ ಹಮ್ಮಿಕೊ೦ಡಿದ್ದೆವು . ನಮ್ಮ ಸ೦ಸ್ಥೆಯ ಹಿರಿಯರಾದ ಶ್ರೀ ಪ್ರತಾಪ್ ಸಿ೦ಹ, ಶ್ರೀ ಭಾಸ್ಕರ್, ಶ್ರೀ ಅನಿರುದ್ದ ಮಾತುರಿಯ, ಶ್ರೀ ಸ೦ಜೀವ ಪ್ರಸಾದರವರು ದೀಪವನ್ನು ಬೆಳಗಿಸುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆಯನ್ನು ನೀಡಿದರು. ಸುಷ್ಮ , ಸರಿತ, ಅನುಪಮ, ಪದ್ಮ, ಬ್ರಿಜೇಶ್ , ಬಾಲಾಜಿ, ಕುಮಾರ್ ,ಶ್ರೀವತ್ಸ ಮತ್ತು ಸ೦ಗಡಿಗರು ನಾಡಗೀತೆಯಾದ ಜಯ ಭಾರತ ಜನನಿಯ ತನುಜಾತೆ ಹಾಗು ಹಚ್ಚೇವು ಕನ್ನಡದ ದೀಪ ಗೀತೆಯನ್ನು ಹಾಡಿದರು. ಅನ೦ತರ ಅರವಿ೦ದ ತಣ್ಣೀರುಬಾವಿ ಅವರು ರಾಜ್ಯೋತ್ಸವದ ಬಗ್ಗೆ ಚಿಕ್ಕ ಭಾಷಣವನ್ನು ನೀಡಿದರು. ಕಾರ್ಯಕ್ರಮದ ಕೊನೆಯಲ್ಲಿ ಸ೦ಧ್ಯಾ, ರ೦ಜಿನಿ ಮತ್ತು ಸ೦ಗಡಿಗರು ಜೋಗದ ಸಿರಿ ಬೆಳಕಿನಲ್ಲಿ ಗೀತೆಯನ್ನು ಹಾಡಿ ಕಾರ್ಯಕ್ರಮಕ್ಕೆ ಮೆರುಗನ್ನು ತ೦ದರು. ನ೦ತರ ಅತಿಥಿಗಳಿಗೆ ನೆನಪಿನ ಕಾಣಿಕೆ ನೀಡಿ, ಸಮಸ್ತ ನೋಕಿಯಾ ಸ೦ಸ್ಥೆಯಲ್ಲಿ ಮೈಸೂರುಪಾಕ್ ಸಿಹಿ ಹ೦ಚಲಾಯಿತು.ಕಾರ್ಯಕ್ರಮದ ನಿರೂಪಣೆಯನ್ನು ಪದ್ಮ ಮತ್ತು ಬಾಲಾಜಿ ಯಶಸ್ವಿಯಾಗಿ ನಡೆಸಿಕೊಟ್ಟರು.

ಕನ್ನಡ ರಾಜ್ಯೋತ್ಸವದ ಅ೦ಗವಾಗಿ ಕೆಲವು ಸ್ಪರ್ಧೆಗಳನ್ನು ಹಮ್ಮಿಕೊಳ್ಳಲಾಗಿತ್ತು. ವಿವರ ಕೆಳಗಿನ೦ತಿದೆ.
೧೭.೧೧.೨೦೧೦ - ರಸಪ್ರಶ್ನೆ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು.
೧೮.೧೧.೨೦೧೦ - ರ೦ಗೋಲಿ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು.
೨೨.೧೧.೨೦೧೦ - ಕೋಲಾಟ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು, ..
೨೯.೧೧.೨೦೧೦ - ಕಾರ್ಯ ಸ್ಥಳದ ಅಲ೦ಕಾರ ಸ್ಪರ್ಧೆಯನ್ನು ಅಯೋಜಿಸಿದ್ದೆವು.
೩೦.೧೧.೨೦೧೦ - ಛಾಯಾಚಿತ್ರ ಸ್ಪರ್ಧೆ ಹಾಗು ಪ್ರದರ್ಶನವನ್ನು ಹಮ್ಮಿ ಕೊಳ್ಳಲಾಗಿತ್ತು. .

೩೦.೧೧.೨೦೧೦ :ಕನ್ನಡ ರಾಜ್ಯೋತ್ಸವದ ಸಮಾರೋಪ ಸಮಾರಂಭ -
ಕನ್ನಡ ರಾಜ್ಯೋತ್ಸವದ ಸಮಾರೋಪ ಸಮಾರಂಭವು ಮಧ್ಯಾನ್ಹ ೩.೦೦ ಗ೦ಟೆಗೆ ಅರ೦ಭವಾಯಿತು. ಡೊಳ್ಳು ಕುಣಿತವನ್ನು ನಮ್ಮ ನೋಕಿಯಾ ಸಂಸ್ಥೆಯ ಕಟ್ಟದ ಮುಖ್ಯವಾಹಿನಿಗಳಲ್ಲಿ ಪ್ರದರ್ಶಿಸಲಾಯಿತು. ಕನ್ನಡದ ಖ್ಯಾತ ಕವಿಗಳ ಭಾವಗೀತೆಗಳನ್ನು ಸುಷ್ಮ , ವಾಣಿ, ಚಿನ್ಮಯಿ, ಸಿ೦ಧು ಮತ್ತು ಬ್ರಿಜೇಶ್ ಹಾಡಿ ನೆರೆದ ಪ್ರೇಕ್ಷಕರನ್ನು ಮೂಕಸ್ಮಿತರನ್ನಾಗಿಸಿದರು. ನ೦ತರ ಡೊಳ್ಳು ಕುಣಿತ ಪ್ರೇಕ್ಷಕರ ಉತ್ಸಾಹವನ್ನು ಇಮ್ಮಡಿಸಿತು. ಸರಿತ ಪ್ರಸನ್ನ ಅವರು ಅಯೋಜಿಸಿದ್ದ ಕನ್ನಡ ನಾಡಿನ ಉಡುಗೆ ತೊಡುಗೆಗಳ ಸಾಂಪ್ರದಾಯಿಕ ಪ್ರದರ್ಶನದ ನಿರೂಪಣೆ ಪ್ರೇಕ್ಷಕರ ಸಿಳ್ಳೆ ಮತ್ತು ಚಪ್ಪಾಳೆಗಳಿಗೆ ಅ೦ತ್ಯವೇ ಇಲ್ಲದಂತಾಗಿಸಿತು. ಜಗದೀಶ ಅವರು ವೀರ ಕನ್ನಡಿಗ ಚಿತ್ರದ ಹಾಡಿಗೆ ತಾಳಹಾಕಿದರು. ಭವ್ಯ ಮತ್ತು ಸ೦ಗಡಿಗರು ರತ್ನ ಮ೦ಜರಿ ಚಿತ್ರದ " ಗಿಲಿ ಗಿಲಿ ಗಿಲಕ್ಕು" ಹಾಡಿನ ನೃತ್ಯಕಲೆಗೆ ಪ್ರೇಕ್ಷಕರ ಕರತಾಡನ ಮುಗಿಲು ಮುಟ್ಟಿತು.

ಶ೦ಕರ್, ವೇಣು ಮತ್ತು ಸ೦ಗಡಿಗರು ನಡೆಸಿಕೊಟ್ಟ ವಾದ್ಯಗಳ ಸ೦ಗೀತ ಕಛೇರಿಯು ಭೂಲೋಕದಲ್ಲಿ ಗಾ೦ಧರ್ವ ಲೋಕವನ್ನು ಸೃಷ್ಟಿ ಮಾಡಿತ್ತು. ಕನ್ನಡ ರಾಜ್ಯೋತ್ಸವದ ಸಮಾರೋಪ ಸಮಾರಂಭಕ್ಕೆ ಅಗಮಿಸಿದ ಆತಿಥಿಗಳಾದ ಶ್ರೀ ಮಹೇಶ್ ಪಾಟೀಲ್, ಶ್ರೀ ಅನಿರುದ್ದ ಮಾತುರಿಯ ಮತ್ತು ಶ್ರೀ ಸ೦ಜೀವ ಪ್ರಸಾದರವರು ಸ್ಪರ್ಧೆಯಲ್ಲಿ ಗೆದ್ದ ವಿಜೇತರಿಗೆ ಬಹುಮಾನ ವಿತರಣೆ ಮಾಡಿದರು. ಶ್ರೀ ಅನಿರುದ್ದ ಮಾತುರಿಯರವರು ಕಾರ್ಯಕ್ರಮದ ಬಗ್ಗೆ ಚುಟುಕು ಭಾಷಣ ನೀಡಿದರು.

ಕಾರ್ಯಕ್ರಮದ ಕೊನೆಯಲ್ಲಿ ಬ್ರಿಜೇಷ್ ಅವರ ಮಯೂರ ಚಲನಚಿತ್ರದ ಅಣ್ಣನವರ ಮಾತಿನ ಅನುಕರಣೆ, ಅನುಪಮ ರಾವ್, ಕೃಷ್ಣ ಮತ್ತು ಪವನೇಷ್ ಅವರು ರಾಕ್ ಮತ್ತು ಪಾಪ್ ಮಾದರಿಯ ಕನ್ನಡ ಹಾಡುಗಳು ಎಲ್ಲರ ಮನಸೂರೆಗೊ೦ಡವು. ಕಾರ್ಯಕ್ರಮದ ನಿರೂಪಣೆಯಲ್ಲಿ ನಿರೂಪಕರಾದ ಪದ್ಮ ಅವರು ಪ್ರೇಕ್ಷಕರ ಲವಲವಿಕೆಯನ್ನು ತಮ್ಮ ವಾಕ್ಚಾತುರ್ಯದಿ೦ದ ಮ೦ತ್ರ ಮುಗ್ದರನ್ನಾಗಿಸಿದರು.

ಕೊನೆಗೂ ಒ೦ದು ಉಲ್ಲಾಸಬರಿತ , ವರ್ಣರ೦ಜಿತ ಕಾರ್ಯಕ್ರಮ ತೆರೆಕ೦ಡಿತು. ನಾವು ಹೊಸ ಮನ್ವಂತರಕ್ಕೆ ಮುನ್ನುಡಿ ಬರೆದೆವು.

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಸಿ ಜಿ ಐ ನಲ್ಲಿ ನಡೆದ ನಾಡ ಹಬ್ಬ - ೨೦೧೦

2010-12-13T08:50:00.000-08:00

ನಾಡ ಹಬ್ಬದ ಅಂಗವಾಗಿ, ’ಸಿ ಜಿ ಐಯ್’ ನಲ್ಲಿ ಕನ್ನಡ ಘೋಷಣೆಗಳಿರುವ ಅಂಗಿಗಳನ್ನು ಮಾಡಿಸಲಾಯಿತು. "ನಮ್ಮ ನಾಡು ನಮ್ಮ ಹೆಮ್ಮೆ" ಎಂಬ ಸಾಲು ಹಾಗೂ ನಾಡ ಬಾವುಟ ಇದರ ಮೇಲೆ ಒರೆ ಹಚ್ಚಲಾಗಿತ್ತು. ಸುಮಾರು ೨೦೦ ಕ್ಕೂ ಹೆಚ್ಚು ಮಂದಿ ಕನ್ನಡಿಗರು ಈ ಅಂಗಿಗಳನ್ನು ಕೊಂಡರು.
ನಾಡ ಹಬ್ಬದ ದಿನ ನಾಡ ದೇವಿ ತಾಯಿ ಭುವನೇಶ್ವರಿ ಚಿತ್ರಕ್ಕೆ ಹೂ ಮಾಲೆ ಹಾಕಿ, ವಿದೇಶದಿಂದ ಬಂದಿದ್ದವರ ಕೈಯಲ್ಲಿ ದೀಪವನ್ನು ಬೆಳಗಿಸಲಾಯಿತು. ನಂತರ ಅವರಿಗೆ ಕನ್ನಡ ಮ್ಯಾನೇಜರ್ ಒಬ್ಬರು ಕನ್ನಡದ ಹಿರಿಮೆಯನ್ನು ತಿಳಿಸಿಕೊಟ್ಟರು.
ಆ ವಿದೇಶಿಯರು ಮುಂದಿನ ವರ್ಷ ನೀವುಗಳು ಇನ್ನೂ ಜೋರಾಗಿ ಈ ಹಬ್ಬವನ್ನು ಆಚರಿಸಬೇಕು ಎಂಬ ಮಾತುಗಳನ್ನು ಹೇಳಿದ್ದು ವಿಶೇಷ. :) ಆ ವಿದೇಶಿ ಅತಿಥಿಗಳಿಗೆ ಕನ್ನಡದ ಅಂಗಿಗಳನ್ನು ನೀಡಿ, ಸತ್ಕರಿಸಲಾಯಿತು.

ನಂತರ ಎಲ್ಲರಿಗೂ ಹೋಳಿಗೆಯನ್ನು ಕೊಟ್ಟು ಕಾರ್ಯಕ್ರಮಕ್ಕೆ ಮಂಗಳ ಹಾಡಲಾಯಿತು.

\ ಚಿತ್ರಗಳು: \

ಹನಿವೆಲ್ ಕಂಪನಿಯಲ್ಲಿ ಕನ್ನಡ ರಾಜ್ಯೋತ್ಸವ - ೨೦೧೦

2010-12-09T08:48:00.000-08:00

ಹಲವು ವರ್ಷಗಳಿಂದ 'ಹನಿವೆಲ್' ನಲ್ಲಿ ಕನ್ನಡ ರಾಜ್ಯೋತ್ಸವವನ್ನು ಬಹಳ ಅದ್ಧೂರಿಯಿಂದ ಆಚರಿಸಲಾಗುತ್ತಿದೆ. ನವೆಂಬರ್ ೧೫ ರಂದು ಬೆಂಗಳೂರಿನ ಬನ್ನೇರುಘಟ್ಟ ರಸ್ತೆಯಲ್ಲಿರುವ ಮುಖ್ಯ ಕಛೇರಿಯಲ್ಲಿ ಹನಿವೆಲ್ ನ ಕನ್ನಡ ರಾಜ್ಯೋತ್ಸವ ಸಮಾರಂಭವು ನಡೆಯಿತು. ಈ ಬಾರಿಯ ಆಚರಣೆಯನ್ನು ರಂಗ ಭೂಮಿಗೆ ಸಮರ್ಪಿಸಲಾಯಿತು.

ಸಮಾರಂಭದ ದಿನದ ಹಿಂದೆಯೇ ಅಂತ್ಯಾಕ್ಷರಿ, ಕರ್ನಾಟಕದ ಸ್ಥಳಗಳ ಮೇಲೆ ನಿರೂಪಣೆ (ಪ್ರೆಜೆಂಟೇಷನ್) ಮಾಡುವುದು, ಪದಬಂದ, ರಸಪ್ರಶ್ನೆ ಹೀಗೆ ಅನೇಕ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿತ್ತು. ವಿಜೇತರಿಗೆ ಸಮಾರಂಭದ ದಿನದಂದು ಪ್ರಶಸ್ತಿಗಳನ್ನು ವಿತರಿಸಲಾಯಿತು. ಬೆಂಗಳೂರಿನಲ್ಲಿರುವ ಹನಿವೆಲ್ ನ ಎಲ್ಲಾ ಕಛೇರಿಗಳಲ್ಲಿ ರಂಗೋಲಿಗಳನ್ನು ಹಾಕಲಾಗಿತ್ತು ಮತ್ತು ಎಲ್ಲ ಕಛೇರಿಗಳಲ್ಲಿ ಕನ್ನಡ ಪುಸ್ಥಕಗಳನ್ನು ವಿತರಣೆ ಮಾಡಲಾಯಿತು. ಹನಿವೆಲ್ ನ ಎಲ್ಲಾ ವಾಹನಗಳನ್ನು ಕನ್ನಡದ ಬಾವುಟಗಳಿಂದ ಸಿಂಗರಿಸಲಾಯಿತು. ನವೆಂಬರ್ ೧೫ ರಂದು ಅನೇಕರು ಕರ್ನಾಟಕದ ಸಂಸ್ಕೃತಿ ಬಿಂಬಿಸುವಂತೆ ಉಡುಪುಗಳನ್ನು ತೊಟ್ಟಿದ್ದರು.

ಸಮಾರಂಭಕ್ಕೆ ಮಾಸ್ಟರ್ ಹಿರಣ್ಣಯ್ಯನವರನ್ನು ಅಧ್ಯಕ್ಷರನ್ನಾಗಿ ಬರಮಾಡಿಕೊಳ್ಳಲಾಯಿತು. "ನಮ್ಮ ಶಾರದೆ" ಎಂಬ ಭರತನಾಟ್ಯದೊಂದಿಗೆ ಸಾಂಸ್ಕೃತಿಕ ಕಾರ್ಯಕ್ರಮವು ಶುರುವಾಯಿತು. ಜನಪದ ಲೋಕದ ಡೊಳ್ಳು ಕುಣಿತ ಎಲ್ಲರನ್ನು ಎದ್ದು ಕುಣಿಯುವಂತೆ ಮಾಡಿತು. "ಶ್ರೀ ಕೃಷ್ಣ ಸಂದಾನ" ಎಂಬ ಹಾಸ್ಯ ನಾಟಕ ಜನರನ್ನು ಬಹಳ ಚೆನ್ನಾಗಿ ರಂಜಿಸಿತು. ಶಂಕರ್ ಶಾನ್ಬೋಗ್ ರ ಅಧ್ಬುತ ಸಂಗೀತದೊಂದಿಗೆ ಈ ವರ್ಷದ ಕನ್ನಡ ರಾಜ್ಯೋತ್ಸವದ ಕಾರ್ಯಕ್ರಮವು ಮುಕ್ತಾಯಗೊಂಡಿತು.

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಚಿತ್ರಗಳು:

ಸೀಮನ್ಸ್ ಕಂಪನಿಯಲ್ಲಿ ಕನ್ನಡ ರಾಜ್ಯೋತ್ಸವ - ೨೦೧೦

2010-12-08T09:44:00.000-08:00

ಸೀಮನ್ಸ್ ಕಂಪನಿಯಲ್ಲಿ ನವೆಂಬರ್ ೧೯ ರಂದು ಅತ್ಯಂತ ಸಂಭ್ರಮದಿಂದ ಕನ್ನಡ ರಾಜ್ಯೋತ್ಸವವನ್ನು ಆಚರಿಸಲಾಯಿತು. ಪ್ರತಿ ವರ್ಷದಂತೆ ಈ ವರ್ಷವೂ ಆಚರಣೆಗೆ ಮುಂಚೆ ವಿವಿಧ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿತ್ತು. ಕನ್ನಡ ಹಾಡುಗಳನ್ನು ಹಾಡುವುದು, ಶತಪ್ರತಿಶತ ಕನ್ನಡ ಎಂಬ ಸ್ಪರ್ಧೆಯಲ್ಲಿ ೧೦೦ ಪ್ರತಿಶತ ಕನ್ನಡ ಭಾಷೆಯಲ್ಲೇ ಮಾತಾಡುವುದು, ರಂಗೋಲಿ ಸ್ಪರ್ಧೆ, ಕರ್ನಾಟಕದ ಹಳ್ಳಿಯ ಜೀವನ ಶೈಲಿ ಎಂಬ ವಿಷಯವನ್ನು ಆಧರಿಸಿ ಚಿತ್ರಕಲೆ ಸ್ಪರ್ಧೆ, ಕನ್ನಡ ಚಲನಚಿತ್ರ ನಟ ನಟಿಯರ ಚಿತ್ರದ ರೂಪರೇಖೆಯನ್ನು ಬಿಡಿಸುವುದು ಹೀಗೆ ಹತ್ತು ಹಲವು ಸ್ಪರ್ಧೆಗಳು ಆಯೋಜಿಸಿ, ನಿರ್ವಹಿಸಿ ಅರ್ಥಪೂರ್ಣವಾಗಿ ನೆರವೇರಿಸಲಾಯಿತು.

ಇನ್ನು ಆಚರಣೆಯ ದಿನದಂದು ಎಲ್ಲರೂ ಉತ್ಸಾಹದಿಂದ ಪಾಲ್ಗೊಂಡಿದ್ದರು. ಹಲವಾರು ಕನ್ನಡದ ಹಾಡುಗಳಿಗೆ ಯುವಸಹೋದ್ಯೋಗಿಗಳು ಡ್ಯಾನ್ಸ್ ಮಾಡಿದರು. ನಂತರ ಕೆಲವರು ಮ್ಯಾಡ್ ಆಡ್ಸ್ (ತಮಾಷೆ ಜಾಹೀರಾತು) ನೆರವೇರಿಸಿ ಕೊಟ್ಟು ಅಲ್ಲಿದ್ದ ಎಲ್ಲ ಸಭೀಕರನ್ನು ರಂಜಿಸಿದರು. ಅದೇ ರೀತಿ ಹಾಸ್ಯ ಸಂಜೆ ಕಾರ್ಯಕ್ರಮವನ್ನು ಏರ್ಪಡಿಸಲಾಗಿತ್ತು. ಈ ಕಾರ್ಯಕ್ರಮವು ನಮ್ಮನ್ನೆಲ್ಲ ನಗೆಯ ಹೊಳೆಯಲ್ಲಿ ತೇಲಿಸಿತು. ಇತ್ತೀಚಿಗೆ ನಿಧನರಾದ ಕನ್ನಡ ಚಿತ್ರರಂಗದ ಖ್ಯಾತ ನಟ ವಿಷ್ಣುವರ್ಧನ್ ಅವರ ಸ್ಮರಣೆಯನ್ನು "ಸಾಹಸ ಸಿಂಹನಿಗೆ ನಮನ" ಎಂಬ ನೃತ್ಯದ ಮೂಲಕ ಮಾಡಲಾಯಿತು.
ಈ ವಿಧದಲ್ಲಿ ೨೦೧೦ ರ ಕನ್ನಡ ರಾಜ್ಯೋತ್ಸವವನ್ನು ಅಚ್ಚುಕಟ್ಟಾಗಿ ಆಚರಣೆ ಮಾಡಲಾಯಿತು. ಹೊಸ ಅನುಭವವನ್ನು, ರಾಜ್ಯೋತ್ಸವದ ಸುಮಧುರ ಕ್ಷಣಗಳನ್ನು ನೆನೆಯುತ್ತ, ಮುಂದಿನ ವರ್ಷದ ರಾಜ್ಯೋತ್ಸವದ ಆಚರಣೆ ಬಗ್ಗೆ ವಿಚಾರ ಮಾಡುತ್ತ ಮನೆ ಕಡೆ ಹೆಜ್ಜೆ ಹಾಕಿದೆವು.

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಚಿತ್ರಗಳು:

ಟಿ.ಸಿ.ಎಸ್. ನಲ್ಲಿ ಕನ್ನಡ ರಾಜ್ಯೋತ್ಸವ - ೨೦೧೦

2010-12-04T05:20:00.000-08:00

ಮೊನ್ನೆ ಅಂದರೆ ನವೆಂಬರ್ ೧೨ ರಂದು ಟಿ ಸಿ ಎಸ್ ನಲ್ಲಿ (ಧಾರಾ ಕಟ್ಟಡ) ಕನ್ನಡ ರಾಜ್ಯೋತ್ಸವದ ಆಚರಣೆಯನ್ನು ಬಹಳ ಸೋಗಸಾಗಿ, ಅಚ್ಚುಕಟ್ಟಾಗಿ ಆಯೋಜಿಸಲಾಗಿತ್ತು ಹಾಗೂ ನಾಡಹಬ್ಬದ ಆಚರಣೆಯ ಈ ಸಂದರ್ಭದಲ್ಲಿ ನಮ್ಮ ಕಂಪನಿಯ ಕೆಲ "ಕಲಾಪ್ರತಿಭಾನ್ವಿತ" ಸಹೋದ್ಯೋಗಿಗಳು ಅತ್ಯಂತ ಆಸಕ್ತಿಯಿಂದ, ಅಭಿಮಾನದಿಂದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಸಮಾರಂಭಕ್ಕೆ ಆಗಮಿಸಿದವರೆಲ್ಲರ ಹೃಮನಗಳನ್ನು ತಣ್ಣಿಸುವ ಹಾಗೆ ನಡೆಸಿಕೊಟ್ಟರು. ಸಮಾರಂಭಕ್ಕೆ ನಮ್ಮೆಲ್ಲರ ನೆಚ್ಚಿನ ಮಾಸ್ಟರ್ ಹಿರಣ್ಣಯ್ಯನವರು ಮುಖ್ಯ ಅತಿಥಿಗಳಾಗಿ ಬಂದಿದ್ದರು. ಸಂಜೆ ೪.೩೦ ರ ವೇಳೆಗೆ ಸರಿಯಾಗಿ ದೀಪ ಬೆಳಗಿಸುವ ಮೂಲಕ ಹಿರಣ್ಣಯ್ಯನವರು ಕಾರ್ಯಕ್ರಮಕ್ಕೆ ಮುನ್ನುಡಿ ಬರೆದರು. ನಾಡಗೀತೆ ಹಾಗು ಹಚ್ಚೇವು ಕನ್ನಡದ ದೀಪ ಕವನದ ಸಾಲುಗಳನ್ನು ಸುಶ್ರಾವ್ಯವಾಗಿ ಹಾಡುವುದರ ಮೂಲಕ ಕಾರ್ಯಕ್ರಮ ಶುರುವಾಯಿತು.

ಅನಂತರದಲ್ಲಿ ಮೂಡಿಬಂದ ಹಿರಣ್ಣ ಯ್ಯನವರ ಕನ್ನಡ ಹಾಗೂ ಇಂಗ್ಲೀಶ್ ಭಾಷೆಗಳ ಮಿಶ್ರಿತ ಮಿಂಚಿನ ವಾಗ್ಜರಿ ನೆರವೇರಿದವರಲ್ಲಿ ತಮ್ತಮ್ಮ ಮಾತೃಭಾಷಾಭಿಮಾನದ ಕಿಚ್ಚನ್ನು ಹೊತ್ತಿಸುವಂತೆ ಇತ್ತು.ಕನ್ನಡದಷ್ಟೇ ಇಂಗ್ಲೀಶ್ ಭಾಷೆಯ ಮೇಲೂ ಅವರಿಗಿದ್ದ ಭಾಷಾ ಬಿಗಿಹಿಡಿತ ಹಾಗೂ ಮಾತಿನ ಚತುರತೆಯನ್ನು ಕಂಡು ಕನ್ನಡಿಗ ಸಹೋದ್ಯೋಗಿಗಳೇಕೆ ಪರ ಭಾಷಾ ಸಹೋದ್ಯೋಗಿಗಳು ಸಹ ಅಂದು ಬೆರಗಾಗಿ ಹೋಗಿದ್ದರು. ಎಪ್ಪತ್ತೇಳರ ಇಳಿವಯಸ್ಸಿನಲ್ಲೂ ಇಪ್ಪತ್ತೇಳರ ಯುವಕನಂತೆ ಪ್ರಬುದ್ದವಾದ ಹಾಗು ಹಾಸ್ಯ ತುಂಬಿದ ಮಾತಿನ ಜೋರುಮಳೆಯನ್ನೇ ಸುರಿಸಿದರು.ಅಲ್ಲದೆ ಕನ್ನಡ ಭಾಷೆಗೆ ಮಾಸ್ತಿ, ಗುಂಡಪ್ಪನವರು, ಕೈಲಾಸಂ, ನಾ ಕಸ್ತೂರಿ ಮುಂತಾದ ಪರ ಮಾತೃಭಾಷ ಕವಿಗಳ ಅಪರಿಮಿತ ಕೊಡುಗೆಯನ್ನು ಸ್ಮರಿಸಿದರು.

ಹಿರಣ್ಣಯ್ಯನವರ ಮಾತಿನ ಪ್ರವಾಹ ನಿಲ್ಲುತ್ತಿದ್ದಂತೆಯೇ, ಹಿರಿಯ ಸಹೋದ್ಯೋಗಿಗಳು ಆಯೋಜಿಸಿದ್ದ "ಥಟ್ ಅಂತ ಹೇಳಿ" ಕನ್ನಡ ನಾಡಿಗೆ ಸಂಬಂಧಿಸಿದ ರಸಪ್ರಶ್ನೆಗಳನ್ನು ಕೇಳುವ ಮೂಲಕ ಒಂದರ್ಥದಲ್ಲಿ ವೀಕ್ಷಕರನ್ನು ಕಾರ್ಯಕ್ರಮದಲ್ಲಿ ಭಾಗವಹಿಸುವಂತೆ ಮಾಡಿತು.

ರಸಪ್ರಶ್ನೆ ಕಾರ್ಯಕ್ರಮವೂ ಮುಗಿಯುತ್ತಿದ್ದಂತೆಯೇ ಯುವಸಹೋದ್ಯೋಗಿಗಳಿಂದ ಚಲನಚಿತ್ರ ಗೀತೆಗಳ ಗಾಯನ ಸ್ಪರ್ಧೆ ಇತ್ತು. ಅನಿಸುತಿದೆ ಯಾಕೋ ಇಂದು, ನೀ ಸನಿಹಕೆ ಬಂದರೆ.., ನೀ ಅಮೃತಧಾರೆ…, ಗಿಲ್ ಗಿಲ್ ಗಿಲಕ್ಕ್ ಕಾಲ್ಗೆಜ್ಜೆ ಝಣಕ್ಕ್.., ಈ ಗೀತೆಗಳನ್ನು ಹಾಡಿದರು. ಅನಿಸುತಿದೆ ಯಾಕೋ ಇಂದು ಹಾಡಿಗೆ ಪ್ರಥಮ ಬಹುಮಾನ ಬಂತು.

ಗಾಯನ ಸ್ಪರ್ಧೆ ಮುಗಿದ ಬಳಿಕ “ಹೆಚ್ ಕೆ ರಘು” ಎಂಬುವ ನಮ್ಮ ಕಂಪನಿಯ ಹಿರಿಯ ಸಹೋದ್ಯೋಗಿ, ಅವರು ಮಧುರವಾಗಿ ಹಲವಾರು ಕನ್ನಡ ಚಲನಚಿತ್ರ ಗೀತೆಗಳನ್ನು ಹಾಡುವ ಮೂಲಕ (ಅದರಲ್ಲೂ ಹೆಚ್ಚಾಗಿ ಕನ್ನಡ ನಾಡು, ನುಡಿ ಹಾಗು ಸಂಸ್ಕೃತಿಗೆ ಸಂಬಂಧಿಸಿದ ಗೀತೆಗಳನ್ನು) ಕೆಲಕಾಲ ನಮ್ಮನ್ನು ನಾಡು, ನುಡಿ ವಿಷಯದಲ್ಲಿ ಭಾವಪರವಶರನ್ನಾಗಿ ಮಾಡಿಬಿಟ್ಟಿದ್ದರು.

ಸಮಾರಂಭದ ಮಧ್ಯಾವಧಿಯಲ್ಲಿ ಸಭಾಂಗಣ ವೀಕ್ಷಕರಿಂದ ತುಂಬಿಹೋಗಿತ್ತು, ನಮ್ಮ ಕಂಪನಿಯಲ್ಲಿ ನಡೆಸಿದ ಕನ್ನಡ ರಾಜ್ಯೋತ್ಸವ ಕಾರ್ಯಕ್ರಮಕ್ಕೆ ಸಿಕ್ಕ ಅಭೂತಪೂರ್ವ ಬೆಂಬಲ ಮತ್ತು ಯಶಸ್ಸು ವೀಕ್ಷಕರ ಹಾಜರಾತಿಯ ಮೂಲಕ ತೋರ್ಪಡಿಸುತ್ತಿತ್ತು.

ಅಲ್ಲದೆ ರಿಚರ್ಡ್ ಲೂಯಿಸ್ ಹಾಗು ಎಂ. ಎಸ್ ನರಸಿಂಹಮೂರ್ತಿಯವರು ಕಾರ್ಯಕ್ರಮಕ್ಕೆ ಆಗಮಿಸಿ, ತಮ್ಮ ಹಾಸ್ಯದ ಮಾತುಗಳ ಮೂಲಕ ನಮ್ಮನ್ನೆಲ್ಲ ನಗೆಯ ಹೊಳೆಯಲ್ಲಿ ತೇಲಿಸಿದರು. ಒಂದು ಹಂತದಲ್ಲಿ ರಿಚರ್ಡ್ ಲೂಯಿಸ್ ರ ಹಾಸ್ಯದ ಮಾತುಗಳ ಮೂಡಿಗೆ ಸಿಕ್ಕು ಸಮಯವಾದುದ್ದೆ ಅರಿವಿಗೆ ಬರಲಿಲ್ಲ

ನಂತರದಲ್ಲಿ ಶಿವ ಅಂತ ಹೋಗುತ್ತಿದೆ ರೋಡಿನಲ್ಲಿ.. (ಜಾಕಿ) , ಅರೆರೆರೆ ಗಿಣಿರಾಮ.. (ಗಂಧದಗುಡಿ), ಇನ್ನೂ ಹಲವಾರು ಕನ್ನಡದ ಹಾಡುಗಳಿಗೆ ಯುವಸಹೋದ್ಯೋಗಿಗಳು ಡ್ಯಾನ್ಸ್ ಮಾಡಿದರು ಹಾಗು ಕನ್ನಡ ನಾಡು, ನುಡಿ ಕುರಿತಾದ ಗೀತೆಗೆ ಕೆಲ ಸಹೃದಯಿ ಸಹೋದ್ಯೋಗಿಗಳು ಸಮೂಹ ಡ್ಯಾನ್ಸು ಮಾಡಿದರು . ಇನ್ನೂ ಕೆಲ ಸಹೋದ್ಯೋಗಿಗಳು ತುಂಬಾ ಹಾಸ್ಯಭರಿತವಾದ ಸ್ಕಿಟ್ (ರಜನಿ ಇನ್ ಇನ್ಸೈಡ್) ಮಾಡಿದರು. ಎಲ್ಲಕ್ಕಿಂತ ಹೆಚ್ಚಾಗಿ ನಮ್ಮನ್ನೆಲ್ಲ ಬೆರಗಾಗಿ ಮಾಡಿದ್ದು ಒರಿಸ್ಸಾದ ಯುವಸಹೋದ್ಯೋಗಿಯು ಶಿವ ಅಂತಾ ಹೋಗುತ್ತಿದ್ದೆ ರೋಡಿನಲ್ಲಿ… ಈ ಹಾಡನ್ನು ಬಹಳ ಸುಶ್ರಾವ್ಯವಾಗಿ ಹಾಡಿದ್ದು ಹಾಗೂ ಮತ್ತೋರ್ವ ಒರಿಸ್ಸಾದ ಯುವಸಹೋದ್ಯೋಗಿಯು ಹಾಡು ಸಂತೋಷಕ್ಕೆ (ಶಂಕರ್ ನಾಗ್ ಅವರ ಗೀತಾ ಚಿತ್ರದ ಹಾಡು) ಹಾಡಿಗೆ ಡ್ಯಾನ್ಸು ಮಾಡಿದ್ದು.

ಕಾರ್ಯಕ್ರಮದಲ್ಲಿ ಕೊನೆಯಲ್ಲಿ ನಮ್ಮ ಕಂಪನಿಯ ಹಿರಿಯ ಸಹೋದ್ಯೋಗಿ ಹೆಚ್ ಕೆ ರಘು ಅವರು ಭಾವಪೂರ್ಣವಾಗಿ ಹಾಡಿದ ಕುಲದಲ್ಲಿ ಕೀಳಾವುದೋ ಹುಚ್ಚಪ್ಪ..ಮತದಲ್ಲಿ ಮೇಲ್ಯಾವುದೋ ಗೀತೆಯೊಂದಿಗೆ ನಮ್ಮ ಕಂಪನಿಯ ಈ ಸಲದ ಕನ್ನಡ ರಾಜ್ಯೋತ್ಸವ ಕಾರ್ಯಕ್ರಮ ಮುಕ್ತಾಯವಾಯಿತು. ಮುಂದಿನ ವರುಷ ನಮ್ಮ ಕನ್ನಡ ರಾಜ್ಯೋತ್ಸವವನ್ನು ಇನ್ನೂ ಹೆಚ್ಚು ಅರ್ಥಪೂರ್ಣವಾಗಿ ಹಾಗು ವೈಭವದಿಂದ ಆಚರಣೆ ಮಾಡಬೇಕೆಂದು ಯೋಜನೆಯಲ್ಲಿ ಮನೆಕಡೆ ಹೆಜ್ಜೆ ಹಾಕಿದೆವು..

ಮೈಂಡ್ ಟೆಕ್ 5ನೇ ಕನ್ನಡ ರಾಜ್ಯೋತ್ಸವ - 2010

2010-12-01T04:53:00.000-08:00

ಮೈಂಡ್ ಟೆಕ್ ನಲ್ಲಿ ಪ್ರತಿ ವರ್ಷವೂ ಆಚರಿಸುವಂತೆ ಈ ವರ್ಷವೂ ಕನ್ನಡ ರಾಜ್ಯೋತ್ಸವವನ್ನು ನವೆಂಬರ್ 19 ರಂದು ಆಚರಿಸಲಾಯಿತು. ಇದು 5 ನೇ ವರ್ಷದ ಆಚರಣೆ ಎಂದು ಹೇಳಲು ಹೆಮ್ಮೆ.

ಕಾರ್ಯಕ್ರಮವು ಕೆಳಕಂಡಂತೆ ನಡೆಯಿತು.

1. ಬೆಳಿಗ್ಗೆ 11:30 ಗಂಟೆಗೆ ಎಲ್ಲರು ಆಚರಣೆಗೆ ಸೇರಿದೆವು. ಹಿಂದಿನ ದಿನವೇ ಬಣ್ಣದ ರಂಗೋಲಿಯನ್ನು ಹಾಕಿದ್ದೆವು. ಕರ್ನಾಟಕದ ಭೂಪಟದ ಅಲಂಕಾರ ಬೆಳಿಗ್ಗೆ 9ರೊಳಗೆ ಮುಗಿಯಿತು.

2. ಕಂಪನಿಯ ಗಣ್ಯರು ಆಗಮಿಸಿದರು. ಅವರಿಂದ ದೀಪ ಬೆಳಗಿಸಿದೆವು.

3. ಹಚ್ಚೇವು ಕನ್ನಡದ ದೀಪ ಹಾಡನ್ನು ಹಾಡಿದೆವು.

4. ಕಾರ್ಯಕ್ರಮ ನಿರೂಪಣೆ ಜವಾಬ್ದಾರಿಯನ್ನು ಮಧುಕರ್ ರವರು ವಹಿಸಿಕೊಂಡು ಚೆನ್ನಾಗಿ ನಡೆಸಿಕೊಟ್ಟರು. ನಿರೂಪಣೆ ಪೂರ್ತಿ ಕನ್ನಡದಲ್ಲೇ ಇದ್ದಿದ್ದು ವಿಶೇಷ.

5. ನಂತರ ನಾಡಗೀತೆ - ಜಯ ಭಾರತ ಜನನಿಯ ತನುಜಾತೆ ಜಯಹೇ ಕರ್ನಾಟಕ ಮಾತೆ ಹಾಡಲಾಯಿತು. ಇದನ್ನು ಹಾಡಲು ಒಂದು ತಂಡ, ಒಂದು ವಾರದಿಂದ ಅಭ್ಯಾಸ ಮಾಡಿತ್ತು. ಚೆನ್ನಾಗಿ ಹಾಡಿದರು.

6. ಕನ್ನಡ ನಾಡು, ನುಡಿ ಹಾಗೂ ಜನರ ಬಗ್ಗೆ ಮಧುಕರ್ ಮಾತನಾಡಿದರು.

7. ಗಣ್ಯರು ಕೂಡ ಕನ್ನಡ ಹಾಗು ಕರ್ನಾಟಕದ ಬಗ್ಗೆ ಅವರಿಗಿರುವ ಅಭಿಪ್ರಾಯವನ್ನು ಹೇಳಿದರು.

8. ಸಂದೀಪ್ ವರು "ಗೀಯ ಪದ" ಹಾಡನ್ನು ಹಾಡಿದರು. ಗೀಯ ಸಾಲುಗಳನ್ನು ನೆರೆದಿದಿದ್ದ ಸಭೀಕರೆಲ್ಲ ಜೊತೇಲಿ ಹೇಳಿದರು.

9. ಪ್ರತಿ ವರ್ಷ ಆಚರಣೆಯ ಸಂದರ್ಭದಲ್ಲಿ ಕರ್ನಾಟಕದ ಸಿಹಿ ತಿಂಡಿಯನ್ನು ಎಲ್ಲ ಉದ್ಯೋಗಿಗಳಿಗೆ ಹಂಚುವುದರ ಮೂಲಕ ಅದರ ಪರಿಚಯ. ಇದು ಮೈಂಡ್ ಟೆಕ್ ಕನ್ನಡ ರಾಜ್ಯೋತ್ಸವದ ವಿಶೇಷ . ಈ ವರ್ಷ "ಕಜ್ಜಾಯ" ಹಾಗು "ಮದ್ಧೂರು ವಡೆ" ಹಂಚಿದೆವು.

10. ಎಲ್ಲಾ ಉದ್ಯೋಗಿಗಳಿಗೂ ಕನ್ನಡದ ಕಾಲೇನ್ಡರ್ ಕೊಡಲಾಯಿತು. ಕಾಲೇನ್ಡರ್ನಲ್ಲಿ ಅವರ ಹೆಸರನ್ನು ಕನ್ನಡದಲ್ಲಿಯೇ ಬರೆಯಲಾಗಿತ್ತು. ಎಲ್ಲರು ಇದನ್ನು ನೋಡಿ ಆಶ್ಚರ್ಯ ಹಾಗು ಸಂತೋಷ ವ್ಯಕ್ತ ಪಡಿಸಿದರು.

11. ಸಂಜೆ ಕನ್ನಡ ರಸಪ್ರಶ್ನೆ , ಪರಭಾಷಿಕರಿಗೆ ಕನ್ನಡದಲ್ಲಿ ಮಾತನಾಡುವ ಸ್ಪರ್ಧೆ, ಹಾಡು ಹಾಗು ಕರ್ನಾಟಕದ ಉಡುಗೆ ಸ್ಪರ್ಧೆ ಏರ್ಪಡಿಸಲಾಗಿತ್ತು. ಸ್ಪರ್ಧೆಯಲ್ಲಿ ಎಲ್ಲರು ಭಾಗವಹಿಸಿದರು. ಗೆದ್ದವರಿಗೆ ಚನ್ನಪಟ್ಟಣದ ಕೀ-ಚೈನ್ ಕೊಡಲಾಯಿತು. ಮತ್ತೆ ಪರಭಾಷಿಕರಿಗೆ ಕನ್ನಡ ಕಲಿಯುವ ಪುಸ್ತಕ ಕೊಡಲಾಯಿತು.

ಚಿತ್ರಗಳು:

ಸ್ಯಾಪ್ ಲ್ಯಾಬ್ಸ್ ಅಲ್ಲಿ ಕನ್ನಡ ನಾಡಹಬ್ಬ 2010

2010-11-29T17:01:00.000-08:00

ಅಕ್ಟೋಬರ್ ೨೮ರಂದು ಸ್ಯಾಪ್ ಲ್ಯಾಬ್ಸ್ ಕಛೇರಿಯಲ್ಲಿ ರಾಜ್ಯೋತ್ಸವವನ್ನು ಅದ್ಧೂರಿಯಾಗಿ ಆಚರಿಸಲಾಯಿತು.ಬೆಳಗ್ಗೆ ೮:೩೦ ರ ಸುಮಾರಿಗೆ ಶ್ರೀ. ಕೆ.ಕೆ. ಲಕ್ಷ್ಮೀಪ್ರಸಾದ್ ರವರು ಧ್ವಜಾರೋಹಣವನ್ನು ನೆರವೇರಿಸುವುದರ ಮೂಲಕ ಈ ವರ್ಷದ ರಾಜ್ಯೋತ್ಸವದ ಸಂಭ್ರಮ ಶುರುವಾಯಿತು. ಧ್ವಜಾರೋಹಣದ ಸಂದರ್ಭದಲ್ಲಿ ನಾಡಗೀತೆಯಾದ "ಜೈ ಭಾರತ ಜನನಿಯ ತನುಜಾತೆ"ಯನ್ನು ನಾವೆಲ್ಲರೂ ಹಾಡಿದೆವು.

ತದನಂತರ ಅಲ್ಲಿ ನೆರೆದಿದ್ದಂತಹ ಎಲ್ಲಾ ಕನ್ನಡ ಪ್ರೇಮಿಗಳಿಗೆ ಸಿಹಿಯನ್ನು ಹಂಚಿದ್ದಾಯಿತು.ನಂತರ ಶುರುವಾಯಿತು ನೋಡಿ, ಮಧ್ಯಾಹ್ನದ ಸಂಭ್ರಮಕ್ಕೆ ಕಛೇರಿಯ ಒಳಾಂಗಣ ಕೆಫ಼ೆಟೇರಿಯವನ್ನು ಶೃಂಗರಿಸುವ ಸಂಭ್ರಮ. ಅಲ್ಲೇ ಇದ್ದ ಪುಟ್ಟ ವೇದಿಕೆಯನ್ನು ಹೂವಿನಿಂದ ಸಿಂಗರಿಸಿದ್ದಾಯಿತು.

ಅಷ್ಟರಲ್ಲಾಗಲೆ ಡೊಳ್ಳು ಕುಣಿತ ಮತ್ತು ವೀರಭದ್ರ ಕುಣಿತ ತಂಡದವರ ಆಗಮನವಾಯಿತು. ಸರಿ ಅವರಿಗೆ ಊಟ ಮಾಡಿ ತಯರಾಗಿರಲು ಹೇಳಿ, ನಮ್ಮ ಸಹೋದ್ಯೋಗಿಗಳನ್ನೇ ಕರಗವನ್ನು ಹೊತ್ತು ತರಲು ಸಿದ್ಧಮಾಡಲು ಶುರುಮಾಡಿದೆವು. ಇದರ ಜೊತೆಗೆ ವಿಡಿಯೊ ಹಾಗು ಧ್ವನಿವರ್ಧಕಗಳನ್ನು ಜೋಡಿಸುವ ಕಾರ್ಯ ನಡೆಯುತಿತ್ತು. ಇಷ್ಟೆಲ್ಲಾ ಆಗುವಷ್ಟರಲ್ಲಿ ಗಂಟೆ ೧ ಆಯಿತು.

ಡೊಳ್ಳು ಕುಣಿತ ಮತ್ತು ವೀರಭದ್ರ ಕುಣಿತ ತಂಡದವರನ್ನು ಕಛೇರಿಯ ಒಳಗೆ ಒಂದು ಸುತ್ತು ತಮ್ಮ ಕಲೆಯನ್ನು ಪ್ರದರ್ಶಿಸುತ್ತಾ ಬಂದರು. ಡೊಳ್ಳಿನ ಸದ್ದಿಗೆ ಇಡೀ ಕಛೇರಿಯ ಜನ ರೋಮಾಂಚನಗೊಂಡರು. ಅವರು ನಿರ್ಮಿಸಿದ ಮಾನವ ಪಿರಮಿಡ್ ಮಾದರಿಯಲ್ಲಿ ಡೊಳ್ಳು ಬಾರಿಸುವುದನ್ನು ಕಂಡ ನಮ್ಮ ಪ್ಯಾಟೆ ಮಂದಿ ಆಶರ್ಯ ಚಕಿತರಾದರು. ಇನ್ನು ವೀರಭದ್ರ ಕುಣಿತವನ್ನು ಕಂಡ ಜನ ಊಟವನ್ನು ಮರೆತು ಅವರ ಕಲೆಯನ್ನು ಸವಿಯುತ್ತ ನಿಂತರು.

ವೀರಭದ್ರ ಕುಣಿತದವರ ಮುಖಭಾವವನ್ನು ವರ್ಣಿಸಲು ಪದಗಳು ಸಿಗೋದಿಲ್ಲಾ..ಅದೇನಿದ್ರು ನೋಡಿ ಸವಿಯೋದೆ ಚೆಂದ. ಇದೆಲ್ಲಾ ಆಗುತ್ತಿರಬೇಕಾದ್ರೆ.. ಅಲ್ಲಿ ಇನ್ನೊಂದು ಕಡೆ ಕರಗದ ಉತ್ಸವ ಶುರುವಾಯಿತು. ಈ ಸಲದ ರಾಜ್ಯೋತ್ಸವದ ಥೀಮ್ "ಬೆಂಗಳೂರು ದರ್ಶನ" ವಾಗಿದ್ದ ರಿಂದ, ಕರಗದ ಜೊತೆ ಕೆಂಪೇಗೌಡರ ವೇಷಧಾರಿಯೊಬ್ಬರು ಸಭಾಂಗಣದ ಒಳಗೆ ನಡೆದು ಬಂದರು. ಕರಗಕ್ಕೆ ಡೊಳ್ಳು ಕುಣಿತ ಹಾಗು ವೀರಭದ್ರ ಕುಣಿತದವರಿಂದ ಸ್ವಾಗತ ಸಿಕ್ಕಿತು.

ನಂತರ ಕರಗಕ್ಕೆ ಪೂಜೆ ಸಲ್ಲಿಸಿ ಕಾರ್ಯಕ್ರಮವನ್ನು ಸರಿಯಾಗಿ ೨:೪೫ ಗೆ ಶುರುಮಡಿದೆವು. ಶಿವು ಹಾಗು ಶ್ರೀಲಕ್ಷ್ಮಿ ಯವರ ಆತಿಥ್ಯದಲಿ ಕಾರ್ಯಕ್ರಮ ಗಣಪನ ಆರಾಧನೆಯೊಂದಿಗೆ ಶುರುವಾಯಿತು. ಈ ಸಲ ಗಣಪನ ಪೂಜೆ ನೃತ್ಯರೂಪದಲ್ಲಿ ಪ್ರಸ್ತುತ ಪಡಿಸಿದ್ದು ನಮ್ಮವರೇ ಆದ ಸಿಂಧುರವರು.

ಅಷ್ಟರಲ್ಲಿ ನಮ್ಮ ಈ ಕಾರ್ಯಕ್ರಮದ ಮುಖ್ಯ ಅತಿಥಿಗಳಾದ ಶ್ರೀ ಯೋಗರಾಜ ಭಟ್ ಅವರು ಆಗಮಿಸಿದರು. ಭಾರಿ ಚಪ್ಪಾಳೆಯೊಂದಿಗೆ ಅವರನ್ನು ಸಭೆಯಲ್ಲಿ ನೆರೆದಿದ್ದ ಜನರು ಸ್ವಾಗತಿಸಿದರು. ಅವರ ಜೊತೆ ನಮ್ಮವರೆ ಆದ ಶ್ರೀ. ಕೆ.ಕೆ. ಲಕ್ಷ್ಮೀಪ್ರಸಾದ್ ಮತ್ತು ಶ್ರೀ ಭುವನೇಶ್ವರ ನಾಯಕ್ ದೀಪ ಬೆಳಗಿಸಿ ಕಾರ್ಯಕ್ರಮವನ್ನು ಉದ್ಘಾಟಿಸಿದರು. ಈ ಸಮಯದಲ್ಲಿ ಶ್ರಿನಿ ಮತ್ತು ತಂಡದವರು "ಹಚ್ಚೇವು ಕನ್ನಡದ ದೀಪ" ಹಾಡನ್ನು ಹಾಡಿದರು.

ಈ ವರ್ಷ ಗತಿಸಿದ ಕರ್ನಾಟಕದ ಮೇರು ವ್ಯಕ್ತಿಗಳಿಗೆ ಹಾಡಿನ ಮೂಲಕ ಶ್ರಧ್ಧಾಂಜಲಿಯನ್ನು ಅರ್ಪಿಸಲಾಯಿತು. ನಂತರ ಶ್ರೀ. ಯೋಗರಾಜ್ ಭಟ್ ಅವರು ಈ ಟೆಕ್ಕಿ ಯುಗದಲ್ಲಿ ಸಂಬಂಧಗಳ ಕುರಿತು ಮಾತನ್ನಾಡಿದರು. ತಮಾಷೆಯಾಗೆ ಇದ್ದ ಅವರ ಮಾತುಗಳು, ಮುಗಿಯುವ ಅಂತಕ್ಕೆ ಬಂದಾಗ ನಮ್ಮಲ್ಲಿ ಗಂಭೀರವಾದ ಆಲೋಚನೆಯನ್ನುಂಟು ಮಾಡಿತು.

ಸಭಿಕರ "ಒಂದು ಹಾಡು" ಎಂಬ ಒತ್ತಾಯಕ್ಕೆ ಮಣಿಯದ ಅವರು ತಮ್ಮ ಪಂಚರಂಗಿ ಸಿನಿಮಾದ "ಗಳು" ಡೈಲಾಗ್ ಅನ್ನು ನಮ್ಮ ಸಾಫ್ಟವೇರ್ ಉದ್ಯಮಕ್ಕೆ ಸರಿಯಾಗಿ ಬದಲಾಯಿಸಿ ಹೇಳಿ ಪ್ರೇಕ್ಷಕರಿಂದ ಭರ್ಜರಿ ಚಪ್ಪಾಳೆ ಗಿಟ್ಟಿಸಿಕೊಂಡರು. ನಂತರ ಕನ್ನಡ ಚಲನಚಿತ್ರಗಳ ಕೆಲವು ಗೀತೆಗಳನ್ನು ಹಾಡಲಾಯಿತು. ಹರ್ಷ ಮತ್ತು ತಂಡದವರಿಂದ "ಬೆಂಗಳೂರು ೨೨೫೦" ಎಂಬ ನಾಟಕ ನೆರದಿದ್ದ ಸಭಿಕರಿಗೆ ಮನೋರಂಜನೆ ಜೊತೆಗೆ ಕನ್ನಡಿಗರ ಕರ್ತವ್ಯವನ್ನು ನೆನಪಿಸಿತು.

ನಂತರ ವಿಠ್ಠಲ್ ಮತ್ತು ತಂಡದವರಿಂದ "ತಗಡಾನಿಕ್" ಎಂಬ ಟೈಟಾನಿಕ್ ಚಲನಚಿತ್ರದ ಸ್ಪೂಫ್ ಎಲ್ಲರನ್ನು ನಗೆಗಡಲಲ್ಲಿ ಮುಳುಗಿಸಿತು. ನಂತರ ಕೌಶಿಕ್ ಮತ್ತು ತಂಡದವರಿಂದ "ಮಠ" ಎಂಬ ಮ್ಯಾಡ್ ಆಡ್ಸ್ ಪ್ರೇಕ್ಷಕರನ್ನು ಹುಚ್ಚೆಬಿಸಿತು."ಬೆಂಗಳೂರು ದರ್ಶನ" ಫ್ಯಾಶನ್ ಷೋ ದಲ್ಲಿ ಮೊದಲಿಗೆ ಬಂದಿದ್ದು ನಾಡ ಪ್ರಭು ಕೆಂಪೇಗೌಡ.

ನಂತರ ಬೆಂಗಳೂರಿನ ದೇವಸ್ಥಾನಗಳ ಪರಿಚಯ, ಬೆಂಗಳೂರಿನ ಫುಡ್ ಸ್ಟ್ರೀಟ್ ಪರಿಚಯ, ಚಿತ್ರ ಸಂತೆ, ಕ.ರ.ವೇ, ಕಿಂಗ್ ಫಿಷರ್/ ಆರ್.ಸಿ.ಬಿ, ಬೆಂಗಳೂರಿನ ನೈಟ್ ಲೈಫ್ ಬಗ್ಗೆ ಪರಿಚಯಿಸಲಾಯಿತು.ತದನಂತರ ಚಿರಂಜೀವಿ ಮತ್ತು ತಂಡದವರಿಂದ ನೃತ್ಯ ಪ್ರದರ್ಶನ ನಡೆಯಿತು. ಇದರೊಂದಿಗೆ ಈ ಸಲದ ರಾಜ್ಯೋತ್ಸವದ ಕಾರ್ಯಕ್ರಮ ಮುಕ್ತಾಯವಾಯಿತು.

ವಿಪ್ರೋದಲ್ಲಿ ಕನ್ನಡ ನಾಡಹಬ್ಬ 2009

2010-03-01T06:26:00.000-08:00

ಕನ್ನಡ ಎನೆ ಕುಣಿದಾಡುವುದೆನ್ನೆದೆ,
ಕನ್ನಡ ಎನೆ ಕಿವಿ ನಿಮುರುವುದು…..
ಎಂಬ ಕವಿವಾಣಿಯಂತೆ ನಿಜವಾದ ಸ್ವಾಭಿಮಾನಿ ಕನ್ನಡಿಗರಿಗೆ ಕನ್ನಡ ಎಂಬ ಪದ ಕಿವಿಗೆ ಬಿದ್ದೊಡನೆಯೇ ರೋಮಂಚನವಾಗುವುದು.

ಎಲ್ಲಾದರೂ ಇರು ಎಂತಾದರೂ ಇರು
ಎಂದೆಂದಿಗೂ ನೀ ಕನ್ನಡವಾಗಿರು….
ಎಂಬುದು ಕವಿಯ ಕಂಪುನುಡಿ

ಅದರಂತೆಯೇ ವಿಪ್ರೊ ಸಂಸ್ಥೆಯಲ್ಲಿ ಕನ್ನಡದ ಕಂಪು ಪಸರಿಸುವ ಕಾರ್ಯ ಕೆಚ್ಚಿನ ಕನ್ನಡಿಗರಿಂದಾಗುತ್ತಿದೆ. ವಿಪ್ರೋದಲ್ಲಿ ಸದ್ದಿಲ್ಲದೇ ವರ್ಷಕ್ಕೊಮ್ಮೆ ವಿಸ್ಮಯ ಎಂಬ ಹೆಸರ ಮೂಲಕ ಕನ್ನಡ ಜಾತ್ರೆ ನಡೆಯುತ್ತಿದೆ, ಕನ್ನಡ ಬಾವುಟಗಳು ಹಾರಾಡುತ್ತವೆ, ಸಾಹಿತ್ಯ ಮತ್ತು ಸಂಸ್ಕೃತಿಯ ಸಿಂಚನವಾಗುತ್ತದೆ. ಕಳೆದ ನಾಲ್ಕು ವರ್ಷಗಳಿಂದಲೂ ಸದ್ದಿಲ್ಲದೇ ಮತ್ತು ಸುದ್ದಿಯಾಗದ ಕನ್ನಡ ರಥ ವಿಪ್ರೋದಲ್ಲಿ ವಿಜ್ರಂಭಿಸುತ್ತ ಬಂದಿದೆ.

ಈ ಕನ್ನಡ ರಥದ ಸೂತ್ರಧಾರಿ ನರಸಿಂಗ ರಾವ್. ಇನ್ನು ಇವರಿಗೆ ವಿಸ್ಮಯದ ರೂವಾರಿಯಾಗಿ ರಾಘವೇಂದ್ರ ಕಮಲಾಕರ್ ಸಾಥ್ ನೀಡಿದ್ದಾರೆ . ಇವರಿಬ್ಬರಿಗೂ ಜೈ ಅನ್ನುತ್ತಲೇ ಕನ್ನಡ ಭಾಷಾಭಿಮಾನವನ್ನು ಎತ್ತಿ ತೋರಿಸಲು ಸಮಾನ ಮನಸ್ಸಿನ ಗೆಳೆಯರಿದ್ದಾರೆ.

ಫೆಬ್ರವರಿ 11 ರಂದು ನಡೆದ ವಿಸ್ಮಯ ಕಾರ್ಯಕ್ರಮವು ಆಪ್ತರ, ಸಮಾನಮನಸ್ಕರ, ಅಪ್ಪಟ ಕನ್ನಡಾಭಿಮಾನಿಗಳ ವೇದಿಕೆಯಾಗಿತ್ತೆನ್ನಬಹುದು. ಈ ಬಾರಿ ನಡೆದ ವಿಸ್ಮಯ ಮಾತ್ರ ಎಲ್ಲರನ್ನೂ ಮೂಕವಿಸ್ಮಿತರನ್ನಾಗಿಸಿದ್ದು ಸುಳ್ಳಲ್ಲ. ಇಂತಹ ಅಪರೂಪದ ಕಾರ್ಯಕ್ರಮಕ್ಕೆ ಸಾಕ್ಷಿಯಾಗಿದ್ದು ಸಾವಿರಾರು ವಿಪ್ರೊ ಕನ್ನಡಿಗರು - ಅಷ್ಟೊಂದು ಕನ್ನಡಿಗರು ವಿಪ್ರೋದಲ್ಲಿದ್ದಾರೆಯೇ ಎಂದು ಅಚ್ಚರಿಯಾಗಬಹುದು.

ಕಳೆದ ಫೆಬ್ರವರಿ 11ರಂದು ನಡೆದ ವಿಸ್ಮಯಕ್ಕೆ ಬರೋಬ್ಬರಿ ಐದು ಸಾವಿರಕ್ಕೂ ಹೆಚ್ಚು ಕನ್ನಡಿಗರು ಸೇರಿದ್ದು ವಿಶೇಷ ಮತ್ತು ವಿಸ್ಮಯ! ಹಾಗಾದರೆ, ಅಷ್ಟೊಂದು ಜನರ ಮುಂದೆ ವಿಸ್ಮಯದ ಅವತಾರವಾದರೂ ಹೇಗಿತ್ತು ಎಂಬ ಕುತೂಹಲವಿದ್ದರೆ ಅಲ್ಲಿನ ವರ್ಣನೆಯನ್ನೊಮ್ಮೆ ಓದಲೇಬೇಕು.

ಅದು ವಿಪ್ರೊ ಆವರಣದ ಕುವೆಂಪು ರಂಗಮಂಚ. ಸಿಂಪಲ್ ವೇದಿಕೆ ಮೇಲೆ ಹಾಗು ಮುಂದೆ ಕನ್ನಡ ಬಾವುಟಗಳದ್ದೇ ಕಾರುಬಾರು. ಇಡೀ 'Amphi theater' ಅನ್ನು ಒಂದು ನವ ವಧುವಿನಂತೆ ಸಿಂಗರಿಸಲಾಗಿದ್ದು, ಒಂದು ಗಂಧರ್ವ ಲೋಕವಾಗಿ ಮಾರ್ಪಟ್ಟಿತ್ತು. ಕಣ್ಣು ಹಾಯಿಸಿದ ಕಡೆಯೆಲ್ಲಾ ವಿಪ್ರೊ ಕನ್ನಡಿಗರ ಗುಂಪು. ಇದರೊಂದಿಗೆ ಸೇರಿದ್ದ ಸಾವಿರಾರು ಅನ್ಯಭಾಶಿಕರಲ್ಲೂ ಕನ್ನಡ ಪ್ರೇಮವಿತ್ತು ಎಂಬುದಕ್ಕೆ ಅವರ ಕೊರಳಲ್ಲಿದ್ದ ಕೆಂಪು ಹಳದಿ ಬಣ್ಣದ ವಸ್ತ್ರವೇ ಸಾಕ್ಷಿ.

ಆಗಷ್ಟೇ ಕೆಂಪು ಸೂರ್ಯ ತಣ್ಣಗಾಗುತ್ತಿದ್ದ. ಇತ್ತ ತಿಳಿ ತಂಗಾಳಿ ತೀಡುತ್ತಿತ್ತು. ಅತ್ತ amphi theater ಶಿಳ್ಳೆ, ಕೇಕೆ ಹಾಗು ಚಪ್ಪಾಳೆಗಳಿಂದ ಕಳೆಗಟ್ಟಿತ್ತು . ಎತ್ತ ನೋಡಿದರೂ ಕಿಕ್ಕಿರಿದು ತುಂಬಿದ್ದ ಜನಸ್ತೋಮ …. ಕನ್ನಡ ಕನ್ನಡ ಬನ್ನಿ ನಮ್ಮ ಸಂಗಡ ಎಂಬ ಸಂದೇಶ ಹೊತ್ತಿದ್ದ ವಿಸ್ಮಯ ಟಿ-ಶರ್ಟ್ ಧರಿಸಿ ಕಾರ್ಯಕ್ರಮಕ್ಕೆ ಕಹಳೆ ತಂದಿದ್ದ ವಿಪ್ರೊ ಕನ್ನಡಿಗರು ….

ನಿಜಕ್ಕೂ ಅದೊಂದು ಅಪ್ಪಟ ಕನ್ನಡ ಹಬ್ಬ. ಬಹಳಷ್ಟು ಜನ ವಿಶೇಷವಾದ ಸಾಂಸ್ಕೃತಿಕ ಉಡುಗೆ-ತೊಡುಗೆಗಳಲ್ಲಿ ವಿಜೃಂಭಿಸಿ ಬಣ್ಣದ ಲೋಕವನ್ನು ತೆರೆದಿಟ್ಟಿದ್ದರು. ಇಂಥದ್ದೊಂದು ಕಲರ್ಫುಲ್ ಕನ್ನಡ ಕಾರ್ಯಕ್ರಮ ನಡೆಸಲು ಕೇವಲ ವಿಪ್ರೊ ಕನ್ನಡಿಗರಿಂದ ಮಾತ್ರ ಸಾಧ್ಯ ಎಂಬುದು ಅಲ್ಲಿ ಸಾಬೀತಾಯಿತು.

ಸಂಸ್ಥೆಯ ಹಿರಿಯರಾದ ಸಿ.ಪಿ . ಗಂಗಾಧರಯ್ಯ , ವಿ . ಆರ್ . ವೆಂಕಟೇಶ್ ಅವರೊಂದಿಗೆ ಈ ಬಾರಿ ವಿಸ್ಮಯ ವೇದಿಕೆಯನ್ನು ಹಂಚಿಕೊಳ್ಳಲು ಆಗಮಿಸಿದ್ದ ಹಿರಿಯ ಪತ್ರಕರ್ತ ರವಿ ಬೆಳಗೆರೆ ಅಂದು ಮುಖ್ಯ ಅತಿಥಿ. ಅಂದು ಸೇರಿದ್ದ ಜನಸ್ತೋಮ ಕಂಡ ಗಂಗಾಧರಯ್ಯ ಫುಲ್ ಖುಷ್. Amphi theaterನಲ್ಲಿ ಒಂದೇ ಬಾರಿಗೆ ಅಷ್ಟೊಂದು ಕನ್ನಡಿಗರನ್ನು ಕಂಡ ವೆಂಕಟೇಶ್ ಅವರಂತೂ ಇನ್ನೂ ಖುಷ್. ಈ ವೇಳೆ ಪತ್ರಕರ್ತ ರವಿ ಬೆಳಗೆರೆ ಅವರ ಮಾತಿಗೊಂದಿಷ್ಟು ಎಲ್ಲರೂ ಕಿವಿಯಾದರು. ಅವರು ಹರಿಬಿಟ್ಟ ಪುನ್ಚಿಂಗ್ ಡೈಲಾಗ್ ಗಳಿಗೆ ನೆರೆದಿದ್ದವರೆಲ್ಲಾ ಜೋಶ್ ನಲ್ಲೆ ಚಪ್ಪಾಳೆ ತಟ್ಟಿದರು…

ಖುಷಿಯ ಅಲೆಯಲ್ಲಿ ತೇಲುತ್ತಿದ್ದ ವಿಪ್ರೊ ಕನ್ನಡಿಗರಿಗೆ ಅಚ್ಚರಿಯೊಂದು ಕಾದಿತ್ತು. ವಿಸ್ಮಯ ವೇದಿಕೆ ಮೇಲೆ ಒಮ್ಮೆಲೇ ಎಂಟ್ರಿ ಕೊಟ್ಟ ಕಿಚ್ಚ ಸುದೀಪ್ ಎಲ್ಲರ ಕಡೆಯೂ ಕೈ ಬೀಸಿದರು. ಸುದೀಪ್ ಕಾಣಿಸಿಕೊಂಡಿದ್ದೆ ತಡ, ಸಾವಿರಾರು ಮಂದಿಯ ಖುಷಿಗೆ ಪಾರವೇ ಇರಲಿಲ್ಲ. ಆ ಕ್ಷಣ ಶಿಳ್ಳೆ, ಕೇಕೆಗಳ ಅಬ್ಬರ ಮುಗಿಲು ಮುಟ್ಟಿತ್ತು

ರಘು ದೀಕ್ಷಿತ್ ಮತ್ತು ಸುದೀಪ್ ಅಂದಿನ ವಿಸ್ಮಯದ highlight. ಜಸ್ಟ್ ಮಾತಿಗಿಳಿದ ಸುದೀಪ್ ವಿಪ್ರೊ ಕುರಿತು ಮೆಚ್ಚುಗೆಪಟ್ಟರು. ವಿಸ್ಮಯದ ಕುರಿತು ಹಾಡಿ ಹೊಗಳಿದರು. ಅದೂ ಸಾಲದೆಂಬಂತೆ ವೇದಿಕೆ ಮೇಲೆ ರಘು ದೀಕ್ಷಿತ್ ಜತೆ ಹಾಡುವ ಮೂಲಕ ರಂಜಿಸಿ ಹಾಗೆಯೇ ಮರೆಯಾದರು. ಮೈಸೂರ್ ಆನಂದ್ ರವರ ವಿಚಿತ್ರ ಹಾವ ಭಾವದಿಂದ ಕೂಡಿದ ನಗೆ ಹನಿಗಳ ಮೂಲಕ ಜನರನ್ನು ಹೊಟ್ಟೆ ಹುಣ್ಣಾಗಿಸುವಂತೆ ನಗಿಸಿದರು.

ಇದೆಲ್ಲದರ ನಡುವೆ ಜೂನಿಯರ್ ವಿಷ್ಣುವರ್ಧನ್ - ವಿಸ್ಮಯಕ್ಕಾಗೆ ಕನ್ನಡದ ಮೇರು ನಟ ವಿಷ್ಣುವರ್ಧನ್ ಮತ್ತೆ ಧರೆಗಿಳಿದು ಬಂದಂತಿತ್ತು. ಹಾಡು, ಹಾಸ್ಯ ಮತ್ತು ನೃತ್ಯದಿಂದ ತುಂಬಿದ ಈ ಕಾರ್ಯಕ್ರಮವನ್ನು 5000ಕ್ಕು ಹೆಚ್ಚು ಜನ ನೋಡಿ ಆನಂದಿಸಿದರು. ಒಟ್ಟಿನಲ್ಲಿ ಅಂದಿನ ಪ್ರತಿಯೊಂದು ಕಾರ್ಯಕ್ರಮ ಅಚ್ಚುಕಟ್ಟುತನ, ಸಮಯಪ್ರಜ್ಞೆ, ಕಾರ್ಯದಕ್ಷತೆ, ಪ್ರತಿಭೆ, ಆತ್ಮೀಯತೆ ಮತ್ತು ಎಲ್ಲಕ್ಕೂ ಮಿಗಿಲಾಗಿ ಕನ್ನಡ ಪ್ರೇಮದಲ್ಲಿ ಮೆದ್ದು ಜನರ ಮನದಲ್ಲಿ ಅಚ್ಚಳಿಯದಂತೆ ಮಾಡಿತು. IT ಹುಡುಗರಲ್ಲೂ ಸಾಹಿತ್ಯದ ಅಭಿರುಚಿ ಇದೆ ಅನ್ನೋದನ್ನ ತೋರಿಸಿಕೊಟ್ಟದ್ದು ಮಲ್ಲಿಗೆ ಎಂಬ ಕನ್ನಡದ ಆಡಿಯೋ ಆಲ್ಬಮ್.

ವಿಪ್ರೋದ ಶ್ರೀಕಾಂತ್ ಚೂಡಾನಾಥ್ ಅವರ ಸಾಹಿತ್ಯದಲ್ಲಿ ಮೂಡಿಬಂದ ಮಲ್ಲಿಗೆ ಆಲ್ಬಮ್ ಅಂದು ಕಿಚ್ಚ ಸುದೀಪ್ ಕೈಯಿಂದ ಬಿಡುಗಡೆಯಾಗಿದ್ದು ಮತ್ತೊಂದು ಸ್ಪೆಷಲ್.

ಒಟ್ಟಿನಲ್ಲಿ ಬೇರೆ ಬೇರೆ ಕಂಪನಿಗಳಲ್ಲಿರುವ ಕನ್ನಡದ ಅಣ್ಣ-ತಮ್ಮಂದಿರಲ್ಲೂ ತಮ್ಮ ತಮ್ಮ ಸಂಸ್ಥೆಗಳಲ್ಲಿ ಕನ್ನಡ ನಾಡಹಬ್ಬ ಮಾಡಬೇಕೆಂಬ ಉತ್ಸಾಹ ತುಂಬುವುದರಲ್ಲಿ ಯಶಸ್ವಿಯಾಯಿತು ಎಂದರೆ ತಪ್ಪಾಗಲಾರದು.

ಆರೆಕಲ್ ನಲ್ಲಿ ನಡೆದ ಕನ್ನಡ ನಾಡ ಹಬ್ಬ 2009

2009-12-23T05:18:00.000-08:00

ನಿತ್ಯೋತ್ಸವ ತಾಯೇ ನಿನಗೆ ನಿತ್ಯೋತ್ಸವದ ಖ್ಯಾತ ಕವಿ ಡಾI. ಕೆ. ಎಸ್. ನಿಸ್ಸಾರ್ ಅಹಮದ್ ವಾಣಿಯಂತೆ ಡಿಸೆಂಬರ್ ೩, ೨೦೦೯ ರಂದು ಆರೆಕಲ್ ಲೆಕ್ಸಿಂಗ್ಟನ್ ಟವರ್ ಬೆಂಗಳೂರಿನಲ್ಲಿ ಎರಡನೇ ವರುಷವೂ ಕರ್ನಾಟಕ ರಾಜ್ಯೋತ್ಸವ ಅದ್ದೂರಿ ಯಶಸ್ಸು ಕಂಡಿತು. ಆರೆಕಲ್ ನಂತಹ ಬಹುರಾಷ್ಟ್ರೀಯ ಕಂಪನಿಗೆ ಕರ್ನಾಟಕದ ಜನಪದ ಕಲೆ ಸಂಸ್ಕೃತಿಯ ಪರಿಚಯ ಈ ವರುಷದ ಧ್ಯೇಯವಾಗಿತ್ತು. ಸಮಯದ ಅಭಾವದ ಕಾರಣ ಕೇವಲ ೨ ಗಂಟೆಗಳ ಕಾಲ ರಸಸಂಜೆ ಆಯೋಜಿಸಲಾಗಿತ್ತು.

ಹಚ್ಚೇವು ಕನ್ನಡದ ದೀಪ ಹಾಡಿನೊಂದಿಗೆ ದೀಪ ಬೆಳಗಿಸಿ ಉದ್ಘಾಟಿಸಲಾಯಿತು. ಕಾರ್ಯಕ್ರಮದ ಆರಂಭದಲ್ಲಿ ಶ್ರೀ. ರವಿಶಂಕರ್ ಅವರ ಕೊಳಲುವಾದನ ಕನ್ನಡ ಆರಾಧನೆಗೆ ಕನ್ನಡಿ ಹಿಡಿದಂತಿತ್ತು. ಕನ್ನಡದ ರವಿ ಮೂಡಿಬಂದ ಸಮೂಹಗಾಯನ ಆ ಸಂಜೆಗೆ ರಂಗೇರಿಸಿತ್ತು.

ಮಂಥರೆಯ ದುರ್ಮಂತ್ರ, ಆ ಸಂಜೆಯ ರಸದೌತಣಕ್ಕಾಗೆ ಆಯೋಜಿಸಿದ್ದ ಯಕ್ಷಗಾನ, ಸುಮಾರು ೨೦೦ ರಸಿಕರನ್ನು; ತಮ್ಮ ಕೆಲಸಗಳ ಒತ್ತಡಗಳನ್ನು ಬದಿಗೊತ್ತಿ ಗಂಧರ್ವಲೋಕದಲ್ಲಿ ತೆಲಾಡುವಂತೆ ಮಾಡಿತು.
ಮಂಥರೆಯ ದುರ್ಮಂತ್ರ ರಾಮಾಯಣದಲ್ಲಿ ಮಂಥರೆಯು ಭರತನ ತಾಯಿ ಕೈಕೇಯಿಗೆ ಚಾಡಿ ಹೇಳುವ ಪ್ರಸಂಗ. ಸರ್ವಶ್ರೀ ಮಂಟಪ ಉಪಾದ್ಯಾಯರ ಕೈಕೇಯಿ ಸ್ತ್ರೀ ವೇಷದ ಅಂದ ಚೆಂದ, ವಯ್ಯಾರದ ನಡಿಗೆ, ಹಾವ ಭಾವ ನೋಡಿ ನೆರೆದಿದ್ದ ಮಹಿಳೆಯರು ಅಸೂಯೆಪಟ್ಟು; ಉಪಾಧ್ಯಾಯರು ನಿಜವಾಗಿ ಸ್ತ್ರೀಯಲ್ಲವೆಂದು ಸಮಾಧಾನವಾದರು. ದುರ್ಮಂತ್ರ ಹೇಳಲು ಬಂದ ಯಕ್ಷಲೋಕದ ಹಾಸ್ಯ ಕಲಾವಿದರಾದ ಶ್ರೀ. ಚಪ್ಪರ್ಮನೆ ಶ್ರೀಧರ ಹೆಗ್ಡೆ ಮಂಥರೆಯಾಗಿ ಮಿಂಚಿದರು. ಅವರ ಕಲಾ ಫ್ರೌಡಿಮೆ, ಅಭಿನಯದಲ್ಲಿ ತೋರಿದ ಹಲವು ಮಜಲು, ಮುಖಭಾವ, ಹಣ್ಣು ಹಣ್ಣು ಮುದುಕಿ ಕುರೂಪಿ ಮಂಥರೆಯ ನಡೆ ಭಂಗಿ, ಕನ್ನಡ ಗಂಧವೇ ಇಲ್ಲದ ವೀಕ್ಷಕರ ಮಂತ್ರಮುಗ್ದತೆಯೇ ತುಲನೆಗೆ ಅಸಾದ್ಯವೆಂದು ಸಾರಿಹೇಳಿತ್ತು. ಸುಮಾರು ೫೦೦ - ೬೦೦ ವರುಷ ಪರಂಪರೆ ಇರುವ ಯಕ್ಷಗಾನ ಪ್ರದರ್ಶನ, ವಿವಿಧ ಭಾಷೆ, ಸಂಸ್ಕೃತಿ; ಸಭೀಕರ ಮೆಚ್ಚುಗೆಯ ಕರತಾಡನವೇ ಕಾರ್ಯಕ್ರಮದ ಯಶಸ್ಸಿಗೆ ಮುದ್ರೆಯೋತ್ತಿದಂತಿತ್ತು.

ಚಿತ್ರಗಳು:

ಇನ್ ಫೋಸಿಸ್ ಬೆಂಗಳೂರಿನಲ್ಲಿ ನಡೆದ ಕನ್ನಡ ನಾಡ ಹಬ್ಬ 2009

2009-12-06T07:43:00.000-08:00

ಇನ್ಫೋಸಿಸ್ ಬೆಂಗಳೂರಿನಲ್ಲಿ ನವೆಂಬರ್ ೧೨ ರಂದು ಕನ್ನಡ ನಾಡ ಹಬ್ಬ ನಡೆಯಿತು. ಕನ್ನಡ ಚಿತ್ರರಂಗದ ಸುವರ್ಣ ಮಹೋತ್ಸವವನ್ನು ಥೀಮ್ ಆಗಿ ಇಟ್ಟುಕೊಂಡು ನೆಡಸಿದ ಕಾರ್ಯಕ್ರಮದಲ್ಲಿ ೧೯೩೪ ರಿಂದ ಹಿಡಿದು ೨೦೦೯ ರ ವರೆಗಿನ ಎಲ್ಲ ಚಿತ್ರ ರಂಗದ ವಿಚಾರಗಳನ್ನೂ ತಿಳಿಸಲಾಯಿತು. ಹಾಡು, ಹಾಸ್ಯ ಮತ್ತು ನೃತ್ಯದಿಂದ ತುಂಬಿದ ಈ ಕಾರ್ಯಕ್ರಮವನ್ನು ೧೫೦೦ಕ್ಕು ಹೆಚ್ಚು ಜನ ನೋಡಿ ಆನಂದಿಸಿದರು.ಇನ್ಫೋಸಿಸ್ ನಲ್ಲಿ ಐದು ವರ್ಷಗಳಿಂದ ಸತತವಾಗಿ ನಡೆಯುತ್ತಿರುವ ಕನ್ನಡ ಕಲಿಯ ಬಗ್ಗೆ ಇದರಲ್ಲಿ ಮಾತನಾಡಿ ನಮ್ಮ ಕನ್ನಡ ಮೇಷ್ಟ್ರಿಗೆ ಸನ್ಮಾನಿಸಲಾಯಿತು.

ಹನಿವೆಲ್ ನಲ್ಲಿ ನಡೆದ ಕನ್ನಡ ನಾಡಹಬ್ಬ 2009

2009-12-03T21:35:00.000-08:00

ನವೆಂಬರ್ ೨೬ ರಂದು ಅದ್ಧೂರಿಯಾಗಿ ಹನಿವೆಲ್ ಸಂಸ್ಥೆಯಲ್ಲಿ ರಾಜ್ಯೋತ್ಸವವನ್ನು ಆಚರಿಸಲಾಯಿತು. ಇದೇ ಸಂದರ್ಭದಲ್ಲಿ ಇತ್ತೀಚಿಗಷ್ಟೇ ಶಿವಾಧೀನರಾದ ಗಾನ ಗಂಗೆ ಗಂಗೂ ಭಾಯಿ ಹಾನಗಲ್ ಅವರಿಗೆ ಭಾವ ಪೂರ್ಣ ಶ್ರದ್ಧಾಂಜಲಿ ಅರ್ಪಿಸಲಾಯಿತು. ಚುಟುಕು, ಪದಬಂಧದಂತಹ ಹಲವು ಸ್ಪರ್ಧೆಗಳನ್ನು ಈ ಸಂಧರ್ಭದಲ್ಲಿ ಏರ್ಪಡಿಸಲಾಗಿತ್ತು. ಖ್ಯಾತ ಸಾಹಿತಿ ಲಕ್ಷ್ಮೀನಾರಾಯಣ ಭಟ್ಟರು ಕಾರ್ಯಕ್ರಮದ ಮುಖ್ಯ ಅತಿಥಿಯಾಗಿದ್ದರು.

ಕಾರ್ಯಕ್ರಮದ ಚಿತ್ರಗಳು:

ಮ್ಯಾನ್ ಹಟ್ಟನ್ ಅಸೋಸಿಯೇಟ್ಸ್ ಅಲ್ಲಿ "ಸೆಲೆಬ್ರೇಟ್ ನಮ್ಮ ಬೆಂಗಳೂರು"

2009-12-03T01:40:00.000-08:00

ಮ್ಯಾನ್ ಹಾಟನ್ ಅಸೋಸಿಯೇಟ್ಸ್ ಕಂಪನಿಯಲ್ಲಿ ರಾಜ್ಯೋತ್ಸವದ ಪ್ರಯುಕ್ತ "ಸೆಲೆಬ್ರೇಟ್ ನಮ್ಮ ಬೆಂಗಳೂರು " ಅನ್ನುವ ವಿಶೇಷ ದಿನ ಆಚರಿಸಲಾಯಿತು. ಕರ್ನಾಟಕದ ವಿಶೇಷ ಅಡುಗೆ ಅಂದಿನ ವಿಶೇಷವಾಗಿತ್ತು. ಸತೀಶ್ ಗೋವಿಂದನ್ ಅವರ ಕರೋವಾಕೆ, ಬೆಂಗಳೂರಿನ ಬಗ್ಗೆ ರಸ ಪ್ರಶ್ನೆ, ಬೆಂಗಳೂರು-ಕರ್ನಾಟಕದ ಬಗ್ಗೆ ವಿಶೇಷ ಪ್ರಾತ್ಯಕ್ಷಿತೆ ಅಂದಿನ ವಿಶೇಷವಾಗಿತ್ತು.

ಕಾರ್ಯಕ್ರಮದ ಪಟ್ಟಿಯ ಚಿತ್ರ ಇಂತಿದೆ:

ಮೈಂಡ್ ಟೆಕ್ ನಲ್ಲಿ ನಡೆದ ಕನ್ನಡ ನಾಡ ಹಬ್ಬ 2009

2009-12-02T03:30:00.000-08:00

ಮೈಂಡ್ ಟೆಕ್ ನಲ್ಲಿ ಪ್ರತಿ ವರ್ಷವೂ ಆಚರಿಸುವಂತೆ ಈ ವರ್ಷವೂ ಕನ್ನಡ ರಾಜ್ಯೋತ್ಸವವನ್ನು ನವೆಂಬರ್ 6 ರಂದು ಆಚರಿಸಲಾಯಿತು . ಉತ್ತರ ಕರ್ನಾಟಕದಲ್ಲಿ ನೆರೆ ಹಾವಳಿಯಲ್ಲಿ ಜನರು ಸಂಕಷ್ಟಕ್ಕೆ ಒಳಗಾದ ಕಾರಣ ಈ ಸಲ ಆಚರಣೆ ಸರಳವಾಗಿತ್ತು. ಇದು 4 ನೇ ವರ್ಷದ ಆಚರಣೆ.

1. ಬೆಳಿಗ್ಗೆ 10:00 ಗಂಟೆಗೆ ಎಲ್ಲರು ಆಚರಣೆಗೆ ಸೇರಿದೆವು .

2. ಕಂಪನಿಯ ಗಣ್ಯರು ಆಗಮಿಸಿದರು. ಅವರಿಂದ ದೀಪ ಬೆಳಗಿಸಿದೆವು .

3. ಹಚ್ಚೇವು ಕನ್ನಡದ ದೀಪ ಹಾಡನ್ನು ಹಾಡಿದೆವು .

4. ಕಾರ್ಯಕ್ರಮ ನಿರೂಪಣೆ ಜವಾಬ್ದಾರಿಯನ್ನು ವಿನಯ್ ಮಠರವರು ವಹಿಸಿಕೊಂಡು ಚೆನ್ನಾಗಿ ನಡೆಸಿಕೊಟ್ಟರು .

5. ನಂತರ ನಾಡಗೀತೆ - ಜಯ ಭಾರತ ಜನನಿಯ ತನುಜಾತೆ ಜಯಹೇ ಕರ್ನಾಟಕ ಮಾತೆ ಹಾಡಲಾಯಿತು .

6. ಕನ್ನಡ ನಾಡು, ನುಡಿ ಹಾಗೂ ಜನರ ಬಗ್ಗೆ ವಿನಯ್ ಮಾತನಾಡಿದರು .

7. ಗಣ್ಯರು ಕೂಡ ಕನ್ನಡದ ಬಗ್ಗೆ ಅವರಿಗಿರುವ ಅಭಿಪ್ರಾಯವನ್ನು ಹೇಳಿದರು.

8. ಪ್ರತಿ ವರ್ಷ ಆಚರಣೆಯ ಸಂದರ್ಭದಲ್ಲಿ ಕರ್ನಾಟಕದ ವಿವಿಧ ಭಾಗಗಳ ಸಿಹಿ ತಿಂಡಿಯನ್ನು ಎಲ್ಲ ಉದ್ಯೋಗಿಗಳಿಗೆ ಹಂಚುವುದರ ಮೂಲಕ ಅದರ ಪರಿಚಯ. ಇದು ಮೈಂಡ್ ಟೆಕ್ ಕನ್ನಡ ರಾಜ್ಯೋತ್ಸವದ ವಿಶೇಷ . ಈ ವರ್ಷ ಬೆಳಗಾವಿಯ "ಕರದಂಟ್ ಸಿಹಿ " ಹಂಚಿದೆವು .

9. ಕೆಲವರು ಸಮಾಜ ಸೇವಕ ಸಂಘದ ಕನ್ನಡ ಪದ್ಯವುಳ್ಳ ಟಿ- ಶರ್ಟ್ ಧರಿಸಿದ್ದರು.

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಸಿಂಫೋನಿ ಸರ್ವಿಸಸ್ ನಲ್ಲಿ ನಡೆದ ಕನ್ನಡ ನಾಡ ಹಬ್ಬ 2009

2009-12-01T04:11:00.000-08:00

SAP ಲ್ಯಾಬ್ಸ್ ಅಲ್ಲಿ ನಡೆದ ಕನ್ನಡ ನಾಡ ಹಬ್ಬ 2009

2009-11-30T05:31:00.000-08:00

೬-೧೧-೨೦೦೯ ಶುಕ್ರವಾರದಂದು ಎಸ್ ಏ ಪಿ ಲಾಬ್ಸ್ ಅಂಗಳದಲ್ಲೆಲ್ಲ ಹಬ್ಬದ ವಾತಾವರಣ. ಬೆಳ್ಳಂ-ಬೆಳಿಗ್ಗೆ ೭.೫೦ ರಿಂದಲೇ ಜನರ ಸಡಗರ ಶುರುವಾಗಿತ್ತು. ಚಮಕ್-ಧಮಕ್ ಆಗಿ ತಯಾರಾಗಿ ಬಂದ ಆಸಕ್ತರೆಲ್ಲರೂ ಧ್ವಜಾರೋಹಣ ಕಾರ್ಯಕ್ರಮಕ್ಕೆ ಸಜ್ಜಾಗಿದ್ದರು. ಅಜಯ್ ರಾವ್, ಅರುಣ್ ಆರ್, ಚಂದನ್, ಅನುಪಮ ಅವರುಗಳಿಂದ ರಿಸೆಪ್ಶನ್ ಬ್ಲಾಕ್ ಪಕ್ಕದಲ್ಲಿ ನಾಡ ಗೀತೆಯೊಂದಿಗೆ ಧ್ವಜಾರೋಹಣ ಕಾರ್ಯಕ್ರಮ ನೆರವೇರಿತು. ನೆರೆದವರಿಗೆಲ್ಲರಿಗೂ ಮೈಸೂರ್-ಪಾಕ್ ಹಂಚಲಾಯಿತು.

ಮಧ್ಯಾಹ್ನ ಸುಮಾರು ೩.೧೫ ಘಂಟೆಗೆ ಊಟದ ನಂತರದ ಅರೆ ನಿದ್ದೆಯಲ್ಲಿದ್ದವರನ್ನೆಲ್ಲ ಎಚ್ಚರ ಗೊಳಿಸುವಂತೆ "ಜಾನಪದ ಲೋಕ(ರಾಮ ನಗರ) ದಿಂದ ಬಂದಿದ್ದ ಡೊಳ್ಳು-ಕುಣಿತ ಹಾಗು ಕಂಸಾಳೆ ತಂಡದವರ ಕಾಂಪಸ್-ಪ್ರದಕ್ಷಿಣೆ ಆರಂಭಗೊಳ್ಳುವಂತೆಯೇ ಅನೇಕರು ಅವರ ಜೊತೆ-ಜೊತೆಯಲ್ಲಿಯೇ ಹೆಜ್ಜೆ ಹಾಕುತ್ತಾ ಕುಣಿದು-ಕುಪ್ಪಳಿಸಿದರು.

೩.೩೦ ರ ಹೊತ್ತಿಗೆ ಸಭಾಂಗಣದಲ್ಲಿ ತುಂಬು ಪ್ರೇಕ್ಷಕರು ಕಾರ್ಯಕ್ರಮದ ಆರಂಭಕ್ಕೆ ಕುತೂಹಲದಿಂದ ಕಾದಿದ್ದರು. ಊರ ಜಾತ್ರೆಯನ್ನು ನೆನಪು ಮಾಡುವಂತೆ ತಾಯಿ ಭುವನೇಶ್ವರಿಯ ಪಲ್ಲಕ್ಕಿ ವೇದ-ಘೋಷ, ಕೋಲಾಟ ಇತ್ಯಾದಿಗಳೊಂದಿಗೆ ಮೆರವಣಿಗೆಯಾಯಿತು. ಕಾರ್ಯಕ್ರಮದ ಸೂತ್ರಧಾರಿಗಳೂ ನಿರೂಪಕರಾದ ಗೋವಿಂದ್ ದಾಮೋದರ್ ಹಾಗೂ ಶರ್ಮಿಳಾ.ಎಸ್ ಹಾಗೂ ಸುಮೀತ್ ಮೂವರೂ ಜನರನ್ನು ಸ್ವಾಗತಿಸಿದರು. ಮುಖ್ಯ ಅತಿಥಿಗಳಾದ ಅರುಣ್ ಶಂಕರ್, ಅಜಯ ರಾವ್, ವಸುಧೇಂದ್ರ ರಾವ್ ಅವರುಗಳು ಕಾರ್ಯಕ್ರಮವನ್ನು ದೀಪ ಬೆಳಗುವುದರ ಮೂಲಕ ಆರಂಭಿಸಿದರು. ನಂತರ "ಗೆಳೆಯರ ಬಳಗದ" ಕಿರು ಪರಿಚಯವನ್ನು ಅರುಣ್ ಆರ್ ನೀಡಿದರು.

ಜೆನಿಸಿಸ್ ಕಂಪನಿಯ ಉದ್ಯೋಗಿ ಹಾಗು ಪ್ರಖ್ಯಾತ ಕನ್ನಡ ಬರಹಗಾರರಾದ ವಸುಧೇಂದ್ರ ಅವರು "ಭಾಷೆ-ತಾಯ್ನಾಡಿನ" ಮೋಹ ಹಾಗೂ ಅಭಿಮಾನಗಳ ಕುರಿತು ಪುರಾಣ-ಪುಣ್ಯಕಥೆಗಳ ಹೋಲಿಕೆಗಳೊಂದಿಗೆ ಅದ್ಭುತವಾದ ವಿವರಣೆಯನ್ನು ಸಭೆಗೆ ನೀಡಿದರು. ಶಿಲ್ಪ ಕೆ ಅವರು ತಮ್ಮ ಭೀಮನನ್ನು ಕುರಿತು ಅಪರೂಪದ ದೇವರನಾಮದೊಂದಿಗೆ ಜನರ ಕಿವಿಗಳನ್ನು ಇಂಪುಗೊಳಿಸಿದರು. ಜಾನಪದ ನ್ರುತ್ಯಗಳಲ್ಲಿ ಬಹಳ ಖ್ಯಾತಿಯನ್ನು ಹೊಂದಿದ ಕಂಸಾಳೆ ನೃತ್ಯ ಶುರುವಾಗುತ್ತಲೇ ಜನರು ಕೂತು ಕೂತಲ್ಲಿಯೇ ಕಾಲು ಕುಣಿಸಿದ್ದರು. ಹಳೆ ನೆನಪುಗಳನ್ನು ತಾಜಾ ಗೊಳಿಸಲು ಸೌಮ್ಯಶ್ರೀ ತಂಡದವರು ಆಯ್ದ ೩ ಹಳೇ ಕನ್ನಡ ಚಿತ್ರ ಗೀತೆಗಳನ್ನು ಕೂಡಿಸಿ ಗಿಲಿ ಗಿಲಿ ಗಿಲಕ್ಕು ಹಾಡಿನೊಂದಿಗೆ ತಮ್ಮ ನೃತ್ಯವನ್ನು ಅಂತ್ಯಗೊಳಿಸಿದರು.

ವೃಂದ-ಗಾನ ತಂಡದವರು ಕನ್ನಡದ ಕವಿಗಳಿಗೆ ಗೌರವ ಸೂಚಿತವಾಗಿ ೭ ಖ್ಯಾತ ಭಾವಗೀತೆಗಳನ್ನು ಒಗ್ಗೂಡಿಸಿ ಮೆಡ್ಲಿ ರೂಪದಲ್ಲಿ ಪ್ರಸ್ತುತಗೊಳಿಸಿದರು. ವೇದಿಕೆಯ ಹಿಮ್ಮೇಳದಲ್ಲಿ ಆಯಾ ಕವಿಗಳನ್ನು ಕುರಿತು ಸಣ್ಣ ಮಾಹಿತಿಗಳನ್ನೂ ಪ್ರೊಜೆಕ್ಟರ್ ಮೂಲಕ ಪ್ರದರ್ಶಿಸಲಾಗಿತ್ತು. ನಾವಿದ್ದ ಸ್ಥಳದ ಭಾಷೆ ಬಾರದಿದ್ದಾಗ ಆಗುವ ಅನರ್ಥಗಳು ಹಾಗು ಅನಾನುಕೂಲಗಳನ್ನು ಕುರಿತು ಹರ್ಷ ಹಾಗು ತಂಡದವರಿಂದ ಸಣ್ಣ ನಾಟಕ ಪ್ರದರ್ಶನವಾಯಿತು. ಜನರನ್ನು ಜಾಗರೂಕವಾಗಿ ರಂಜಿಸುವಲ್ಲಿ ಈ ತಂಡ ಗೆದ್ದಿತ್ತು. ಕಾರ್ಯಕ್ರಮದ ಮುನ್ನ ಏರ್ಪಡಿಸಲಾಗಿದ್ದ ೪ ಸ್ಪರ್ಧೆಗಳ ಬಹುಮಾನ ವಿತರಣೆಯನ್ನು ಲೋಪಮುದ್ರ ಅವರು ನೆರ‍ವೇರಿಸಿಕೊಟ್ಟರು. ವಿಜೇತರಿಗೆಲ್ಲ ಶುಭ ಕೋರುತ್ತ ಜಾತ್ರೆ-ಕಾರ್ಯಕ್ರಮ ಮುಂದುವರೆಯಿತು.

ನಗಿಸಿತ್ತಲೇ ಜನರನ್ನು ಜಾಗ್ರುತಗೊಳಿಸುವ ಕೆಲಸದ ಜವಾಬ್ದಾರಿ ಹೊತ್ತ "ಮ್ಯಾಡ್ ಆಡ್ಸ್" ತಂಡದವರು ೩ ತುಣುಕುಗಳ ಮೂಲಕ ಜನರನ್ನು ಹೊಟ್ಟೆ ಹುಣ್ಣಾಗಿಸುವಂತೆ ನಗಿಸಿದರು. ಪ್ರವಾಹ-ಪೀಡಿತರ ಸಹಾಯದ ಚಿಕ್ಕದಾದ ಚೊಕ್ಕದಾದ ಮಾಹಿತಿಯೊಂದಿಗೆ ತಮ್ಮ ಪ್ರಸ್ತುತಿಯನ್ನು ಮುಗಿಸಿದರು. ವರುಣನ ಶಾಂತ-ರೌದ್ರ ರೂಪಗಳನ್ನು ಕುರಿತು "ಕಂಟೆಂಪೊರರಿ ನೃತ್ಯ" ಪ್ರದರ್ಶಿಸಲಾಯಿತು. ಮನುಷ್ಯನು ತಾನೂ ಬದುಕಿ ಇನ್ನೊಬ್ಬರಿಗೂ ಬದುಕಲು ಬಿಟ್ಟರೆ ಪ್ರಕೃತಿ-ವಿಕೋಪಗಳು ಸಂಭವಿಸವು ಎಂಬ ಸೂಚನೆಯೊಂದಿಗೆ ನೃತ್ಯ ಕೊನೆಗೊಂಡಿತು.

ಇತ್ತೀಚೆಗಾದ ಪ್ರವಾಹದಿಂದ ತೊಂದರೆಗೊಳಗಾದ ಸ್ಥಳಗಳಲ್ಲೊಂದಾಗ ರಾಯಚೂರು ಜಿಲ್ಲೆಯ ಚಿಕ್ಕಸಗೂರು ಗ್ರಾಮ ಗೆಳೆಯರ ಬಳಗದ ಭೇಟಿಯನ್ನು ಕುರಿತು ಒಂದು ಸಣ್ಣ ಮಾಹಿತಿ ಅಶೋಕ್ ಕುಮಾರ್ ರವರು ನೀಡಿದರು. ನಂತರ ಅನುಪಮ-ಅರ್ಚನ ತಂಡದವರಿಂದ ಕರ್ನಾಟಕದ ವಿವಿಧ ಭಾಗಗಳಲ್ಲಿನ ಉಡುಗೆ ತೊಡುಗೆಗಳನ್ನು ಪ್ರದರ್ಶಿಸಲಾಯಿತು. ಆಯಾ ಭಾಗದ ವೈಶಿಷ್ಠ್ಯಗಳನ್ನು ಕೂಡಾ ವೇದಿಕೆಯ ಮೇಲೆ ಪ್ರದರ್ಶಿಸಲಾಗಿತ್ತು. ಹಿನ್ನೆಲೆಯಲ್ಲಿ ಆಯಾ ಭಾಗಗಳ ಕುರಿತು ಸಣ್ಣ ಮಾಹಿತಿಗಳನ್ನು ಹಾಗೂ ಅಲ್ಲಿಯ ಮೂಲದ ಪ್ರಖ್ಯಾತ ವ್ಯಕ್ತಿಗಳ ಮಾಹಿತಿಯನ್ನೂ ನೀಡಲಾಗಿತ್ತು. ಸಣ್ಣ ವಂದನಾರ್ಪಣೆಯ ನಂತರ "ಸಂತೋಷಕ್ಕೆ" ಹಾಗೂ "ಒಂದು ಕನಸು" ಹಾಡುಗಳ ನೃತ್ಯದೊಂದಿಗೆ ಕಾರ್ಯಕ್ರಮ ಕೊನೆಗೊಂಡಿತು.

ಚಿತ್ರಗಳು:

ಅಲ್ಕಾಟೆಲ್ ಲುಸೆಂಟ್ ನಲ್ಲಿ ನಡೆದ ಕನ್ನಡ ನಾಡ ಹಬ್ಬ 2009

2009-11-27T07:01:00.000-08:00

ನವೆಂಬರ್ ೧೨, ಗುರುವಾರದಂದು, ನಮ್ಮ ಅಲ್ಕಟೆಲ್-ಲ್ಯೂಸೆಂಟ್ ನಲ್ಲಿ, "ಶ್ರೀಗಂಧ ಕನ್ನಡ ಬಳಗ" ದ ನೇತೃತ್ವದಲ್ಲಿ "ಕನ್ನಡ ರಾಜ್ಯೋತ್ಸವ" ಸಮಾರಂಭವನ್ನು ಹಮ್ಮಿಕೊಂಡಿದ್ದೆವು. ಅಂದು ಎಲ್ಲೆಲ್ಲೂ ಹಬ್ಬದ ವಾತಾವರಣ. ಬೆಳಿಗ್ಗೆ ಎಲ್ಲರನ್ನೂ ಮೊದಲು ಸ್ವಾಗತಿಸಿದ್ದು ಮಾವಿನ ತೋರಣಗಳು, ಹೂವಿನ ಗುಚ್ಛಗಳು, ದೀಪಾಲಂಕೃತವಾಗಿ ನಿಂತಿದ್ದ ಕನ್ನಡಾಂಬೆ ಹಾಗೂ ಕರ್ನಾಟಕದ ಭೂಪಟ ಮತ್ತು ಬಾವುಟಗಳನ್ನೊಳಗೊಂಡ ಸುಂದರ ರಂಗೋಲಿ. ಅದಕ್ಕೆ ಪೂರಕವಾಗಿ ನಮ್ಮ ನಾಡಿನ ಸಂಸ್ಕೃತಿಯ ಪ್ರತೀಕವೆಂಬಂತೆ ಅಲ್ಲಿಯೇ ಪಕ್ಕದಲ್ಲಿ ಹೆಮ್ಮೆಯಿಂದ ನಿಂತಿತ್ತು ಮೈಸೂರಿನ ಅರಮನೆ ಮತ್ತು ಜಂಬೂಸವಾರಿ.

ಕಾರ್ಯಕ್ರಮವನ್ನು ಕೇವಲ ಕನ್ನಡಿಗರನ್ನು ಮಾತ್ರವಲ್ಲದೇ, ಕನ್ನಡೇತರರ ಸಹೋದ್ಯೋಗಿಗಳನ್ನೂ ಸೇರಿಸಿಕೊಂಡು ಯೋಜಿಸಲಾಗಿತ್ತು. ಹಲವು ದಿನಗಳಿಂದ ಸಹೋದ್ಯೋಗಿಗಳನ್ನು ಕುತೂಹಲಕ್ಕೀಡು ಮಾಡಿದ್ದ ಆಹ್ವಾನ ಫಲಕ, ಎಲ್ಲರೂ ತಮ್ಮದೇ ರೀತಿಯಲ್ಲಿ ಹಬ್ಬಕ್ಕೆ ಅಣಿಯಾಗಲು ಅನುವು ಮಾಡಿಕೊಟ್ಟಿತ್ತು. ಬಹಳಷ್ಟು ಜನ ವಿಶೇಷವಾದ ಸಾಂಸ್ಕೃತಿಕ ಉಡುಗೆ-ತೊಡುಗೆಗಳಲ್ಲಿ ವಿಜೃಂಭಿಸಿ ಬಣ್ಣದ ಲೋಕವನ್ನು ತೆರೆದಿಟ್ಟಿದ್ದರು.

ದಿನ ಪೂರ್ತಿ, ಉಪಹಾರ ಮಂದಿರದಲ್ಲಿ ಕನ್ನಡದ ಸುಮಧುರ ಹಾಡುಗಳು, ಕನ್ನಡದ ಬಗೆಗಿನ ದೃಶ್ಯಾವಳಿಗಳು ಜನಮನ ತಣಿಸಿತ್ತು. ಟೋಟಲ್ ಕನ್ನಡ.ಕಾಂ ನವರ ಸಹಕಾರದೊಂದಿಗೆ ಹಮ್ಮಿಕೊಳ್ಳಲಾಗಿದ್ದ ಕನ್ನಡ ಭಾಷೆ, ಸಾಹಿತ್ಯ, ಚಲನಚಿತ್ರಗಳಿಗೆ ಸಂಬಂಧಪಟ್ಟ ಪುಸ್ತಕಗಳು, ಹಾಡಿನ ಮುದ್ರಿಕೆಗಳು ಹಾಗೂ ಇನ್ನಿತರ ವಸ್ತುಗಳ ಪ್ರದರ್ಶನ ಕನ್ನಡಿಗರನ್ನು ಸೆರೆಹಿಡಿದರೆ, ಪ್ರವಾಸೋದ್ಯಮ ಇಲಾಖೆಯ ಕೈಪಿಡಿಗಳ ಮೂಲಕ ಪ್ರವಾಸಿ ಸ್ಥಳಗಳ ಮಾಹಿತಿ, ಕನ್ನಡೇತರ ಮಿತ್ರರ ಆಸಕ್ತಿ ಕೆರಳಿಸಿತ್ತು.

ಅಂದುಕೊಂಡಂತೆ, ಸಂಜೆ ೪ ಗಂಟೆಗೆ ಸರಿಯಾಗಿ ಕಾರ್ಯಕ್ರಮವನ್ನು ಪ್ರಾರಂಭಿಸುವ ಹೊತ್ತಿಗೆ, ನಿರೀಕ್ಷೆಗೂ ಮೀರಿ ಕಿಕ್ಕಿರಿದು ಸೇರಿದ್ದ ಕನ್ನಡ ಪ್ರೇಮಿಗಳನ್ನು ನೋಡಿ ಹೃದಯ ತುಂಬಿಬಂದಿತ್ತು. ನಮ್ಮ ಕಛೇರಿಯ ಮುಖ್ಯಸ್ಥೆ ಶ್ರೀಮತಿ ಚಿತ್ರಾ ಕಸ್ತೂರಿಯವರು ಸಾಂಪ್ರದಾಯಿಕವಾಗಿ ದೀಪ ಬೆಳಗುತ್ತಿದ್ದರೆ, ಹಿನ್ನೆಯಲ್ಲಿ "ಹಚ್ಚೇವು ಕನ್ನಡ ದೀಪ" ದ ನೃತ್ಯ ಮತ್ತು ಹಾಡು ಮೇಳೈಸುತ್ತಿತ್ತು.

ಬಳಗದ ಪರಿಚಯ ಮತ್ತು ಅದರ ಧ್ಯೇಯೋದ್ದೇಶಗಳ ಬಗೆಗಿನ ನಿರೂಪಣೆ, ಬಳಗದ ಬಗೆಗೆ ಗೌರವ ಮತ್ತು ಆತ್ಮೀಯತೆಯನ್ನು ಮೂಡಿಸಿತು. ಪೂರ್ವಭಾವಿಯಾಗಿ ನಡೆಸಲ್ಪಟ್ಟ, ನಮ್ಮ ಶಾಲಾದಿನಗಳನ್ನು ನೆನಪಿಸುವಂಥ ಪ್ರಬಂಧ ಸ್ಪರ್ಧೆ, ಆಶುಭಾಷಣ ಸ್ಪರ್ಧೆ ಮತ್ತು ಚಿತ್ರವಿನ್ಯಾಸ ಸ್ಪರ್ಧೆಗಳ ವಿಜೇತರಿಗೆ ಪುಸ್ತಕಗಳು, ಮುದ್ರಿಕೆಗಳ ರೂಪದಲ್ಲಿ ಬಹುಮಾನ ವಿತರಿಸಲಾಯಿತು.

ನಂತರ, ದೀಪಾವಳಿಯ ನಭದಲ್ಲಿ ಒಂದಾದರೊಂದಂತೆ ಅಪ್ಪಳಿಸುವ ಹೂಬಾಣಗಳಂತೆ, ಬಣ್ಣ-ಬಣ್ಣದ ರಂಜನೀಯ ಕಾರ್ಯಕ್ರಮಗಳು ಸಭಿಕರನ್ನು ಕಾಲದ ಪರಿವಿರದಂತೆ ಹಿಡಿದಿಟ್ಟವು. ಭಾವಗೀತೆ, ವಿಶೇಷ ವಾದ್ಯಸಂಗೀತ, ಚಿತ್ರಗೀತೆ, ನಗೆ ನಾಟಕ, ಯಕ್ಷಗಾನದ ಹಾಡು, ಅರ್ಜುನ - ಬಬ್ರುವಾಹನರ ವೀರಾವೇಶ, ಸಮೂಹಗಾನ, ರತ್ನನ ಪದಗಳ ಕುಡುಕನ ಕನ್ನಡಾಭಿಮಾನವನ್ನು ಆಹಾವಹಿಸಿಕೊಂಡ ಕಿರು ನಾಟಕ, ನಾಡಗೀತೆ ಹಾಗೂ ಹಲವು ಕನ್ನಡ ಚಿತ್ರಗೀತೆಗಳ ಸಮೂಹ ನೃತ್ಯ ಕಿವಿ-ಕಣ್ಣಿಗಾದರೆ, ಕಾಯಿ ಹೋಳಿಗೆ, ಬೆಳಗಾವಿ ಕುಂದ, ಅವಲಕ್ಕಿ ಖಾರ ನಾಲಿಗೆಯನ್ನು ತಣಿಸಿದವು.

ಈ ವಿನೋದಾವಳಿಗಳ ಮಧ್ಯೆ ಕನ್ನಡಿಗರಿಗೆ, ಕನ್ನಡೇತರರಿಗೆ ನಮ್ಮ ಸಂಸ್ಕೃತಿಯನ್ನು ಪರಿಚಯಿಸಿಕೊಡುವಂತಹ ರಸಪ್ರಶ್ನೆಗಳು ಅಣುಬಾಂಬ್ ಗಳಂತೆ ಸಿಡಿಯುತ್ತಾ ಎಲ್ಲರ ಜ್ಞಾನವನ್ನು ಒರೆಗೆ ಹಚ್ಚಿದವು. ಕಾರ್ಯಕ್ರಮದ ಕೊನೆಗೆ ನಾಡಗೀತೆಯನ್ನು ಹಾಡುತ್ತಿದ್ದಂತೆ, ಸಭಿಕರೆಲ್ಲರೂ ಎದ್ದು ನಿಂತು ಗೌರವ ಸೂಚಿಸಿದಾಗ ಎಲ್ಲರ ಮೈಯಲ್ಲೂ ಮಿಂಚು ಹರಿದ ಭಾವ.

ಒಟ್ಟಿನಲ್ಲಿ ಅಂದಿನ ಪ್ರತಿಯೊಂದು ಕಾರ್ಯಕ್ರಮ ಅಚ್ಚುಕಟ್ಟುತನ, ಸಮಯಪ್ರಜ್ಞೆ, ಕಾರ್ಯದಕ್ಷತೆ, ಪ್ರತಿಭೆ, ಆತ್ಮೀಯತೆ ಮತ್ತು ಎಲ್ಲಕ್ಕೂ ಮಿಗಿಲಾಗಿ ಕನ್ನಡ ಪ್ರೇಮದಲ್ಲಿ ಮೆದ್ದು ಜನರ ಮನದಲ್ಲಿ ಅಚ್ಚಳಿಯದಂತೆ ಮಾಡಿತು.

ಸಂಭ್ರಮದ ಹಲವು ಚಿತ್ರಗಳು ಇಲ್ಲಿವೆ:

ಹೆಚ್ಚಿನ ಚಿತ್ರಗಳು ಇಲ್ಲಿವೆ:

http://picasaweb.google.com/shrigandhakannadabalaga/KannadaRajyothsava2009ALU#

ದೃಶ್ಯಗಳು:

http://www.youtube.com/user/shrigandhaALU

ಟಿ.ಸಿ.ಎಸ್ ನಲ್ಲಿ ಕನ್ನಡ ನಾಡಹಬ್ಬ 2009

2009-11-26T09:30:00.000-08:00

ಟಿ.ಸಿ.ಎಸ್ ಬೆಂಗಳೂರಿನ ಆಫೀಸ್ ನಲ್ಲಿ ಅದ್ಧೂರಿಯಾಗಿ ನಡೆದ ೨೦೦೯ರ ಕನ್ನಡ ನಾಡ ಹಬ್ಬದ ಕೆಲವು ಚಿತ್ರಗಳು ಇಲ್ಲಿವೆ.
ಕಾರ್ಯಕ್ರಮಕ್ಕೆ ಅತಿಥಿಯಾಗಿ ಖ್ಯಾತ ನಿರ್ದೇಶಕ, ಮುಂಗಾರು ಮಳೆ, ಗಾಳಿಪಟ, ಮನಸಾರೆ ಚಿತ್ರದ ರೂವಾರಿ ಯೋಗರಾಜ್ ಭಟ್ ಆಗಮಿಸಿದ್ದು ವಿಶೇಷವಾಗಿತ್ತು.

ಟಿ.ಸಿ.ಎಸ್ ನಾಡಹಬ್ಬ

2009-02-11T09:03:00.000-08:00

ಕನ್ನಡ ರಾಜ್ಯೋತ್ಸವ ೨೦೦೮ ಆಚರಣೆ @ ಎಲ್-ಸೆ೦ಟರ್ BOA -TCS ಬೆ೦ಗಳೂರು

ಹಿ೦ದಿನ ಸ೦ಸ್ಕೃತಿಯನ್ನು ಎತ್ತಿ ಹಿಡಿಯುತ್ತ, TCS ನ BOA ODC ಬೆ೦ಗಳೂರಿನಲ್ಲಿ ನವೆ೦ಬರ್ ೨೦೦೮ ರಂದು ಕನ್ನಡ ರಾಜ್ಯೋತ್ಸವವನ್ನು ಆಚರಿಸಿದರು. ಸು೦ದರವಾದ ಬೆಳಗಿನ ಜಾವದಲ್ಲಿ ಎಲ್ಲರೂ ಸಭಾ೦ಗಣದಲ್ಲಿ ಸೇರಿ ಒಬ್ಬರನ್ನೊಬ್ಬರು ಅಭಿನ೦ದಿಸಿದರು. ಆ ದಿನವು ಸಾ೦ಸ್ಕೃತಿಕ ದಿನವೆ೦ದು ಘೋಷಿಸಲಾಗಿದ್ದರಿ೦ದ, ರ೦ಗು ರ೦ಗಿನ ಉಡುಪುಗಳನ್ನು ತೊಟ್ಟಿದ್ದ ಸಭಿಕರು ಕಾರ್ಯಕ್ರಮಕ್ಕೆ ಇನ್ನಷ್ಟು ಮೆರುಗನ್ನೂ, ಕಳೆಯನ್ನೂ ತು೦ಬಿದರು.

ಕಾರ್ಯಕ್ರಮವು ಅ೦ದುಕೊ೦ಡ ರೀತಿಯಲ್ಲಿ ದೀಪಹಚ್ಚುವ ಮೂಲಕ ಪ್ರಾರ೦ಭಿಸಿ ನ೦ತರ 'ಹಚ್ಚೇವು ಕನ್ನಡದ ದೀಪ' ಎ೦ಬ ಸಾಮೂಹಿಕ ಗೀತೆಯನ್ನು ಹಾಡಲಾಯಿತು. ಆನಂತರ, ನಮ್ಮ ಸಹೋದ್ಯೋಗಿಗಳು ನಡೆಸಿದ 'ಕರ್ನಾಟಕದ ಗತ ವೈಭವವನ್ನು' ಎ೦ಬ ಅ೦ಕಣವು ಹೃದಯ ತು೦ಬಿಬರುವ ಹಾಗೆ ಇತ್ತು. ಪರದೆಯ ಮೇಲೆ ಕ೦ಡುಬ೦ದ ಕರ್ನಾಟಕದ ಗತ ಇತಿಹಾಸದ ಚಿತ್ರಗಳನ್ನು ನೋಡಿ ಮೈ ಜು೦ ಎನ್ನುವ ಅನುಭವ ಕೊಟ್ಟಿತು. ಇದು ನಮ್ಮನ್ನು ಬೇರೆಯೇ ಲೋಕಕ್ಕೆ ಕೊ೦ಡೊಯ್ದು, ನಾವು ಇ೦ತಹ ಆಕರ್ಷಕ ಮತ್ತು ಪವಿತ್ರ ಭೂಮಿಯ ಅ೦ಗ ಎ೦ದು ತಿಳಿದು ಹೆಮ್ಮೆಯು೦ಟಾಯಿತು.

ರಾಜ ಮಹಾರಾಜರುಗಳಿ೦ದ ನಿರ್ಮಿತವಾದ ಶಿಲ್ಪ ಕಾಲಕೃತಿಗಳು, ದೇವಸ್ಥಾನಗಳು ಮತ್ತು ಗವಿ ಗುಹೆಗಳು ಮನಸೂರೆಗೊ೦ಡಿತು ಮತ್ತು ಮಹಾರಾಜರುಗಳಿ೦ದ ನಿರ್ಮಿತವಾದ ಅತಿಸು೦ದರ ಶಿಲ್ಪಕಲೆಯನ್ನು ಕ೦ಡು ಪರಮಾನ೦ದವಾಯಿತು. ಪ್ರದರ್ಶನವು ಹೇಳತೀರದಷ್ಟು ಆಕರ್ಷಕವಾಗಿದ್ದರಿ೦ದ ಮೊದಲ ಅರ್ಧಗ೦ಟೆ ಕಾಲವು ಕಳೆದಿದ್ಡೇ ತಿಳಿಯಲಿಲ್ಲ. ನ೦ತರ ನಡೆದ ಬೆಸುಗೆ ಕುಣಿತ (Fusion Dance) ಕಾರ್ಯಕ್ರಮವು ಎಲ್ಲರನ್ನೂ ಕುಣಿಯಲು ಪ್ರೇರೇಪಿಸುವ೦ತೆ ಇತ್ತು.

BOA ಸಹೋದ್ಯೋಗಿಗಳ ಸಾಮಾನ್ಯ ಜ್ಞಾನವನ್ನು ನುರಿತಗೊಳಿಸುವ ಒ೦ದು ಸಣ್ಣ ಪ್ರಯತ್ನದಲ್ಲಿ ರಸಪ್ರಶ್ನೆ ಕಾರ್ಯಕ್ರಮನ್ನು ನಡೆಸಿ ಕರ್ನಾಟಕದ ಬಗೆಗಿನ ಪ್ರಶ್ನೆಗಳನ್ನು ನೆರೆದಿರುವವರಿಗೆ ಕೇಳಲಾಯಿತು. ಸರಿಯಾದ ಉತ್ತರಕೊಟ್ಟ ಸಹೋದ್ಯೋಗಿಗಳಿಗೆ ಬಹುಮಾನ ವಿತರಣೆ ಮಾಡಲಾಯಿತು. ಇಬ್ಬರು ಪರಭಾಷಿಕ ಸಹೋದ್ಯೋಗಿಗಳು ವೇದಿಕೆಯ ಮೇಲೆ ನಿ೦ತು 'K-Sessions' ನಡೆದ ಬಗ್ಗೆ ತಮ್ಮ ಅಭಿಪ್ರಾಯವನ್ನು ಹ೦ಚಿಕೊಳ್ಳುತ್ತಿದ್ದುದನ್ನು ಕ೦ಡು ನಿಜಕ್ಕೂ ಆನ೦ದವಾಯಿತು. 'K-Session' ಒ೦ದು ಉತ್ಸಾಹಿ ಕನ್ನಡ ಯುವಕರ ತ೦ಡದ ಯೋಜನೆಯಾಗಿದ್ದು ಇದು BOA ಸಹೋದ್ಯೋಗಿಗಳಲ್ಲಿ ಕನ್ನಡ ಭಾಷೆಯ ಬಳಕೆಯನ್ನು ಹೆಚ್ಹಿಸುವ ಉದ್ದೇಶವನ್ನು ಹೊ೦ದಿದೆ. ಇದನ್ನು ಆಕರ್ಷಕ ರೀತಿಯಲ್ಲಿ ಆಯೋಜಿಸಿಲಾಗಿತ್ತು ಮತ್ತು ಕಾರ್ಯಕ್ರಮ ಯಶಸ್ಸಿಯಾಗಿ ನೆರವೇರಿತು. ಅನೇಕ ವರ್ಷಗಳು ಸೇವೆ ಸಲ್ಲಿಸಿದ ಸಹೋದ್ಯೋಗಿಗಳಿಗೆ ಸನ್ಮಾನಿಸಿ ಬಹುಮಾನವನ್ನು ವಿತರಿಸಲಾಯಿತು. ಊಟದ ಮಧ್ಯದಲ್ಲಿನ ಉಪ್ಪಿನಕಾಯಿಯ ಹಾಗೆ ನಮ್ಮ ಇಬ್ಬರು ಸಹೋದ್ಯೋಗಿಗಳು ಕರಾವೋಕೆ ಹಾಡು ಹಾಡಿದರು.

ಕೊನೆಯದಾಗಿ ಒಬ್ಬ ಪರಭಾಷಿಕರಿ೦ದ ಕನ್ನಡದಲ್ಲಿ ನೆರೆದಿರುವವರಿಗೆ ಕಾರ್ಯಕ್ರಮಕ್ಕೆ ಆಗಮಿಸಿದ್ದಕ್ಕೆ ಧನ್ಯವಾದಗಳನ್ನು ಅರ್ಪಿಸಿದರು. ನಮ್ಮ ಕ೦ಪನಿಯಲ್ಲಿರುವ ಇಲ್ಲಿನ ಮತ್ತು ಬೇರೆ ದೇಶಗಳಲ್ಲಿರುವ ಎಲ್ಲ ಕನ್ನಡಿಗರು ಒಟ್ಟುಗೂಡಿ ಮನಃಪೂರ್ವಕವಾಗಿ ಕೆಲಸ ಮಾಡಿ ಕಾರ್ಯಕ್ರಮವು ಯಶಸ್ಸಿಯಾಗಿ ನಡೆಯುವುದಕ್ಕೆ ಕಾರಣರಾದರು.

ಚಿತ್ರಗಳು:

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಸಿಂಬಿಯನ್ ಸಂಸ್ಥೆಯಲ್ಲಿ ನಾಡ ಹಬ್ಬ

2009-02-07T09:02:00.000-08:00

ಸಿಂಬಿಯನ್ ಸಾಫ್ಟ್‌ವೇರ್ ಇಂಡಿಯಾ ಲಿಮಿಟೆಡ್ ವತಿಯಿಂದ ಕನ್ನಡರಾಜ್ಯೋತ್ಸವದ ಅಂಗವಾಗಿ ಕನ್ನಡಭಾಷೆ, ಇತಿಹಾಸದ ಬಗ್ಗೆ ಜಾಗೃತಿಮೂಡಿಸುವ ಒಂದು ಕಿರುಪ್ರಯತ್ನವಾಗಿ ನವೆಂಬರ್ ೨೫ ರಂದು ರಸಪ್ರಶ್ನೆ ಕಾರ್ಯಕ್ರಮ ಮಾಡಲಾಯಿತು.

ಈ ಒಂದು ರಸಪ್ರಶ್ನೆ ಕಾರ್ಯಕ್ರಮದಲ್ಲಿ ಸುಮಾರು ೧೫ ಪ್ರಶ್ನೆಗಳನ್ನು ಆಯ್ಕೆಮಾಡಿ ಕನ್ನಡೇತರರಿಗೆ ಕೇಳಲಾಯಿತು. ಸುಮಾರು ೨೫ ಕನ್ನಡಿಗರು ೭೫ ಅನ್ಯಭಾಷಿಗರು ಇದರಲ್ಲಿ ಪಾಲ್ಗೊಂಡಿದ್ದರು. ಕನ್ನಡಿಗರು ಉತ್ತರ ಹುಡುಕಲು ಕನ್ನಡೇತರರಿಗೆ ಸಹಾಯಕರಾಗಿ ಮಾರ್ಗದರ್ಶನಮಾಡಿದರು. ಇದರಿಂದಾಗಿ ಕನ್ನಡ ಗೊತ್ತಿದ್ದವರಿಗೆ ಇನ್ನಷ್ಟು ವಿಚಾರ ತಿಳಿಯುವಂತಾಗಿದ್ದಲ್ಲದೆ ಕನ್ನಡ ಗೊತ್ತಿಲ್ಲದವರಿಗೆ ಕನ್ನಡದ ಬಗ್ಗೆ ಹೆಚ್ಚಿನ ಮಾಹಿತಿ ದೊರೆಯುವಂತಾಯಿತು.

ನವೆಂಬರ್ ೨೬ರಂದು ಆಯ್ಕೆಮಾಡಿದ ಸುಮಾರು ೩೦ ರಿಂದ ೪೦ ಜನಕ್ಕೆ ಕನ್ನಡದಲ್ಲಿ ಪದಬಂದ ನೀಡಲಾಯಿತು. ಈ ಸಂದರ್ಭದಲ್ಲಿ ಸುಮಾರು ೩೦ರಷ್ಟು ಜನ ಅನ್ಯಭಾಷಿಗರು ಕನ್ನಡದಲ್ಲಿ ತಮ್ಮ ಹೆಸರನ್ನು ಬರೆಯುವಂತಾಯಿತು.

ಡಿಸೆಂಬರ್ ೧೨ರಂದು ಗಾಳಿಪಟ ಹಾರಿಸುವ ಹಬ್ಬದ ಮೂಲಕ ಕನ್ನಡಭಾಷೆ ಮಾತಾಡುವಂತೆ ಪ್ರಯತ್ನ ಮಾಡಲಾಯಿತು.
ಹೀಗೆ ಕನ್ನಡ ನಮ್ಮ ಸಂಸ್ಥೆಯಲ್ಲಿ ರಾಜ್ಯೋತ್ಸವ ಕಾರ್ಯಕ್ರಮಗಳನ್ನು ಆಚರಿಸಲಾಯಿತು.

ಚಿತ್ರಗಳು:

ಗಾಳಿ ಪಟ ಹಾರಿಸ್ತಾ ಇರೋ ಸಿಂಬಿಯನ್ ಹುಡುಗರು :)

ಇನ್ನಷ್ಟು ಚಿತ್ರಗಳಿಗೆ:
http://picasaweb.google.co.in/naveen.nanjundappa/KannadaHabba#

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ವಿಪ್ರೋ ನಾಡಹಬ್ಬ

2009-01-20T09:05:00.000-08:00

ವಿಪ್ರೋದಲ್ಲಿ ಉಕ್ಕಿದ ಕನ್ನಡ ಕಸ್ತೂರಿ

ಎಲ್ಲಾದರು ಇರು ಎಂತಾದರು ಇರು ಎಂದೆಂದಿಗೂ ನೀ ಕನ್ನಡವಾಗಿರು, ಕನ್ನಡ ಕವಿ ಕುವೆಂಪುರವರ ಕಾವ್ಯವಾಣಿಯನ್ನು ನಿಜವಾಗಿಸುತ್ತಿದ್ದಾರೆ ವಿಪ್ರೊ ಸಂಸ್ಥೆಯ ಕನ್ನಡಮ್ಮನ ಕಂದಮ್ಮಗಳು.

ಕಳೆದ ಜನವರಿ 8 ರಂದು, 4ನೆ ವಾರ್ಷಿಕ ಕನ್ನಡ ಸಾಂಸ್ಕೃತಿಕ ಕಾರ್ಯಕ್ರಮ "ವಿಸ್ಮಯ"ವನ್ನು ಅಲ್ಲಿನ ಕನ್ನಡ ಮಿತ್ರರು ಆಚರಿಸಿದರು. ನಾವು ತುಂಬ ಹೆಮ್ಮೆ ಪಡಬೇಕಾದ ವಿಷಯವೇನೆಂದರೆ ವಿಪ್ರೋನಲ್ಲಿ, ವಿಸ್ಮಯದ ರೂವಾರಿ ನರಸಿಂಗ ರಾವ್ ನೇತ್ರುತ್ವದಲ್ಲಿ ಕನ್ನಡ ಕಹಳೆಯನ್ನು ಊದಿ ದುಂದುಬಿ ಮೊಳಗಿಸುತ್ತಿರುವ ಸಮಾನ ಮನಸ್ಕ ಕನ್ನಡ ಮಿತ್ರರಿಗೆ ಅಲ್ಲಿನ ಕನ್ನಡಿಗರು ಹೆಗಲಿಗೆ ಹೆಗಲು ಕೊಟ್ಟು ಸಹಕರಿಸಿ ಭಾಗವಹಿಸುತ್ತಿದ್ದಾರೆ.

ಕಳೆದ 4 ವರ್ಷಗಳಿಂದ ವಿಸ್ಮಯವನ್ನು ಆಚರಿಸುತ್ತಿರುವ ಬಳಗ, ಈ ಬಾರಿ 4 ಸಾವಿರಕ್ಕೂ ಹೆಚ್ಚು ವಿಪ್ರೊ ಕನ್ನಡಿಗರನ್ನು ಸೇರಿಸಿ ಆಚರಿಸುವಂಥಾಗಿದೆ. ಬೆಂಗಳೂರಿನ ಎಲೆಕ್ಟ್ರಾನಿಕ್ಸ್ ಸಿಟಿಯ ವಿಪ್ರೊ ಟೆಕ್ನಾಲಜೀಸ್ ನ ಕುವೆಂಪು ರಂಗಮಂಚದ ಸಭಾಂಗಣದಲ್ಲಿ ನಡೆದ ‘ವಿಸ್ಮಯ’ ಸಮಾರಂಭಕ್ಕೆ, ಕರ್ನಾಟಕದ ಖ್ಯಾತ ದಿನಪತ್ರಿಕೆ, ವಿಜಯ ಕರ್ನಾಟಕದ ಸಂಪಾದಕ ‘ವಿಶ್ವೇಶ್ವರ ಭಟ್’' ವಿಶೇಷ ಅತಿಥಿಗಳಾಗಿ ಆಗಮಿಸಿ ಹಂಚಿಕೊಂಡ 'ವಕ್ರತುಂಡೋಕ್ತಿ'ಯ ಸ್ಯಾಂಪಲ್ಗಳು, ಹಾಸ್ಯದ ಟಚ್ ಇದ್ದ ಪತ್ರಿಕಾ ಪ್ರಪಂಚದ ಸ್ವಾರಸ್ಯಕರ ಘಟನೆಗಳು ಮತ್ತು ನವಿರಾದ ಆಗು - ಹೋಗುಗಳು, ಕಾರ್ಯಕ್ರಮದ ರಂಗೇರಿಸಿದವು. ಇದರ ಜೊತೆಗೆ ಹಾಸ್ಯ ಭಾಷಣಕಾರ ‘ಗಂಗಾವತಿ ಪ್ರಾಣೇಶ್(ಬೀಚಿ)’ರವರು ತಮ್ಮ ಹಾಸ್ಯದಿಂದ ಪ್ರೇಕ್ಷಕರನ್ನು ನಗೆಗಡಲಿನಲ್ಲಿ ತೇಲಿಸಿದರು.

ಕನ್ನಡ ನಾಡಗೀತೆಯ ಹಿನ್ನೆಲೆಯಲ್ಲಿ ಅತಿಥಿಗಳು ದೀಪ ಬೆಳಗುವುದರೊಂದಿಗೆ ಕಾರ್ಯಕ್ರಮ ಆರಂಭಗೊಂಡಿತು.
ವಿಸ್ಮಯದಲ್ಲಿ ಮೊದಲ ಬಾರಿಗೆ ಜೋಡಿ ನಿರೂಪಣೆ ನಡೆಸಿಕೊಟ್ಟ ಕಿರುತೆರೆಯ ಸಂಜೀವ್ ಕುಲಕರ್ಣಿ ಹಾಗು ಅಪರ್ಣ, ಅತಿಥಿಗಳ ಪರಿಚಯ ಮಾಡಿಕೊಟ್ಟರು. ನರಸಿಂಗ ರಾವ್ ಸ್ವಾಗತಿಸಿದರೆ, ರಾಘವೇಂದ್ರ ಕಮಲಾಕರ್, ಕಿರಣ್ ಕೃಷ್ಣ, ಮಂಜುನಾಥ್ ಸ್ವಾಮಿ, ವಾಸುಕಿ ಹಾಗು ಭಾಸ್ಕರ್, ಕಾರ್ಯಕ್ರಮ ಸುಗಮವಾಗಿ ಸಾಗುವಂತೆ ನಿಯಂತ್ರಿಸಿದರು. ಕಿವಿ ಇಂಪಾಗಿಸಿದ ಹಾಡುಗಳು, ಡ್ಯಾನ್ಸ್ ಕಾಂಪಿಟಿಶನ್ ನಡೆಯುತ್ತಿದೆ ಎಂಬಂತೆ ಒಂದಕ್ಕಿಂತ ಒಂದು ಅದ್ಭುತವಾಗಿದ್ದ ಡ್ಯಾನ್ಸ್ ಗಳು, ಎಲ್ಲರ ಕುತೂಹಲ ಹಿಡಿದಿಟ್ಟ ಹಾಸ್ಯಭರಿತ ಸ್ಕಿಟ್ ಮತ್ತು ಮೂಕಾಭಿನಯ , ಹೀಗೆ ಸತತವಾಗಿ 5 ಘಂಟೆಗಳ ಕಾಲ ಸಭಿಕರನ್ನು ರಂಜಿಸಿದವು .

ಇದೆಲ್ಲದರ ಜೊತೆಗೆ ಜೂನಿಯರ್ ರಾಜಕುಮಾರ್ ಹಾಗು ಜೂನಿಯರ್ ಶಂಕರನಾಗ್ ರವರ 'ಅಪೂರ್ವ ಸಂಗಮ' ಕ್ಕೆ ವೇದಿಕೆಯಾದದ್ದು ಈ ಬಾರಿಯ ವಿಸ್ಮಯದ ವಿಶೇಷ.

ಆ ದಿನ ಇದ್ದ ಹುರುಪು, ವಿಶ್ವಾಸ, ಅಭಿಮಾನ ನೋದಿದರೆ, ವಿಸ್ಮಯವು ವಿಪ್ರೋದ ಸಂಸ್ಕೃತಿ ಆಗುವದರಲ್ಲಿ ಯಾವುದೇ ಅನುಮಾನವಿಲ್ಲ. ಬಹಳ ಸೊಗಸಾಗಿ ಜರುಗಿದ ಕಾರ್ಯಕ್ರಮ ಎಲ್ಲರ ನೆನಪಿನಂಗಣದಲ್ಲಿ ಉಳಿಯುವಂತದಾಗಿತ್ತು
ಒಟ್ಟಾರೆ ಹೇಳಬೇಕೆಂದರೆ, ಕನ್ನಡದ ಬಗ್ಗೆ ಕಾಳಜಿ ಇಲ್ಲವೆಂಬ ಅಪವಾದ ಹೊತ್ತಿರುವ ಐಟಿ ಪ್ರಪಂಚದಲ್ಲಿ, ವಿಪ್ರೋದ ಕನ್ನಡ ಕಾರ್ಯಕ್ರಮ 'ವಿಸ್ಮಯವು' ಕನ್ನಡದ ಕಾರಂಜಿಯನ್ನು ಮನಮೋಹಕವಾಗಿ ಚಿಮ್ಮಿಸುವಲ್ಲಿ ಯಶಸ್ವಿಯಾಯಿತು.

ಚಿತ್ರಗಳು:

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಹುವಾವೆ ಟೆಕ್ನಾಲಜೀಸ್ ನಾಡ ಹಬ್ಬ

2008-12-20T05:23:00.000-08:00

ಸಂಸ್ಥೆ:ಹುವಾವೆ ಟೆಕ್ನಾಲಜೀಸ್
ದಿನಾಂಕ:12/11/2008

ಹುವಾವೆ ಟೆಕ್ನಾಲಜಿಸ್ ಸ೦ಸ್ಥೆಯ ಕನ್ನಡ ರಾಜ್ಯೋತ್ಸವ ಆಚರಣೆಯ ಒ೦ದು ತುಣುಕು.

ನಮ್ಮ ಸ೦ಸ್ಥೆ, ನಾಲ್ಕು ದಿಕ್ಕುಗಳು ಇರುವಹಾಗೆ, ನಾಲ್ಕು ಬೇರೆ ಬೇರೆ ಬಿಲ್ಡಿ೦ಗ್ನಲ್ಲಿ ಇದೇ ರಾಜಧಾನಿಯಲ್ಲಿ ಹರಡಿಕೊ೦ಡಿದೆ. ಆದರೆ ಇದನ್ನು ಒ೦ದುಗೂಡಿಸಿದ್ದು ನಮ್ಮ ಸ೦ಸ್ಥೆಯಲ್ಲಿ ಮೊದಲಬಾರಿಗೆ ಆಚರಿಸಲಾದ ಕನ್ನಡರಾಜ್ಯೋತ್ಸವವೆ೦ದರೆ ತಪ್ಪಾಗಲಾರದು. ದಿನಾ೦ಕ ೧೨-೧೧-೨೦೦೮ ರ೦ದು ಹುವಾವೆಯಲ್ಲಿ ಮೊದಲಬಾರಿಗೆ ಕನ್ನಡದ ಕೂಗು ಮೊಗ್ಗಿನ೦ತೆ ಚಿಗುರೊಡೆಯಿತು. ಇಡೀ ಸಹೋದ್ಯೋಗಿ ಮಿತ್ರರು ಸಾ೦ಪ್ರದಾಯಿಕ ಉಡುಗಿನಲ್ಲಿ ಮ೦ದಹಾಸವನ್ನು ಚೆಲ್ಲಿದ್ದರು. ಇದರಲ್ಲಿ ತು೦ಬ ಖುಷಿ ಕೊಡುವ ವಿಷಯವೇನೆ೦ದರೆ ಕನ್ನಡೇತರರು ಕೂಡ ತಮ್ಮನ್ನು ಈ ಹಬ್ಬಕ್ಕೆ ಪೂರ್ಣವಾಗಿ ತಮ್ಮ ವರ್ಣರ೦ಜಿತ ಪೋಶಾಕುಗಳಿ೦ದ ತಮಗೆ ಅಶ್ರಯ ಕೊಡುತ್ತಿರುವ ಈ ನಾಡಿನ ಪರ್ವಕ್ಕೆ ಪೂರ್ಣ ಬೆ೦ಬಲ ಸೋಚಿಸಿದ್ದು.

ಎಲ್ಲಾ ಫ್ಲೋರಿನ ಮುಖ್ಯದ್ವಾರದಲ್ಲಿ ಕನ್ನಡದ ಪತಾಕೆ ಏರ್ ಕ೦ಡಿಷನರಿನ ಮ೦ದ ಗಾಳಿಗೆ ತೇಲಾಡುತ್ತ ಎಲ್ಲರನ್ನು ಸ್ವಾಗತಿಸುತ್ತಿತ್ತು. ಬಾಗಿಲಬಳಿ ಮೂಡಿಬ೦ದ ಕರ್ನಾಟಕ ರಾಜ್ಯಾಕೃತಿಯ ರ೦ಗೋಲಿಯು ಸ್ವರ್ಣ(ಹಳದಿ)ವರ್ಣದ ಚಹರೆ ಇರುವ ಸು೦ಧರ ಚೆಲುವೆ ಕೆ೦ಪು ತಿಲಕವನಿಟ್ಟು ತನ್ನ ವೈಭವವನ್ನು ಮೆರೆದ೦ತ್ತಿತ್ತು. ಗಾಳಿ ತು೦ಬಿದ ಬಲೂನುಗಳು ತೂಗುಯ್ಯಾಲೆಯ೦ತೆ ಆಫೀಸಿನ ಲೈಟಿನ ಬೆಳಕಿನ ಜೊತೆ ತನ್ನದೆ ಆದ ಲೋಕದಲ್ಲಿ ಆಡಿದ೦ತಿತ್ತು.

ಸಾರಿ, ತು೦ಬ ಎ(ಹೇ)ಳಿದ೦ತೆ ಕಾಣುತ್ತದೆ. ಈಗ ಕಾರ್ಯಕ್ರಮದ ಬಗ್ಗೆ ಮಾತನಾಡೋಣ. ಕಾರ್ಯಕ್ರಮ ಶುರುವಾದದ್ದು ಮುಸ್ಸ೦ಜೆ ೫ ಗಂಟೆಯ ಅಜುಬಾಜಿನಲ್ಲಿ. ಮೊದಲ ಬಾರಿಗೆ ಆಚರಿಸಬೇಕಾದರೆ ಮನಸ್ಸಿನಲ್ಲಿ ಏನೋ ಒ೦ದು ದುಗುಡ, ಕಾರ್ಯಕ್ರಮ ಸರಿಯಾಗಿಬರುವುದೋ, ಅದನ್ನು ಕನ್ನಡ ಸಹೋದ್ಯೋಗಿ ಮಿತ್ರರು ಹೇಗೆ ಸ್ವೀಕರಿಸುವರೋ ಎ೦ಬ ಆತ೦ಕ. ಈ ಕಾರ್ಯಕ್ರಮ ನಮ್ಮ ಸ೦ಸ್ಥೆಯ ಮುಖ್ಯ ಕಛೇರಿಯಾದ ಲೀಲಾ ಪ್ಯಾಲೇಸಿನ ೭ನೇ ಅ೦ತಸ್ತಿನ ಕಾನ್ಫರೆನ್ಸ್ ಹಾಲಿನಲ್ಲಿ ನಡೆಸಲಾಯಿತು. ಆದರೆ ಅಚ್ಚರಿ ಏನೆ೦ದರೆ ನಮ್ಮ ಬಿಎ೦ಟಿಸಿ ಬಸ್ಸಲ್ಲಿರುವ ಹಾಗೆ ಸಭಿಕರು ಕಿಕ್ಕಿರಿದು ನೆರೆದಿದ್ದರು. ಬಸ್ಸಿನ ಡೋರು ಬಸ್ಸು ಚಲನೆಯಲ್ಲಿರಬೇಕಾದರೆ ಕ್ಲೋಸ್ ಆಗುತ್ತದೆ, ಆದರೆ ಆ ದಿನ ಕಾರ್ಯಕ್ರಮ ನಡೆಸಬೇಕಾದರೆ ಬಾಗಿಲುಗಳು ಕ್ಲೋಸ್ ಆಗದೆ ಜನಸಾಗರದಿ೦ದ ತು೦ಬಿ ಆ ಇಡೀ ಹಾಲ್ ತುಳುಕಾಡುತ್ತಿತ್ತು. "ಛಟ್"ಅನೆ ಲೈಟ್ ಆಫಾಯಿತು, ಆದರೆ ಹಾಲಿನಲ್ಲಿರುವ "ಹಾಲಿ"(ಬೆಳ್ಳಿ)ನ೦ತಿರುವ ಪರದೆ ಮಾತ್ರ ನಿದ್ರೆಯಿ೦ದ ಎಚ್ಚರವಾದ೦ತೆ ಪ್ರಾಕಾಶಿಸುತ್ತಲೆ ಕರ್ನಾಟಕದ ಇತಿಹಾಸ, ಸಾಹಿತ್ಯ, ಸಾಧನೆ, ಕನ್ನಡ ಕವಿಗಳ ಹೃದಯವ೦ತಿಕೆ, ಸಹ್ಯಾದ್ರಿ ಶೃ೦ಗದ ಸೊಭಗು, ಜೋಗದ ಸಿರಿ ಎಲ್ಲವನ್ನು ಪ್ರತ್ಯಕ್ಷವಾಗಿ ತೋರಿಸಿದಷ್ಟೇ ಸಮ೦ಜಸವಾಗಿ ಚಿತ್ರಗಳನ್ನು ತನ್ನ ಪರದೆಯ ಮೇಲೆ ಬಿಡಿಸುತ್ತಿತ್ತು. ಇದಕ್ಕೆ ಪೂರಕವಾಗಿ ನಮ್ಮ ಅಣ್ಣಾವ್ರ ಸುಮಧುರ ಧ್ವನಿಯಲ್ಲಿ ಕುವೆ೦ಪುವಿರಚಿತ "ಎಲ್ಲಾದರು ಇರು, ಎ೦ತಾದರು ಇರು" ಹಾಡು ದೃಷ್ಯಕ್ಕನುಗುಣವಾಗಿ ಪರದೆಯ ಹಿ೦ದೆಲ್ಲೋ "ರಾಜ್"ರವರು ಧರೆಗಿಳಿದು ಬ೦ದು ಶೃತಿ ಕೊಡುತ್ತಿದ್ದ೦ತೆ ಭಾಸವಾಗಿತ್ತು.

ಮೂರು ನಿಮಿಷದ ನ೦ತರ ಇಡೀ ಹಾಲ್ ಮತ್ತೆ ಲೈಟ್ ದೀಪಗಳಿ೦ದ ಅಲ೦ಕೃತ ಗೊ೦ಡವು. ಕಾರ್ಯಕ್ರಮದ ಮು೦ದಿನ ಘಟ್ಟವಾದ ದೀಪ ಬೆಳಗುವಿಕೆಗೆ ಸ೦ಸ್ಥೆಯ ನಿರ್ವಹಣಾಧಿಕಾರಿಯಾದ ನಮ್ಮ ಚೈನೀಸ್ ಬ೦ಧುವಾದ "ಚಸ್ಟಿನ್"ಅವರು ಮು೦ದಾದರು. ನಮ್ಮ ಕಾರ್ಯಕ್ರಮಕ್ಕೆ ಸರ್ಪ್ರೈಸ್ ಅತಿಥಿಯಾಗಿ "ಹಾಗೆ ಸುಮ್ಮನೆ" ಮೋಡಿ ಮಾಡುವ "ಕಿರಣ್ ಶ್ರಿನಿವಾಸ್" ಅವರು "ಜಸ್ಟಿನ್" ಜತೆ ಕೈಗೂಡಿ ದೀಪಬೆಳಗಬೇಕಾದರೆ "ಕನ್ನಡ ಹಾಗು ಚೈನಾ ಭಾಷೆ(ಮ್ಯಾ೦ಡೇರಿಯನ್) ಎಲ್ಲೋ ಒ೦ದುಗೂಡಿದ೦ತ್ತಿತ್ತು. ಇದಕ್ಕೆ ಸಾಕ್ಷಿಯಾಗಿ ನಮ್ಮ ಅಧ್ಯಕ್ಷರ ವದನದಿ೦ದ ಮುತ್ತಿನ೦ತೆ ಬ೦ದ "ಕನ್ನಡ ರಾಜ್ಯೋತ್ಸವ ಶುಭಾಷಯಗಳು" ಎ೦ಬ ಮಾತು. ದೀಪ ಬೆಳಗಬೇಕಾದರೆ ನಮ್ಮ ಗಾನ ಕೋಗಿಲೆಗಳು ಇ೦ಪಿಟ್ಟ "ಹಚ್ಚೇವು ಕನ್ನಡದ ದೀಪ" ಸಾಲುಗಳು ಅವಿಸ್ಮರಣೀಯ. ನ೦ತರ "ಕಿರಣ್"ಅವರು ತಮ್ಮ ಅಯಸ್ಕಾ೦ತದ೦ತಹ ಧ್ವನಿಯಿ೦ದ ಇಡಿ ಸಭೆಯನ್ನು ತಮ್ಮತ್ತ ಸೆಳಿದಿದ್ದರು.

ನ೦ತರ ನಮ್ಮ ಸ೦ಸ್ಥೆಯ ಸೋನು ನಿಗ೦ಗಳು, ರಾಜಣ್ಣ೦ದಿರುಗಳು, ಶ್ರೇಯಾ ಗೋಶಾಲ್ ರವರುಗಳು ತಮ್ಮ ಸುಮಧುರವಾದ ಕ೦ಠದಿ೦ದ ಕನ್ನಡದ ಸ೦ಪಿಗೆಯ೦ತಹ ಕ೦ಪನ್ನು ಎಲ್ಲೆಡೆಯು ಬೀರಿದರು. ಆದರೆ ಕಾರ್ಯಕ್ರಮದ ಮತ್ತೊ೦ದು ಪ್ರಧಾನ ಆಕರ್ಷಣೆಯೇನೆ೦ದರೆ ಇಬ್ಬರು ಕೇರಳದ ಮಿತ್ರರು ಕನ್ನಡದ ಹಾಡನ್ನು ಹೇಳಿದ್ದು. ಪುರ೦ದರ ದಾಸರ ಕೀರ್ತನೆ ಒಬ್ಬ ಕನ್ನಡೇತರ ಬ೦ಧುವಿ೦ದ ಎಲ್ಲೂ ಲೋಪವಿಲ್ಲದ೦ತೆ ಕೇಳಿದ ಕಿವಿಗಳಿಗೆ ಜೇನಿನ ಸಿಹಿಯುಣ್ಣಿಸಿ ಎಲ್ಲರನ್ನು ಮ೦ತ್ರಮುಗ್ಧರನ್ನಾಗಿ ಮಾಡಿಸಿತ್ತು. ಮಧ್ಯೆ, ಮಧ್ಯೆ ಹಾಸ್ಯ ಚಟಾಕೆಯನ್ನು ಬಾರಿಸಿದ ಹುವಾವೆ ಕವಿ ಹೃದಯಿಗಳು ತಮ್ಮ ಪದಗಳ ಜೋಡಣೆಯಿ೦ದ ಸಭಿಕರಲ್ಲಿ ನವಿರಾದ ಹಾಸ್ಯ ಮೂಡಿಸಿ "ಆಕ್ಸಿಜನ್" ಸ೦ಚಲನವನ್ನು ಉ೦ಟುಮಾಡಿದರು.

ಸ೦ಸ್ಥೆಯ ಪ್ರಮುಖ ವ್ಯಕ್ತಿಗಳು ಕನ್ನಡದ ಬಗ್ಗೆ, ಅದರ ಹಿತರಕ್ಷಣೆಯ ಬಗ್ಗೆ ತಾವು ಹೇಳಿದ ಮಾತುಗಳು ನೆರೆದ ಕನ್ನಡಿಗರಿಗೆ ಕನ್ನಡಿ ಹಿಡಿದ೦ತ್ತಿತ್ತು. ನಾವು ನಮ್ಮ ಮನೆಯಲ್ಲಿ, ಗೆಳೆಯರ ಜೊತೆ ಮಾತನಾಡಬೇಕಾದರೆ, ವ್ಯವಹಾರದಲ್ಲಿ ದಿನನಿತ್ಯ ಕನ್ನಡ ಬಳಸಬೇಕು ಎ೦ಬ ಸೂಚನೆ ತು೦ಬ ಸಮರ್ಪಕವಾಗಿತ್ತು. ಕಾರ್ಯಕ್ರಮ ಅ೦ತ್ಯ ಗೊ೦ಡದ್ದು ಎಲ್ಲರ ಬಾಯಿ ಸಿಹಿಯಾಗುವುದರ ಮೂಲಕ. ಇದಕ್ಕ೦ತಾನೆ ಮೈಸೂರು ಪಾಕು ತನ್ನ ಬೆಣ್ಣೆಯ ಪರಿಮಳದಿ೦ದ ಕಾರ್ಯಕ್ರಮದ ಬೀಳ್ಕೊಡುಗೆ ವೇಳೆಯಲ್ಲಿ ಎಲ್ಲರಿಗೂ "ಧನ್ಯವಾದಗಳನ್ನು" ಹೇಳಿ ಕನ್ನಡ ಎಷ್ಟು ಸಿಹಿಯ೦ಬುವುದನ್ನು ಸಾರಿತ್ತು.

ಇ೦ತಿ ನಿಮ್ಮ,
ಹುವಾವೆ ಮಿತ್ರರು

ಚಿತ್ರಗಳು:

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಮೈಂಡ್ ಟೆಕ್ ನಲ್ಲಿ ನಾಡ ಹಬ್ಬ

2008-12-08T09:04:00.000-08:00

ನಮಸ್ಕಾರಗಳು,

ಆತ್ಮೀಯರೆ ಸತತವಾಗಿ ಮೂರನೆ ಬಾರಿ ಮೈಂಡ್ಟೆಕ್ ಕಂಪನಿಯಲ್ಲಿ ಕನ್ನಡ ರಾಜ್ಯೋತ್ಸವ ಆಚರಿಸಲಾಯಿತು. ಮೈಂಡ್ಟೆಕ್ ಒಂದು ಚಿಕ್ಕ ಕಂಪನಿ, ಆದರು ಪ್ರತಿ ವರ್ಷ ರಾಜ್ಯೋತ್ಸವವನ್ನು ಆಚರಿಸಲು ಇಲ್ಲಿರುವ ಎಲ್ಲಾ ಕನ್ನಡಿಗರ ಮಹದಾಸೆ. ಇಲ್ಲಿ ಸುಮಾರು ೨೫೦ ಉದ್ಯೋಗಿಗಳಲ್ಲಿ ೪೦-೫೦ ಕನ್ನಡಿಗರು.

ನಾವು ಕನ್ನಡ ರಾಜ್ಯೋತ್ಸವವನ್ನು ಈ ರೀತಿ ಆಚರಿಸಿದೆವು:

ಆಚರಣೆ ಪೂರ್ವ ಹಾಗೂ ಪರ ಎಲ್ಲಾ ರೀತಿಯ ಕನ್ನಡ ಬಳಗದವರೊಂದಿಗೆ ಮಿಂಚಂಚೆ ಸಂಭಾಷಣೆ ಕನ್ನಡದಲ್ಲಿಯೇ ನಡೆಯುತ್ತದೆ.
ಕರ್ನಾಟಕ ರಾಜ್ಯದ ಭೂಪಟ ವನ್ನು ಹೂವಿಂದ ಅಲಂಕರಿಸಿ, ಅದರ ಮುಂದೆ ರಂಗೋಲಿ ಹಾಕಿ, ಪಕ್ಕದಲ್ಲಿ ದೀಪಸ್ತಂಬವನ್ನು ಇಟ್ಟಿದ್ದೇವು.
ಕಂಪನಿಯ ಗಣ್ಯರಿಂದ ದೀಪ ಬೆಳಗಿಸಿ, "ಹಚ್ಚೇವು ಕನ್ನಡದ ದೀಪ" ಹಾಡನ್ನು ಹಾಡಿದೆವು.
ಸುಮಾರು ೫-೬ ಜನ ಮಹಿಳೆಯರು ಹಾಗು ಮಹನಿಯರು ನಾಡ ಗೀತೆ "ಜಯಭಾರತ ಜನನಿಯ ತನುಜಾತೆ" ಯನ್ನು ಹಾಡಿದರು.
ನಮ್ಮಲ್ಲೇ ಒಬ್ಬರು ಕನ್ನಡದಲ್ಲಿ ನಿರೂಪಣೆ ಮಾಡಿದೆವು. ಕನ್ನಡ ಭಾಷೆ, ನೆಲದ ಜಲದ ಬಗ್ಗೆ, ಕನ್ನಡ ಭಾಷೆಯನ್ನು ಸಂರಕ್ಷಿಸುವುದರ ಬಗ್ಗೆ, ಕನ್ನಡ ರಾಜ್ಯೋತ್ಸವವನ್ನು ಆಚರಿಸುವುದು ನಮ್ಮೆಲ್ಲರ ಕರ್ತವ್ಯ ಎಂಬುದರ ಬಗ್ಗೆ ಮಾತನಾಡಿದೆವು.
ಗಣ್ಯರಿಂದ ಕನ್ನಡದಲ್ಲಿ ಕೆಲ ಮಾತುಗಳು ಹಬ್ಬಕ್ಕೆ ಕಳೆ ತಂದಿತು.
ಸಾಂಸ್ಕ್ರುತಿಕ ಹಾಗು ಮನರಂಜನೆ ಕಾರ್ಯಕ್ರಮಗಳು ಜನಮನ ಸೂರೆಗೊಂಡವು.
ಈ ವರ್ಷ ಗಣ್ಯರಲ್ಲಿ ಯಾರ್ಯಾರಿಗೆ ಕನ್ನಡ ಬರುವುದಿಲ್ಲವೋ ಅವರಿಗೆ "೨೫ ದಿನದಲ್ಲಿ ಕನ್ನಡ ಕಲಿಯಿರಿ" ಪುಸ್ತಕ, ಯಾರ್ಯಾರಿಗೆ ಕನ್ನಡ ಬರುವುದೋ ಅವರಿಗೆ ಕನ್ನಡ ಕಾದಂಬರಿಗಳನ್ನು ಕೊಟ್ಟೆವು.
ಸಭಿಕರಿಗೆ ಕನ್ನಡದ ಬಗ್ಗೆ ಪ್ರಶ್ನೆಗಳು. ಸರಿ ಉತ್ತರ ಕೊಟ್ಟವರಿಗೆ "ಚನ್ನಪಟ್ಟಣದ ಆಟಿಕೆ ಕೀ ಚೈನ್" ಕೊಡಲಾಯಿತು.
ಸುಮಾರು ೩೦ ಜನರು ಕನ್ನಡದ ಪದವುಳ್ಳ (ಕೇಳಿಸದೆ ಕಲ್ಲು ಕಲ್ಲಿನಲಿ ಕನ್ನಡ ನುಡಿ) ಟೀ ಶರ್ಟ್ ಧರಿಸಿದ್ದರು. ಇದು ಕಾರ್ಯಕ್ರಮಕ್ಕೆ ಮತ್ತಷ್ಟು ಶೊಭೆ ತಂದಿತು.
ಕಾರ್ಯಕ್ರಮವನ್ನು ಸಿಹಿ ಹಂಚುವುದರ ಮೂಲಕ ಮುಕ್ತಾಯಗೊಳಿಸಲಾಗುತ್ತೆದೆ. ಕಳೆದ ವರ್ಷ ಮೈಸೂರು ಪಾಕು, ಈ ವರ್ಷ ದಾರವಾಡ ಪೇಡ :)

"ಈ ವರ್ಷ ಕನ್ನಡ ಭಾಷೆಯನ್ನು ನಮ್ಮ ಕಂಪನಿಯಲ್ಲಿ ಯಾವ ರೀತಿ ಸಂರಕ್ಷಿಸುವುದು/ಬೆಳೆಸುವುದು" ಎಂಬ ಬಗ್ಗೆ ಚಿಂತನೆ ನಡೆದಾಗ, ಇ ಕೆಳಕಂಡಂತೆ ಯೋಜನೆ ರೂಪಿಸಿದ್ದೇವೆ:

೩೦-೪೦ ಕನ್ನಡ ಪುಸ್ತಕಗಳು ಮೈಂಡ್ಟೆಕ್ ಗ್ರಂಥಾಲಯಕ್ಕೆ ಅರ್ಪಣೆ. ಕಂಪನಿಯ ಎಲ್ಲಾ ಕನ್ನಡಿಗರಿಗೆ ಇವು ಲಭ್ಯ.
೨-೩ "೨೫ ದಿನದಲ್ಲಿ ಕನ್ನಡ ಕಲಿಯಿರಿ" ಪುಸ್ತಕಗಳು ಕನ್ನಡವನ್ನು ಕಲಿಯುವ ಆಸಕ್ತರಿಗೆ ಕೊಡುವುದು.
ಕನ್ನಡದ ದಿನ ಪತ್ರಿಕೆಗಳು ಕಂಪನಿಯಲ್ಲಿ ಪ್ರತಿ ದಿನ ಲಭ್ಯವಾಗುವಂತೆ ಮಾಡುವುದು.

ಚಿತ್ರಗಳು:

ಧನ್ಯವಾದಗಳು,
ಮೈಂಡ್ ಟೆಕ್ ಕನ್ನಡಿಗರು

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಸ್ಯಾಪ್(SAP) ಲ್ಯಾಬ್ಸ್ ನಲ್ಲ್ಲಿ ನಾಡ ಹಬ್ಬ

2008-12-08T08:47:00.000-08:00

SAP ಗೆಳೆಯರ ಬಳಗ , SAP ಯಲ್ಲಿ ಕೆಲಸ ಮಾಡುವ, ನಾಡು ನುಡಿಯ ಕಾರಣಕ್ಕಾಗಿ ಮಿಡಿಯುವ ಕೆಲವು ಕನ್ನಡದ ಹೃದಯಗಳು ಸೇರಿ ಕಟ್ಟಿಕೂ೦ಡ ಪುಟ್ಟ ತ೦ಡ. ೨೦೦೫ ನವೆ೦ಬರ್ ೧೨ ರ೦ದು ರಾಜ್ಯೋತ್ಸವದ ಆಚರಣೆಯೊ೦ದಿಗೆ ಅಸ್ತಿತ್ವಕ್ಕೆ ಬ೦ತು. ಶ್ಯಾಮ್ ಕಿಶೋರ್ ಅವರ ನೇತೃತ್ವ, ಅವರ ಹಿ೦ದೆ ನಿ೦ತ ಈ ಬಳಗದ ಸದಸ್ಯರು, ಅನೇಕ ಗುರಿಗಳನ್ನೂ ಕನಸುಗಳನ್ನೂ ಕಟ್ಟಿಕೊ೦ಡರು. ಆ ಕನಸುಗಳಲ್ಲಿ ಮುಖ್ಯವಾದವು, ನಮ್ಮ ಕಛೇರಿಯಲ್ಲಿ ಕೆಲಸ ಮಾಡುವ ಕನ್ನಡಿಗರನ್ನು ಒಗ್ಗೂಡಿಸಬೇಕು, ನಮ್ಮ ಕಛೇರಿಯಲ್ಲಿ ಕನ್ನಡತನದ ವಾತವರಣ ಮೂಡಿಸಬೇಕು.ಇದಕ್ಕಾಗಿ ಅಲ್ಲಿಯೋ ಒ೦ದು ಆಚರಣೆಯ ಅವಶ್ಯಕತೆ ಇದ್ದದ್ದು ಈ ತ೦ಡಕ್ಕೆ ಕ೦ಡು ಬ೦ದಿತ್ತು.

ಕಛೇರಿಯಲ್ಲಿಯೇ ರಾಜ್ಯೋತ್ಸವ ಆಚರಣೆ ಮಾಡಬೇಕೆ೦ಬ ಆಸೆಯಿ೦ದ ಈ ತ೦ಡ ೨ ವರಷ ಶ್ರಮ ಪಡಬೇಕಾಯಿತು. ಕೊನೆಗೂ ಅಕ್ಟೋಬರ್ ೩೧ -೨೦೦೮ ರ೦ದು ಈ ಬಳಗದ ಕನಸು ತಕ್ಕಮಟ್ಟಿಗೆ ನನಸಾಯಿತು. ಬೆಳಗ್ಗೆ ೭.೪೫ ಕ್ಕೆ ಕಛೇರಿಯ ಮು೦ಬಾಗದಲ್ಲಿ ಕನ್ನಡ ಧ್ವಜಾರೋಹಣದೊ೦ದಿಗೆ ಅ೦ದಿನ ಕಾರ್ಯಕ್ರಮ ಶುರುವಾಯಿತು. ೯.೦೦ ಘ೦ಟೆಗೆ ಸರಿಯಾಗಿ "ಹಚ್ಚೇವು ಕನ್ನಡದ ದೀಪ" ಈ ಹಾಡಿನೊ೦ದಿಗೆ ಕ೦ಪೆನಿಯ VP ಕುಶ್ ದೇಸಾಯಿ, ದೀಪ ಬೆಳಗಿಸುವ ಮೂಲಕ ಕಾರ್ಯಕ್ರಮ ಉದ್ಘಾಟನೆಯಾಯಿತು. ಬಳಗದ ಪರವಾಗಿ ನಿರೂಪಣೆಯಲ್ಲಿ ಕನ್ನಡ, ಕರ್ನಾಟಕ, ಹಾಗು ರಾಜ್ಯೋತ್ಸವದ ಇತಿಹಾಸವನ್ನು ಅರುಣ್, ಕನ್ನಡ ಹಾಗು ಇ೦ಗ್ಲೀಷ್(ಪರ ನಾಡಿನ ಸ್ನೇಹಿತರಿಗಾಗಿ) ಎರಡರಲ್ಲೂ ಅಚ್ಚುಕಟ್ಟಾಗಿ ಮಾಡಿದರು. ಪರ ನಾಡಿನಿ೦ದ ಬ೦ದಿರುವ ಸ್ನೇಹಿತರಿಗೆ "ಕನ್ನಡ ಕಲಿಯಿರಿ" ಎ೦ಬ ಕರೆಯನ್ನೂ ಕೊಟ್ಟರು. ಈ ತ೦ಡದ ಹುರುಪು ಕೆಲಸಗಳನ್ನು ಕ೦ಡು ಸ೦ತೋಷ ಪಟ್ಟ ಕುಶ್ ದೇಸಾಯಿ ಮಾತಾಡಿ , ತ೦ಡದ ಕೆಲಸವನ್ನು ಶ್ಲಾಘಿಸಿ, ಮತ್ತ್ಷಷ್ಟು ಬೆ೦ಬಲವನ್ನು ಕ೦ಪನಿ ನೀಡಲು ಸಿದ್ಧವಿದೆ ಎ೦ದು ತಿಳಿಸಿದರು.

ನಾಡಿನ ಸಮಾಜಿಕ ಕೆಲಸಗಳಲ್ಲಿ ತೊಡಗಿಸಿಕೊಳ್ಳಲು ಕರೆ ಕೊಟ್ಟರು. ಕಾರ್ಯಕ್ರಮದ ನ೦ತರ ಜಯ ಭಾರತ ಜನನಿಯ ತನುಜಾತೆ ನಾಡ ಗೀತೆಯನ್ನು ಹಾಡಲಾಯಿತು. ಈ ಗೀತೆಗೆ ಅಲ್ಲಿ ನೆರೆದಿದ್ದ ಸುಮಾರು ೫೦೦ಕ್ಕೂ ಹೆಚ್ಚು ಮ೦ದಿ, ಎದ್ದು ನಿ೦ತು ಗೌರವ ಸಲ್ಲಿಸಿದರು. ನ೦ತರ ಅಲ್ಲಿ ನೆರದಿದ್ದ ಎಲ್ಲರಿಗೂ ಗೆಳೆಯರ ಬಳಗದವರು ಸಿಹಿ ಹ೦ಚಿದರು.

ಮಧ್ಯಾಹ್ನದ ಊಟವೂ ಅ೦ದು ಸ೦ಪೂರ್ಣ ಕರ್ನಾಟಕದ್ದೇ ಶೈಲಿಯಲ್ಲಿ ಮಾಡಿಸಲಾಗಿತ್ತು. ಹರಿಪ್ರಸಾದ್ ಅವರ ನೇತೃತ್ವದಲ್ಲಿ "ಅಡಿಗ"ರ ತ೦ಡ ಈ ತಯಾರಿ ಮಾಡಿತ್ತು.ಆ ತ೦ಡದ ವೇಷ ಭೂಶಣಗಳೂ ಅ೦ದು ನಮ್ಮ ನಾಡಿನವೇ ಆಗಿದ್ದದ್ದು ವಿಶೇಷ. ಇಡೀ ಕ೦ಪೆನಿಯವರಿಗೆ ಅ೦ದು ಕನ್ನಡದ ಊಟ. ಆ ಸಮಯದಲ್ಲಿ ಕರುನಾಡ ಇತಿಹಾಸದ ದೃಶ್ಯಾವಳಿಯನ್ನು ಬಿತ್ತರಿಸಲಾಯಿತು.ನೋಡಿ ಆನ೦ದಿಸಿದವರು ಎಷ್ಟೋ ಮ೦ದಿ. ಹೊಸದನ್ನು ತಿಳಿದುಕೊ೦ಡ ಸ೦ತೋಷ, ಅಚ್ಚರಿ.

ಹೀಗೆ ಸುಮಾರು ಅರ್ಧ ದಿನದ ಅರ್ಥ ಪೂರ್ಣ ರಾಜ್ಯೋತ್ಸವವನ್ನು SAP Labs India, SAP ಗೆಳೆಯರ ಬಳಗದ ಜೊತೆಗೂಡಿ ಆಚರಿಸಿತು.

ನಮ್ಮ ಬಗ್ಗೆ ಇಲ್ಲಿ ನೋಡಿ:
sap_kannada@yahoogroups.com
http://www.orkut.co.in/Main#Community.aspx?cmm=25345655

ಚಿತ್ರಗಳು:

ಇನ್ನಷ್ಟು ಚಿತ್ರಗಳಿಗೆ ಇಲ್ಲಿ ಕ್ಲಿಕ್ಕಿಸಿ:

Photos : http://picasaweb.google.com/arun.rac/GelayaraBalagaRajyotsava08SLI#

ಧನ್ಯವಾದಗಳು,
SAP ಕನ್ನಡ ಬಳಗ

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಪ್ರಗತಿ ಸಿಂಡಿಕೇಟ್ ನಾಡಹಬ್ಬ

2008-12-05T03:29:00.001-08:00

ಸಂಸ್ಥೆ: ಪ್ರಗತಿ ಸಿಂಡಿಕೇಟ್
ದಿನಾಂಕ: 16/11/2008

ಸಮಾನ ಮನಸ್ಕರ ಸಂಸ್ಥೆಯಾದ ನಮ್ಮ ಪ್ರಗತಿ ಸಿಂಡಿಕೇಟ್ ತನ್ನ ೭ನೆ ಕನ್ನಡ ರಾಜ್ಯೋತ್ಸವವನ್ನು ನಗರದ ತೆಲುಗು ವಿಜ್ಞಾನ ಭವನದ ಶ್ರೀ ಕೃಷ್ಣದೇವರಾಯ ಸಬಾಂಗಣದಲ್ಲಿ ದಿನಾಂಕ ೧೬.೧೧.೨೦೦೮ ರಂದು ಆಚರಿಸಿತು. ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಗಳಾಗಿ ಶ್ರೀ. ಕೆ. ಇ .ರಾಧಾಕೃಷ್ಣ, ಮಾಜಿ ಪ್ರಾಂಶುಪಾಲರು, ಶೇಷಾದ್ರಿಪುರಂ ಹಾಗು ಸುರಾನ ಕಾಲೇಜ್, ಶ್ರೀ. ಎಂ.ಬಿ. ರಾಜೇಶ್ ಗೌಡ.ವಿಶೇಷ ಅಪರ ಭೂ ಸ್ವಾಧಿನಾಧಿಕಾರಿ, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ, ಶ್ರೀ ಕರ್ನಲ್ ಈಶ್ವರ್ ಗುರುಲಿಂಗಪ್ಪ ದೊಡ್ಡಮನಿ, ನಿವೃತ್ತ ಭಾರತ ಸೇನಾ ಕರ್ನಲ್ ಬಾಗವಹಿಸಿದ್ದರು.

ಪ್ರತಿ ವರ್ಷದಂತೆ ಸಮಾಜದಲ್ಲಿ ಉತ್ತಮ ವ್ಯಕ್ತಿಗಳನ್ನು ಗುರುತಿಸಿ ಅಭಿನಂದಿಸಿವುದು ಹಾಗು ಅವರನ್ನು ಇನ್ನು ಹೆಚ್ಚಿನ ಸಾಧನೆಗೆ ಪ್ರೋತ್ಸಾಹಿಸುವುದು ಪ್ರಗತಿ ಸಿಂಡಿಕೇಟ್ ನ ಧ್ಯೇಯೋದೇಶಗಳಲ್ಲಿ ಒಂದು. ಈ ಸಾಲಿನಲ್ಲಿ ಶ್ರೀಮತಿ. ಎಂ. ಅರ್. ಕಮಲ, ಖ್ಯಾತ ಕವಯತ್ರಿ, ಡಾ: ಕೆ.ಜಗನ್ಮಯ, ಖ್ಯಾತ ವೈದ್ಯರು ಮತ್ತು ಕೆ. ನರಸಿಂಹಮೂರ್ತಿ, ಸಮಾಜ ಸೇವಕರು ಇವರುಗಳಿಗೆ ಕರ್ನಾಟಕ ಸಹೃದಯ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಇದೇ ಸಂದರ್ಭದಲ್ಲಿ ಶ್ರೀ. ಕೆ ಪ್ರಹ್ಲಾದ ಶೆಟ್ಟಿ ಇವರಿಗೆ ಪ್ರಗತಿ ರತ್ನ ಪ್ರಶಸ್ತಿ ಪ್ರದಾನ ಮಾಡಲಾಯಿತು.

ಕಾರ್ಯಕ್ರಮಕ್ಕೆ ವಿಶೇಷ ಅತಿಥಿಗಳಾಗಿ ಡಾ: ಲಲಿತ ಭಾಸ್ಕರ್, ಖ್ಯಾತ ವೈದ್ಯರು, ಶ್ರೀಮತಿ ಶಾಂತ ಕುಮಾರಿ, ಖ್ಯಾತ ಸಾಹಿತಿಗಳು, ಶ್ರೀ. ಎಸ್. ರವಿಂದ್ರ, ಭರತ್ ಕಶ್ಯಪ್ ಟ್ರಸ್ಟ್ ,ಶ್ರೀ. ರವಿಶಂಕರ್, ಶ್ರೀ.ಶಂಕರ್ ಭಟ್, ಶ್ರೀ. ಶ್ರೀಕಂಠ ಗುಂಡಪ್ಪ ಆಗಮಿಸಿದ್ದರು.

ರಾಜ್ಯೋತ್ಸವ ಕಾರ್ಯಕ್ರಮದ ಜೊತೆಗೆ ರಕ್ತದಾನ ಶಿಬಿರ ಅಯೋಜಿಸಲಾಗಿತ್ತು.
ಕಾರ್ಯಕ್ರಮದಲ್ಲಿ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿತ್ತು. ಪ್ರಗತಿ ಸಿಂಡಿಕೇಟ್ ನ ವಿವಿಧ ಶಾಖೆಗಳಾದ ಮತ್ತಿಕೆರೆ , ಮಲ್ಲೇಶ್ವರಂ, ಸಂಜಯನಗರ ತಂಡಗಳಿಂದ ಸಾಂಸ್ಕೃತಿಕ ಕಾರ್ಯಕ್ರಮಗಳು ಭಾಗವಹಿಸಿದ್ದವು. ಮಲ್ಲೇಶ್ವರಂ ತಂಡಕ್ಕೆ ಪ್ರಥಮ ಬಹುಮಾನ,ಸಂಜಯನಗರ ತಂಡಕ್ಕೆ ದ್ವಿತೀಯ ಬಹುಮಾನ ದೊರಕಿದವು.

ಇಡೀ ಕಾರ್ಯಕ್ರಮವು ಶ್ರೀ. ಕೆ.ಜಿ. ಶ್ರೀನಿವಾಸಮೂರ್ತಿ ಹಾಗು ಶ್ರೀ. ಸಿ.ಎನ್.ರಮೇಶ್ ನೇತೃತ್ವದಲ್ಲಿ ಯಶಸ್ವಿಯಾಗಿ ನೆರವೇರಿತು

ಚಿತ್ರಗಳು:

ಹೆಚ್ಚಿನ ಚಿತ್ರಗಳಿಗೆ ಇಲ್ಲಿ ಕ್ಲಿಕ್ಕಿಸಿ:
http://picasaweb.google.com/loyalvares/PragathiSyndicateKannadaRajyotsava_16Nov08?authkey=x2SBPN9zWFw#

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಓರೆಕಲ್ ನಾಡ ಹಬ್ಬ

2008-12-03T04:51:00.001-08:00

ಸಂಸ್ಥೆ: ಓರೆಕಲ್ , ಬೆಂಗಳೂರು
ದಿನಾಂಕ: 27 ನವೆಂಬರ್ 2008

ಕರ್ನಾಟಕ ರಾಜ್ಯೋತ್ಸವವನ್ನು ೨೭-ನವಂಬರ್-೨೦೦೮ ರಂದು ಓರೇಕಲ್ನಲ್ಲಿ ಅದ್ದೂರಿಯಾಗಿ ಆಚರಿಸಲಾಯಿತು. ಈ ಪ್ರಯುಕ್ತ ನಡೆಸಿಕೊಟ್ಟ ರಸಸಂಜೆಯು ಸುಮಾರು ೧೫೦ ಜನರನ್ನು ೨ ಗಂಟೆಗಳ ಕಾಲ ರಂಜಿಸಿತು. ಕಾರ್ಯಕ್ರಮವನ್ನು ದೀಪ ಬೆಳಗಿಸುವದರೊಂದಿಗೆ ಪ್ರಾರಂಭಿಸಲಾಯಿತು, ಹಿನ್ನೆಲೆಯಲ್ಲಿ ಮೂಡಿಬಂದ "ಹಚ್ಚೇವು ಕನ್ನಡದದೀಪ" ಸಂದರ್ಭಕ್ಕೆ ತಕ್ಕದಾಗಿತ್ತು.

ಕರ್ನಾಟಕ ಇತಿಹಾಸದ ಹಾಗೂ ಕರ್ನಾಟಕ ಏಕೀಕರಣದ ಸಂಕ್ಷಿಪ್ತ ವಿವರಣೆಯು ಕರ್ನಾಟಕ ರಾಜ್ಯೊತ್ಸವಾಚರಣೆಯ ಔಚಿತ್ಯವನ್ನು ಸಾರಿತು. ಪುಟ್ಟ ಮಗು ಸಂಜನಾಳ "ಕಟ್ಟೇವು ಕಂಕಣವ" ಹಾಡು ಸುಶ್ರಾವ್ಯವಾಗಿತ್ತು. ಕನ್ನಡದ ಉಳಿವು ಮತ್ತು ಬೆಳವಣಿಗೆಗಾಗಿನ ಕವಿವಾಣಿಯ ಕಳಕಳಿಯ ಕರೆ ಸಭಿಕರನ್ನು ಆತ್ಮಾವಲೋಕನಕ್ಕೆ ಒರೆಹಚ್ಚಿತು.

"ಆಪಾರಕೀರ್ತಿ ಗಳಿಸಿ ಮೆರೆವ ಭವ್ಯ ನಾಡಿದು", ಹಾಡಿಗೆ ಪ್ರೇಕ್ಷಕರು ಮಂತ್ರಮುಗ್ದರಾದರು. ರಾಜ್ಯೋತ್ಸವದ ಪೂರ್ವಭಾವಿಯಾಗಿ ನಡೆದ, ಪದಬಂಧ, ಕನ್ನಡ ವ್ಯಾಕರಣ, ವ್ಯವಹಾರಿಕ ಕನ್ನಡ, ಕನ್ನಡ ಕೈಬರಹ ಸ್ಪರ್ಧೆಗಳು ಕಂಪನಿಯಲ್ಲಿ ಹಬ್ಬದವಾತಾವರಣ ಸೃಷ್ಟಿಸಿದವು.

ಸಭಿಕರಿಗಾಗೇ ನಡೆಸಿದ "ಥಟ್ಟಂತ ಹೇಳಿ" ರಸಪ್ರಶ್ನಾವಳಿಗಳಿಗೆ, ಮುಗಿಬಿದ್ದು ಉತ್ತರಿಸಿ ಪುಸ್ತಕವನ್ನು ಬಹುಮಾನವಾಗಿ ಪಡೆದರು. "ಚೋಮನದುಡಿ", "ನನ್ನದೇವರು", "ಕೊಳಲು", "ದೇವರು", "೩೦ ದಿನಗಳಲ್ಲಿ ಕನ್ನಡಕಲಿಯಿರಿ" ಹೀಗೆ ಹಲವು ಅಪರೂಪದ ಪುಸ್ತಕಗಳನ್ನು ನೀಡಲಾಯಿತು. ಆಶುಭಾಷಣದ ವಿಷಯಗಳು ಹತ್ತು ಹಲವು ಚರ್ಚೆ ವಿಚರ್ಚೆಗಳಿಗೆ ಗ್ರಾಸವಾಯಿತು. ಸಮಾಜ ಸೇವಕರ ಸಮೀತಿಯ ಸಹಯೊಗದೊಂದಿಗೆ ಕನ್ನಡ ಕಗ್ಗಗಳ "ಟೀ ಶರ್ಟ"ಗಳನ್ನು ನೂರಾರು ನೊಂದಾಯಿತ ಆಸಕ್ತರಿಗೆ ಹಂಚಲಾಯಿತು. ಈ "ಟೀ ಶರ್ಟ"ಗಳನ್ನು ಧರಿಸಿಬಂದ ಉತ್ಸಾಹಿ ಪ್ರೇಕ್ಷಕರಿಂದ ಸಭೆಗೆ ಕಳೆಕಟ್ಟಿತ್ತು. "ಕಾರಂತ", ಕುವೆಂಪು", "ಬೇಂದ್ರೆ", "ಮಾಸ್ತಿ" "ಸುಧಾ ಮೂರ್ತಿ", "ಪೂಚಂತೆ" ಹೀಗೆ ಹಲವು ಕನ್ನಡ ಸಾಹಿತಿಗಳ ಪುಸ್ತಕಗಳನ್ನು ಪ್ರರ್ದಶನಕ್ಕೆ ಇಡಲಾಗಿತ್ತು. "ಕುಮಾರ ವ್ಯಾಸ ಮತ್ತು ತಿಮ್ಮಣ್ಣ ಕವಿಯ ಗದುಗಿನ ಭಾರತ", ಅಪರೂಪ ಪುಸ್ತಕಗಳೂ ಪ್ರದರ್ಶನಕಿದ್ದವು. ಈ ಏಲ್ಲಾ ಕಾರ್ಯಕ್ರಮಗಳಲ್ಲಿ ಕನ್ನಡೇತರರೂ ಉತ್ಸಾಹದಿಂದ ಪಾಲ್ಗೊಂಡರು.

ಅಚ್ಚುಕಟ್ಟಾಗಿ ಆಯೋಜಿಸಿದ ಈ ಸುಂದರ ಸಾಂಸ್ಕ್ರತಿಕ ರಸಸಂಜೆ ಮನೋರಂಜನೆಯೊಂದಿಗೆ, ಕನ್ನಡ, ಕರ್ನಾಟಕದ ಇತಿಹಾಸದ ಬಗ್ಗೆ ಜಾಗ್ರತಿಯುಂಟುಮಾಡಿತು. ಈ ಒಂದು ಪ್ರಯತ್ನ ಮಾಹಿತಿ ತಂತ್ರಜ್ಞಾನ ಉದ್ಯಮದಲ್ಲಿ ಕರ್ನಾಟಕದ ಬಗ್ಗೆ ಇರುವ ಕಳಕಳಿಯು ಹೆಮ್ಮರವಾಗಿ ಬೆಳೆಯಲಿ ಎಂಬ ಅಶಾ ಭಾವನೆ ಈ ಕಾರ್ಯಕ್ರಮದ ಉದ್ದೇಶವಾಗಿತ್ತು. ಕಾರ್ಯಕ್ರಮವು ಕರ್ನಾಟಕದ ನಾಡಗೀತೆ "ಜೈ ಭಾರತ ಜನನಿಯ ತನುಜಾತೆ" ಹಾಡಿನೊಂದಿಗೆ ಸಮಾರೋಪವಾಯಿತು.

ಚಿತ್ರಗಳು:

ಇನ್ನಷ್ಟು ಚಿತ್ರಗಳಿಗೆ ಇಲ್ಲಿ ಕ್ಲಿಕ್ಕಿಸಿ:
http://picasaweb.google.com/nandisha/KarnatakaRajyotsava#

ಧನ್ಯವಾದಗಳು,
ಓರೆಕಲ್ ಕನ್ನಡಿಗರು

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಇನ್ ಟೆಕ್ ಟೆಲಿಕಾಂ ಸಿಸ್ಟೆಮ್ಸ್ ನಾಡ ಹಬ್ಬ

2008-12-02T08:37:00.000-08:00

ಸಂಸ್ಥೆ: ಇನ್ ಟೆಕ್ ಟೆಲಿಕಾಂ ಸಿಸ್ಟೆಮ್ಸ್, ಬೆಂಗಳೂರು
ದಿನಾಂಕ: 16 ನವೆಂಬರ್ 2008

ಎಲ್ಲರಿಗೂ ನಮಸ್ಕಾರ,

ನಮ್ಮ ಕಚೇರಿ ಇನ್ ಟೆಕ್ ಟೆಲಿಕಾಂ ಸಿಸ್ಟೆಮ್ಸ್ ನಲ್ಲಿ , ದಿನಾಂಕ ೦೬-೧೧-೨೦೦೮ ರಂದು ಕನ್ನಡ ರಾಜ್ಯೋತ್ಸವ ಆಚರಿಸಿದೆವು. ಮುಂಜಾನೆ ಸರಿಯಾಗಿ ೧೦.೩೦ ಕ್ಕೆ ಭುವನೇಶ್ವರಿ ದೇವಿಯ ಪೂಜೆಯೊಂದಿಗೆ ಕಾರ್ಯಕ್ರಮ ಆರಂಭವಾಯ್ತು. ನಮ್ಮ ಕಛೇರಿಯ ಎಲ್ಲ ಕನ್ನಡಿಗರು ಹಾಗೂ ಕನ್ನಡೇತರರು ಸೇರಿ ನಾಡಗೀತೆಯನ್ನು ಹಾಡುವುದರ ಮೂಲಕ , ಭಾರತಾಂಬೆ ಹಾಗು ಕನ್ನಡ ತಾಯಿಯ ಜೈ ಜೈ ಕಾರದೊಂದಿಗೆ ನಮ್ಮ ನಾಡಹಬ್ಬವನ್ನು ಆಚರಿಸಲಾಯ್ತು.

ನಮ್ಮ ಕನ್ನಡ ಬಳಗ ಹಾಗೂ ಕನ್ನಡೇತರರು ವಿಶೇಷವಾಗಿ ಸಿದ್ಧಪಡಿಸಲಾದ ಟೀ ಶರ್ಟ್ ಗಳನ್ನು ಧರಿಸಿ ಬಂದಿದ್ದು ಒಂದು ವಿಶೇಷವಾಗಿತ್ತು. ಕಾರ್ಯಕ್ರಮದಲ್ಲಿ ಪೂಜೆಯ ನಂತರ ನಮ್ಮ ಸಹೋದ್ಯೋಗಿಯೊಬ್ಬರು ಕನ್ನಡ ನಾಡಹಬ್ಬದ ಆಚರಣೆ , ಅವಶ್ಯಕತೆ ಹಾಗೂ ಕನ್ನಡ ಏಕೀಕರಣದ ಬಗ್ಗೆ ಮಾತನಾಡಿದರು.
ನೆರೆದ ಎಲ್ಲ ಜನ ಸಮೂಹಕ್ಕೆ ಫಲ, ಪುಷ್ಪ ಹಾಗೂ ಸಿಹಿ ತಿಂಡಿ ಗಳನ್ನು ಹಂಚಲಾಯ್ತು. ಧಾರವಾಡದ ಪೇಡಾ ಹಾಗೂ ಖಾರ ಬಹು ಜನರ ಮೆಚ್ಚುಗೆಗೆ ಪಾತ್ರವಾಯ್ತು.

ಕೊನೆಯಲ್ಲಿ ನಡೆದ ವಿಶೇಷ ಫೋಟೋ ಸೆಶನ್ ನಮ್ಮ ಕಾರ್ಯಕ್ರಮಕ್ಕೆ ರಂಗು ತಂದಿತು. ಇದು ಅಲ್ಲದೆ , ನಾಡಹಬ್ಬದ ಅಂಗವಾಗಿ ತಯಾರಿಸಲಾದ ವಿಶೇಷ ನಿರೂಪಣೆ ದಿನವಿಡೀ ನಮ್ಮ ಕಛೇರಿಯ ಮುಖ್ಯ ದ್ವಾರದ ಎಲ್ಸಿಡಿ ಪ್ರೊಜೆಕ್ಟರ್ ನಲ್ಲಿ ಬಿತ್ತರಗೊಂಡಿದ್ದು ಮತ್ತೊಂದು ವಿಶೇಷತೆಯಾಗಿತ್ತು.

ಧನ್ಯವಾದಗಳೊಂದಿಗೆ,
ಇನ್ ಟೆಕ್ ಕನ್ನಡ ಬಳಗ

ಚಿತ್ರಗಳು:

ಕಾರ್ಯಕ್ರಮದ ಎಲ್ಲ ಭಾವಚಿತ್ರಗಳನ್ನು ನೋಡಲು ಇಲ್ಲಿ ಕ್ಲಿಕ್ಕಿಸಿ ..

http://picasaweb.google.co.in/rajmtech/KannadaRajyotsavaPart1#

http://picasaweb.google.co.in/rajmtech/KannadaRajyotsavaPart2#

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಇನಫೋಸಿಸ್ ಮೈಸೂರು ನಾಡ ಹಬ್ಬ

2008-12-01T08:48:00.000-08:00

ಇನಫೋಸಿಸ್ ಬೆಂಗಳೂರು ನಾಡ ಹಬ್ಬ

2008-11-30T08:19:00.000-08:00

ಸಂಸ್ಥೆ: ಇನಫೋಸಿಸ್, ಬೆಂಗಳೂರು
ದಿನಾಂಕ: 13 ನವೆಂಬರ್ 2008

ನಮಸ್ಕಾರ,

ನವೆಂಬರ್ ೧೩ ರಂದು ಬೆಂಗಳೂರಿನ ಸಾಫ್ಟ್ ವೇರ್ ಕಂಪನಿಯಾದ ಇನಫೋಸಿಸ್ ಮೊಟ್ಟ ಮೊದಲ ಬಾರಿಗೆ ತನ್ನ ಆವರಣದಲ್ಲಿ "ಕನ್ನಡ ರಾಜ್ಯೋತ್ಸವ" ಆಚರಿಸಿ ಒಂದು ಇತಿಹಾಸ ನಿರ್ಮಿಸಿದೆ. ಅಧ್ಯಕ್ಷತೆ ವಹಿಸಿದ ಶ್ರಿಮತಿ ರಮಾ ಎನ್. ಎಸ್. ರವರು ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.

ಇನಫೋಸಿಸ್ ನ "ಶೃತಿ" ತಂಡ ಶಾಸ್ತ್ರೀಯ ಸಂಗೀತದಿಂದ ನೀಡಿದ ಹುರುಪನ್ನು "ಲಯ ತರಂಗ" ತಂಡ ಆಧುನಿಕ ರೀತಿಯಲ್ಲಿ ಅದ್ಭುತವಾಗಿ ನುಡಿಸಿ ಪ್ರೇಕ್ಷಕರನ್ನು ಹಿಡಿದಿಟ್ಟಿತು. ಇದಕ್ಕೆ ತಕ್ಕಂತೆ "ಕರ್ನಾಟಕದ ಮಹಿಳೆಯರು" ಮತ್ತು "ಸ್ಟೆಪ್ಸ್" ನೃತ್ಯ ತಂಡಗಳ ಪ್ರದರ್ಶನ ನೆರೆದಿದ್ದ ಜನರನ್ನು ಬೇರೆಯ ಲೋಕಕ್ಕೆ ಕರೆದೊಯ್ಯಿತು.

ಒಂದೂವರೆ ಘಂಟೆ ನಡೆದ ಕಾರ್ಯಕ್ರಮದಲ್ಲಿ ತುಂಬಿದ ಸಭೆಯ ಪ್ರೇಕ್ಷಕರು ತೃಪ್ತಿಯಿಂದ ಇನ್ನೊಂದು ರಾಜ್ಯೋತ್ಸವದ ನಿರೀಕ್ಷೆಯಲ್ಲಿ ತೆರಳಿದರು.

ಚಿತ್ರಗಳು:

ನಿಮ್ಮ,

ಇನ್ಫಿ ಕನ್ನಡಿಗರು

ಸಿಮನ್ಸ್ ಸಾಫ್ಟವೇರ್ ನಾಡ ಹಬ್ಬ

2008-11-29T10:32:00.000-08:00

ಸಂಸ್ಥೆ: ಸಿಮನ್ಸ್ ಸಾಫ್ಟವೇರ್, ಬೆಂಗಳೂರು
ದಿನಾಂಕ: 14 ನವೆಂಬರ್ 2008

ನಮಸ್ಕಾರ,

ಕಾರ್ಯಕ್ರಮ ಯಾವತ್ತು ಮಾಡೋದು? ಹೊಸದಾಗಿ ಏನೇನು ಮಾಡಬಹುದು? ಯಾವ್ಯಾವ ಸ್ಪರ್ಧೆಗಳು? ಮತ್ತು ಯಾರ್ಯಾರು ನಡೆಸಿಕೊಡ್ತಾರೆ…..ಆಸಕ್ತಿ ಇರೋವರೆಲ್ಲಾ ಸೇರಿಕೊಂಡು ಒಂದು ತಿಂಗಳು ಮುಂಚೆನೇ ಮಂತ್ರಾಲೋಚನೆ(discuss) ಮಾಡಿದ್ವಿ.

ಈ ಸಲ ಹೊಸದಾಗಿ ಮಾಡಿದ್ದರ ಬಗ್ಗೆ ಹೇಳ್ಬೇಕು ಅಂದ್ರೆ.......ನಮ್ಮ ಕನ್ನಡ ಮಹನೀಯರ ಬಗ್ಗೆ ತಿಳಿದುಕೊಳ್ಳುವ/ತಿಳಿಸುವ ಕೆಲಸ! ಮಂತ್ರಾಲೋಚನೆಯಲ್ಲಿ ಕೆಳಗಿನ ಕ್ಷೇತ್ರಗಳಲ್ಲಿ ಸಾಧನೆಗೈದ ಹಲವಾರು ಕನ್ನಡ ಮಹನೀಯರ ಒಂದು ದೊಡ್ಡ ಪಟ್ಟಿ ಮಾಡಿದ್ವಿ, ರಾಜ/ರಾಣಿಯರು,ದಾಸರು,ವಚನಗಾರರು,ಸಾಹಿತಿಗಳು,ಕವಿಗಳು(ಹಳ/ನಡು/ಹೊಸಗನ್ನಡದ), ವಿಜ್ಞಾನಿಗಳು,ತಂತ್ರಜ್ಞರು, ಕ್ರೀಡಾಳುಗಳು,ಸಂಗೀತಗಾರರು, ಚಲನಚಿತ್ರಗಾರರು……ಮುಂತಾದವರು. ಆ ಮಹನೀಯರ ಫೋಟೋದೊಂದಿಗೆ, ಅವರ ಕಿರು ಪರಿಚಯ ಮತ್ತು ಸಾಧನೆಗಳ ಬಗ್ಗೆ ಒಂದು ಹಾಳೆಯಷ್ಟು ವಿಚಾರವನ್ನ ಚಿಕ್ಕದಾಗಿ ಚೊಕ್ಕವಾಗಿ ಕನ್ನಡ ಮತ್ತು ಇಂಗ್ಲೀಷ್ನಲ್ಲಿ ಬರೆಯೋದು/ಸಂಗ್ರಹಿಸೋದು.

ನಾವೆಲ್ಲರೂ ನಮ್ಮ ಮೆಚ್ಚಿನ ಮಹನೀಯರನ್ನ ಆಯ್ಕೆ ಮಾಡ್ಕೊಂಡು ಬರೆದು ಮುಗಿಸಿದ್ವಿ. ನಾನು ಮೊದಲು ಬರೆದದ್ದು ನನ್ನ ನೆಚ್ಚಿನ ಕೆ.ಎಸ್.ನ.ರ ಬಗ್ಗೆ, ನಂತರ ಶಿಶುನಾಳ ಶರೀಫ, ಬಿ.ಎಂ.ಶ್ರೀ, ಮಾಸ್ತಿಯವರ ಬಗ್ಗೆ ಬರೆದೆ.

ಹೀಗೆ ಸಂಗ್ರಹಿಸಿದ ಲೇಖನಗಳನ್ನ ದಿನಕ್ಕೆ ಒಂದರಂತೆ ನವೆಂಬರ್ ತಿಂಗಳಿಡೀ ಕನ್ನಡ ಮಹನೀಯರ ಬಗ್ಗೆ ಕನ್ನಡ ಮತ್ತು ಇಂಗ್ಲಿಷ್ನಲ್ಲಿರೋ ಲೇಖನವನ್ನ ನಮ್ಮಾಫೀಸ್ನಲ್ಲಿರೋವ್ರಿಗೆಲ್ಲಾ (ಸುಮಾರು 4 ಸಾವಿರ ಜನ ಅಂದ್ಕೊಳ್ಳಿ!) ಕಳಿಸೋದು. ಇದಕ್ಕೆ ತುಂಬಾ ಒಳ್ಳೆಯ ಪ್ರತಿಕ್ರಿಯೆಗಳು ಬಂದವು. ಕನ್ನಡಿಗರಷ್ಟೇ ಅಲ್ದೆ ಎಲ್ಲರಿಂದಲೂ ಪ್ರತಿಕ್ರಿಯೆ ಬಂದದ್ದು ಕಂಡು ಬಹಳ ನಲಿವಾಯ್ತು.

ಒಂದು ವಿಚಾರ ಮರೀದೆ ಬರೆಯಬೇಕು ಅದೇನಂದ್ರೆ ಈ ಲೇಖನಗಳನ್ನ ಸಂಗ್ರಹಿಸುವಾಗ ನೆರವು ತೆಗೆದುಕೊಂಡದ್ದು ಕನ್ನಡ ವಿಕಿಪೀಡಿಯಾದಿಂದ. ಅಲ್ಲಿ ಬರೆದ ಎಲ್ಲಾ ಲೇಖಕರಿಗೂ ಮತ್ತು ಕನ್ನಡ ವಿಕಿಪೀಡಿಯಾದ ಬೆನ್ನೆಲುಬಾದ ನಮ್ಮ ಹರಿಪ್ರಸಾದ್ ನಾಡಿಗರಿಗೆ ವಂದನೆಗಳು.

(ಕಳೆದ ವರ್ಷದ ವಿಚಾರ ಏನಂದ್ರೆ 'ಕನ್ನಡ coffee' ಅಂತ ‘ಕನ್ನಡ ಕಲಿಸುವ ಕ್ಲಾಸ್’ ನಡೆಸಿದ್ದು. ಸುಮಾರು ಸಹೋದ್ಯೋಗಿಗಳು ಕನ್ನಡ ಮಾತಾಡೋದನ್ನ ಕಲಿತದ್ದು ಸಂತಸದ ವಿಚಾರ. )

ನವೆಂಬರ್ ಮೊದಲ ವಾರದಿಂದ ಯೋಜನೆಯಂತೆ ಎಲ್ಲಾ ಸ್ಪರ್ಧೆಗಳು ಸಾಂಗವಾಗಿ ನಡೆದವು. ಸ್ಪರ್ಧೆಗಳಲ್ಲಿ,

ಶತ ಪ್ರತಿಶತ ಕನ್ನಡ - ಇದು ಒಂದು ನಿಮಿಷದ ಸ್ಪರ್ಧೆ. ಪ್ರಶ್ನೆಗಳನ್ನ ಕನ್ನಡ/ಇಂಗ್ಲೀಷ್/ಕಂಗ್ಲೀಷ್ನಲ್ಲಿ ಕೇಳಲಾಗುತ್ತೆ….ಆದ್ರೆ ಉತ್ತರ ಮಾತ್ರ ಪೂರ್ತಿ ಕನ್ನಡದಲ್ಲೆ ಹೇಳ್ಬೇಕು ಸಕತ್ ಮಜಾ ಇತ್ತು!
ಕವನ, ಹನಿಗವನ, ಚುಟುಕ ಸ್ಪರ್ಧೆ
ಚುಕ್ಕಿ ಚಿತ್ತಾರ - ರಂಗೋಲೆ ಸ್ಪರ್ಧೆ
ಬರವಣಿಗೆ - ಕನ್ನಡ/ಕರ್ನಾಟಕದ ಬಗ್ಗೆ ಕೊಡುವ ಚಿತ್ರಪಟದ ಬಗ್ಗೆ ಒಂದು ನಿಮಿಷದಲ್ಲಿ ಲೇಖನ ಬರೆಯುವುದು.
ಕನ್ನಡ ಮಹನೀಯರ ಚಿತ್ರ, ಪರಿಸರದ ಚಿತ್ರ, ವ್ಯಂಗ್ಯ ಚಿತ್ರ ಬಿಡಿಸುವ ಸ್ಪರ್ಧೆ

ಇನ್ನು ಕಾರ್ಯಕ್ರಮದ ದಿನ 14 ನವೆಂಬರ್ 2008ರ ಬಗ್ಗೆ ಹೇಳ್ಬೇಕು ಅಂದ್ರೆ ಒಂಥರಾ ಹಬ್ಬದ ವಾತಾವರಣ. ರಂಗೊಲೆ,ಮಾವಿನ ತೋರಣದಿಂದ ಅಲಂಕೃತಗೊಂಡ ಸಭಾಂಗಣ ನಮ್ಮೆಲ್ಲರ ಸಡಗರವನ್ನ ಹಿಮ್ಮಡಿಗೊಳಿಸುತ್ತಿತ್ತು. ದ್ವಾರದಲ್ಲೇ ಕರ್ನಾಟಕದ ನಕಾಶೆಯನ್ನ ಬಣ್ಣಗಳಿಂದ ಬಿಡಿಸಿದ್ದರು. ಎಲ್ಲಾ ಹೆಣ್ಮಕ್ಕಳು ರೇಷ್ಮೆ ಸೀರೆಯಲ್ಲಿದ್ದರೆ ಗಂಡುಮಕ್ಕಳು ಅಂಗಿ,ಪಂಚೆ ಶಲ್ಯದಲ್ಲಿದ್ದರು. ಕಾರ್ಯಕ್ರಮ ಶುರುವಾಗೋ ಹೊತ್ತಿಗೆ ಸಭಾಂಗಣ ಪೂರ್ತಿ ತುಂಬಿ ತುಳುಕುತ್ತಿತ್ತು.

ನಡೆದ ಕಾರ್ಯಕ್ರಮಗಳು ಹೀಗಿದ್ದವು:

'ತಾಯೆ ಶಾರದೆ ಲೋಕ ಪೂಜಿತೆ' ಪ್ರಾರ್ಥನೆಯಿಂದ ಶುರುವಾದದ್ದು,
'ಹಚ್ಚೇವು ಕನ್ನಡದ ದೀಪಾ' ನೃತ್ಯ
'ತಾಯೆ ಬಾರಾ ಮೊಗವ ತೋರ' ಹಾಡು.
ಹಳೆ ಕನ್ನಡ ಚಲನಚಿತ್ರದ ಹಾಡುಗಳಿಗೆ ನೃತ್ಯ.
ಹುಡುಗರು ಮತ್ತು ಮೇಷ್ಟ್ರ ಇಸ್ಕೂಲಿನ ಕಿರು ಹಾಸ್ಯ ನಾಟಕ.
ಕೈಲಾಸಕ್ಕೂ recession ತಪ್ಪಿದ್ದಲ್ಲ ಅನ್ನೋ ಒಂದು ಕಿರು ಹಾಸ್ಯ ನಾಟಕ…
ನಮ್ಮಾಫೀಸಿನ 'ಬೀಚಿ' ಅಂತಲೇ ಪ್ರಸಿದ್ದಿಯಾಗಿರುವ ರಾಘವೇಂದ್ರರಿಂದ ಹಾಸ್ಯ ಭಾಷಣ. ಅದೆಷ್ಟು ನಕ್ಕಿದ್ದು ಅಂತೀರಿ...ಚಪ್ಪಾಳೆ ಮೇಲೆ ಚೆಪ್ಪಾಳೆ

ಚಿತ್ರಕಲೆ ಪ್ರದರ್ಶನ ಇತ್ತು. ಅಲ್ಲಿ ನನ್ನ ದ್ಯುತಿ ಸಂಶ್ಲೇಷಣೆ ಕ್ರಿಯೆ ಚಿತ್ರ ಕೂಡ ಇತ್ತು

ಮೂರು ದಿನಗಳವರೆಗೆ ಟೋಟಲ್ ಕನ್ನಡ ಡಾಟ್ ಕಾಂ ಅವರ ಕನ್ನಡ ಪುಸ್ತಕಗಳು,T ಅಂಗಿ,ಹಾಡು,ಚಲನ ಚಿತ್ರಗಳ ಸಿಡಿ/ಡಿವಿಡಿಗಳ ಮಾರಾಟ ಮಳಿಗೆ ಇಟ್ಟಿದ್ರು. ಇಷ್ಟೆಲ್ಲಾ ಓದಿದ ಮೇಲೆ ನಿಮ್ಮಲ್ಲಿ ಕೆಲವು ಪ್ರಶ್ನೆಗಳು ಕಾಡಿರಬಹುದು.ಉತ್ತರಗಳನ್ನ ಮೊದಲೇ ತಿಳಿಸುವೆ. ಇಲ್ಲ ಬಹಳ ವರ್ಷಗಳಿಂದ ಅಲ್ಲ…ಕನ್ನಡ ರಾಜ್ಯೋತ್ಸವದ ಆಚರಣೆಯನ್ನ ಮೂರು ವರ್ಷಗಳ ಹಿಂದೆ ಅಷ್ಟೆ ಶುರು ಮಾಡಿದ್ದು. ಪ್ರತಿ ವರ್ಷ ಕನ್ನಡ ರಾಜ್ಯೋತ್ಸವ ಮತ್ತು ಯುಗಾದಿ ಹಬ್ಬಕ್ಕೊಂದು ಕನ್ನಡದ ನಾಟಕ ಇವೆರಡನ್ನ ಮಾತ್ರ ವಿಶೇಷವಾಗಿ ಆಚರಿಸಲಾಗತ್ತೆ. ಸ್ಪರ್ಧೆಗಳನ್ನ ಆಫೀಸ್ ಕೆಲಸದ ಸಮಯ ಮುಗಿದ ನಂತರವೇ ನಡೆಸಿದ್ದು.

ಇಷ್ಟೆಲ್ಲಾ ಕಾರ್ಯಕ್ರಮ ನಡೆಸೋದಕ್ಕೆ ಬೇಕಾದ ಹಣ...ಎಲ್ಲಾ ಸಹೃದಯ ಸಹೋದ್ಯೋಗಿಗಳ ಇಚ್ಛೆಯಂತೆ ನೀಡಿದ ದೇಣಿಗೆಯ ರೂಪದಲ್ಲಿ ಬಂದದ್ದು. ಕನ್ನಡಿಗ,ತಮಿಳ,ಹಿಂದಿ,ತೆಲುಗ,ಮಲೆಯಾಳಿ ಅನ್ನೋ ಭಾವವೇನೂ ಇರಲಿಲ್ಲ! ಹತ್ತಿರ ಹತ್ತಿರ ಒಂದು ಲಕ್ಷ ರೂಪಾಯಿಗಳು ಸಂಗ್ರಹವಾಯ್ತು...ಕಾರ್ಯಕ್ರಮಕ್ಕೆ ಮಿತವಾಗಿ ಖರ್ಚು ಮಾಡಿ ಉಳಿದಷ್ಟು ಹಣವನ್ನ ಇತ್ತೀಚೆಗೆ ರಸ್ತೆ ಅಫಘಾತದಲ್ಲಿ ದುರ್ಮರಣ ಹೊಂದಿದ ನಮ್ಮ ಸಹೋದ್ಯೋಗಿಯ ಕುಟುಂಬಕ್ಕೆ ನೀಡಿದೆವು.

ಆಫೀಸಿನ ಮ್ಯಾನೇಜ್ಮೆಂಟ್ ನವೆಂಬರ್ ತಿಂಗಳಿನ 14ನೇ ತಾರೀಖಿನ ಮಧ್ಯಾಹ್ನದ ಎರಡು ಗಂಟೆಗಳಷ್ಟು ಕಾಲವನ್ನ ಎಲ್ಲಾ ಸಹೋದ್ಯೋಗಿಗಳೂ ಕಾರ್ಯಕ್ರಮದಲ್ಲಿ (ಆಯೋಜಿಸಲು) ಭಾಗವಹಿಸಲು ….ಅನುಮತಿ/ಅನುಕೂಲ ಮಾಡಿಕೊಟ್ಟಿದ್ದರು. ಅದಕ್ಕೆ ನಾವುಗಳು ಋಣಿ.

ಧನ್ಯವಾದಗಳು.

-ಸಿಮನ್ಸ್ ಕನ್ನಡಿಗರು

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ಸಿಂಫೋನಿ ಸರ್ವಿಸಸ್ ನಲ್ಲಿ ನಾಡ ಹಬ್ಬ

2008-11-29T10:06:00.000-08:00

ಸಂಸ್ಥೆ: ಸಿಂಫೋನಿ ಸರ್ವಿಸಸ್, ಬೆಂಗಳೂರು
ದಿನಾಂಕ: 6 ನವೆಂಬರ್ 2008

ಎಲ್ಲರಿಗೂ ನಮಸ್ಕಾರ,

ದಿನಾಂಕ 06/11/2008 ರಂದು, ನಾವು ನಮ್ಮ ಸಿಂಫೋನಿಯಲ್ಲಿ ರಾಜ್ಯೋತ್ಸವವನ್ನು ಆಚರಿಸಿದೆವು. ಆ ದಿನ ಬೆಳಗ್ಗೆ 9:45 ಕ್ಕೆ ದೀಪ ಬೆಳಗಿಸುವುದರೊಂದಿಗೆ ಕಾರ್ಯಕ್ರಮ ಆರಂಭವಾಗಿ, ತದನಂತರ ಕಛೇರಿಯ ಆವರಣದಲ್ಲಿ ಡೊಳ್ಳು ಕುಣಿತವನ್ನ ಏರ್ಪಡಿಸಲಾಗಿತ್ತು. ನಂತರ ಸಂಜೆ ಸಾಂಸ್ಕ್ರುತಿಕ ಕಾರ್ಯಕ್ರಮವಿತ್ತು.

ಡೊಳ್ಳು ಕುಣಿತಕ್ಕೆ ಕಛೇರಿಯ ಎಲ್ಲರಿಂದಲೂ ( ಕನ್ನಡಿಗರಲ್ಲದವರಿಂದಲೂ) ತುಂಬಾ ಒಳ್ಳೆ ಪ್ರತಿಕ್ರಿಯೆ ಬಂದು, ರಾಜ್ಯೋತ್ಸವಾಚರಣೆ ತುಂಬಾ ಯಶಸ್ವಿಯಾಯಿತು. ಈ ಒಂದು ಯಶಸ್ವಿ ಕಾರ್ಯಕ್ರಮವನ್ನ ನಿಮ್ಮೊಂದಿಗೆ ಹಂಚಿಕೊಳ್ಳುವ ಆಸೆಯ ಫಲವಾಗಿ ಈ ಮಿಂಚೆ.

ರಾಜ್ಯೋತ್ಸವಾಚರಣೆ ಕುರಿತು ನಮ್ಮ ಕಛೇರಿಯ ಮುಖ್ಯಸ್ಥರಿಂದ(President, India Operations) ಬಂದ ಪ್ರತಿಕ್ರಿಯೆ:

Dear Colleagues,
Comes November month, people of Karnataka are in a joyous mood to celebrate the Karnataka Raajyotsava. In the month of November every year, the people of Karnataka commemorate the formation of state with several activities like, cultural, literary and folk dance which showcase the rich culture and heritage of Karnataka.

Today morning, I was overwhelmed with joy to see the celebrations arranged by our young Kannada colleagues starting with lighting the lamp , to the "Dollu Kunitha" dance. I am sure the rest of the events in the day will be as interesting and absorbing.

Karnataka have contributed immensely to the India's rich folkloric tradition also. It has the folk dances like: Yakshagaana, Veeragaase, Dollu Kunitha, Kamsaale Kunitha and others. Dollu Kunitha is a popular drum dance, which we enjoyed very much!. The large drums are decorated with colored cloth, and are slung around the necks of men. The dances are at times accompanied with songs relating to religious praise or wars. It spoke volumes of the rich traditions of India. I come from Bengal , which is also extremely rich in culture and traditions. I enjoyed every bit of the dance celebrations!

Karnataka's contribution to music is unparalleled. It developed a school of music that is called Karnatic School. Carnatic music spread all over south India and it is one of the two dominant musical styles in India. To top it all, Pandit Bhim Sen Joshi, one of the sons of the soil of Karnataka has been awarded the BHARAT RATNA award, something I am sure all Indians will feel proud of!

Karnataka has contributed in a great way for the rich monumental heritage of India in the form of Hampi, Pattadakallu, Badami, Beluru, Halebidu and others. Among these, Hampi and Pattadakallu are listed in the World Heritage Centers of UNESCO.

For the last 2.5 years I have adopted Bangalore and Karnataka as my adopted home. My children are now studying in Bangalore. My wife and me , along with our family, are liking and enjoying the rich traditions of Karnataka. Over the next year, we do hope to go around an savor this beautiful state.

I take this opportunity to salute this great tradition and culture and wish all Symphonians great times!

With Regards,
Amitava

ವಂದನೆಗಳು,
ಸಿಂಫೋನಿ ಕನ್ನಡಿಗರು

ಚಿತ್ರಗಳು:

ಹೆಚ್ಚಿನ ಚಿತ್ರಗಳಿಗೆ, ಈ ಕೆಳಗಿನ ಕೊಂಡಿ ಕ್ಲಿಕ್ಕಿಸಿ:
http://picasaweb.google.co.in/rudresha.hk/KarnatakaRaajyotsavaSymphonyServices?authkey=9I2YNm4b9gc#

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.

ನೆಸ್ ಟೆಕ್ನಾಲಜಿಸ್ ನಾಡ ಹಬ್ಬ

2008-11-29T09:56:00.000-08:00

ಸಂಸ್ಥೆ: ನೆಸ್ ಟೆಕ್ನಾಲಜಿಸ್, ಬೆಂಗಳೂರು
ದಿನಾಂಕ: ೮ ನವೆಂಬರ್ ೨೦೦೮

Namaskara,

A beautiful stage was arranged having a dias for people to perform, and a PPT depicting famous places and people from Karnataka. The whole of terrace was decorated with Kannad Bhavuta.

For lunch and snacks, we had ordered Kannada style food It started with kannada song, Hachevu Kannadada deepa, followed by Lighting of Jyothi , and speach by one of the senior level executive.

Then later on followed by many cultural programmes like, Skit, Fashion Show, Haadugalu, Kolalu Vaadana, Mimicry.... ella kannadadalli.

This function witnessed around 500 people, watching all the programmes till the end. It lasted for around 2.5 - 3 hours.

People behind the event:

Babu Narendra

Naveen Kumar from HR

Raghavendra from HR

Hemath Karuna

ಧನ್ಯವಾದಗಳು,

ನೆಸ್ ಕನ್ನಡಿಗರು

ಚಿತ್ರಗಳು:

ಸಿಸ್ಕೊ ಸಿಸ್ಟಮ್ಸ್ ನಲ್ಲಿ ನಾಡ ಹಬ್ಬ

2008-11-29T09:37:00.000-08:00

ಸಂಸ್ಥೆ: ಸಿಸ್ಕೊ ಸಿಸ್ಟಮ್ಸ್, ಬೆಂಗಳೂರು
ದಿನಾಂಕ: 14 ನವೆಂಬರ್ 2008

ನಮಸ್ಕಾರ,

ಸಂಭ್ರಮ,,, ಈ ಹೆಸರಲ್ಲಿಯೇ ಸಂತಸದ ಹೊಳೆ, ಹಬ್ಬದ ಕಳೆ ಇದೆ. ಸಿಸ್ಕೊ ಕಂಪನಿಯ ಕನ್ನಡ ಬಳಗ "ಸಂಭ್ರಮ" ಕಳೆದ ಶುಕ್ರವಾರ, ೧೪/೧೧/೨೦೦೮, ರಂದು ಅದ್ದೂರಿಯಾಗಿ ಕನ್ನಡದ ಹಬ್ಬವಾದ ರಾಜ್ಯೋತ್ಸವವನ್ನು ಆಚರಿಸಿತು. ಕಾರ್ಯಕ್ರಮಕ್ಕೆ ಬೆಂಗಳೂರಿನ ಸಿಸ್ಕೊ ಕಂಪನಿಯ ಎಲ್ಲ ಕಚೇರಿಗಳು ಮದುಮಗಳಂತೆ ಅಲಂಕೃತಗೊಂಡಿದ್ದವು.

ಈ ಸಮಾರಂಭಕ್ಕೆ ಮುಖ್ಯ ಅತಿಥಿಯಾಗಿ ಬಂದಿದ್ದವರು ಹಿರಿಯ ಸಾಹಿತಿಗಳಾದ ಶ್ರೀ ಸಾ. ಶಿ.ಮರುಳಯ್ಯನವರು. ಎಷ್ಟು ಹಿರಿಯ ಸಾಹಿತಿಯೋ ಅಷ್ಟೇ ಸಹೃದಯಿ, ಬಿಚ್ಚು ಮನಸ್ಸಿನ ನುಡಿಯವರು. ಸಿಸ್ಕೊ ಕನ್ನಡಿಗರೊಂದಿಗೆ ಸಾಮಾನ್ಯರಲ್ಲಿ ಸಾಮಾನ್ಯರಂತೆ ಬೆರೆತು ಹಬ್ಬಕ್ಕೆ ಇನ್ನಷ್ಟು ಮೆರುಗು ತಂದರು. ಸಮಾರಂಭದ ಮತ್ತೊಂದು ಆಕರ್ಷಣೆಯಂದರೆ, ಸಿಸ್ಕೋ ಸಂಸ್ಥೆಯ ಆಡಳಿತಾಧಿಕಾರಿ (ಭಾರತ), ಅರವಿಂದ್ ಸೀತಾರಾಮನ್ ರವರು ಆಗಮಿಸಿದ್ದು. ಅರವಿಂದ್ ಸೀತಾರಾಮನ್ ರವರು ಸಭೆಯನ್ನುದ್ದೇಶಿಸಿ ಮಾತನಾಡಿ, ಕರ್ನಾಟಕದ ಇತಿಹಾಸ, ಕಲೆ, ಸಂಸ್ಕೃತಿ, ಭವ್ಯ ಪರಂಪರೆಯ ಬಗ್ಗೆ ತಮಗಿರುವ ಅಪಾರ ಗೌರವವನ್ನು ತಮ್ಮ ಮಾತಿನಲ್ಲಿ ವ್ಯಕ್ತಪಡಿಸಿದರು.ಅಷ್ಟೇ ಅಲ್ಲದೇ, ಕರ್ನಾಟಕವನ್ನು ಆಳಿದ ಬೇರೆ ಬೇರೆ ಸಾಮ್ರಾಜ್ಯಗಳ ಬಗ್ಗೆ ನೆರೆದಿದ್ದ ಸಭಿಕರಿಗೆ ಪ್ರಶ್ನೆಗಳನ್ನು ಕೇಳಿ ಕರ್ನಾಟಕಕ್ಕಿರುವ ಭವ್ಯ ಇತಿಹಾಸವನ್ನು, ಅದನ್ನು ನಾವೆಲ್ಲರೂ ತಿಳಿಯಬೇಕಾದ ಅಗತ್ಯವನ್ನು ನೆರೆದಿದ್ದ ಎಲ್ಲರ ಮನದಲ್ಲಿ ತುಂಬುವಲ್ಲಿ ಯಶಸ್ವಿಯಾದರು. ಸಿಸ್ಕೊ ಕಂಪನಿಯಲ್ಲಿ , ಈ ಕನ್ನಡ ಹಬ್ಬ ಪ್ರತಿ ವರ್ಷ ತಪ್ಪದೇ ನಡೆಯಬೇಕು, ಅದಕ್ಕೆ ಬೇಕಾಗುವ ಎಲ್ಲ ಆರ್ಥಿಕ ನೆರವನ್ನು ತಾವು ನೀಡುವುದಾಗಿ ಘೋಷಿಸಿದ ಅವರ ಮಾತಿಗೆ ನೆರೆದ ಜನ ಸಿಳ್ಳೆ ಚಪ್ಪಾಳೆಯ ಮೂಲಕ ತಮ್ಮ ಹರ್ಷ ವ್ಯಕ್ತಪಡಿಸಿದರು.

ರತ್ನನ ಪದಗಳ ಮೂಲಕ ಕನ್ನಡಿಗರ ಮನದಲ್ಲಿ ಅಚ್ಚಳಿಯದೇ ನೆಲೆಸಿರುವ, ನಾಯಿ ಮರಿ ನಾಯಿ ತಿಂಡಿ ಬೇಕೇ? ಮುಂತಾದ ಹಲವಾರು ಸರಳ ಪದಗಳ ಮೂಲಕ ಚಿಣ್ಣರ ಸಾಹಿತ್ಯಕ್ಕೆ ಹೊಸ ಆಯಾಮವನ್ನೇ ಕೊಟ್ಟ ಕನ್ನಡದ ಖ್ಯಾತ ಸಾಹಿತಿ ಜಿ. ಪಿ. ರಾಜರತ್ನಂರವರ ಜನ್ಮ ಶತಮಾನೋತ್ಸವದ ಪ್ರಯುಕ್ತ ಸಮಾರಂಭದ ವೇದಿಕೆಯನ್ನು ಜಿ. ಪಿ. ರಾಜರತ್ನಂ ವೇದಿಕೆ ಎಂದು ನಾಮಕರಣ ಮಾಡಿ ಕಾರ್ಯಕ್ರಮವನ್ನು ಅವರಿಗೆ ಅರ್ಪಿಸಲಾಯಿತು. ಸಿಸ್ಕೊ ಕನ್ನಡಿಗರು ಪ್ರಸ್ತುತ ಪಡಿಸಿದ ಹಲವಾರು ಸಾಂಸ್ಕೃತಿಕ ಕಾರ್ಯಕ್ರಮಗಳು ಜನ ಮನ ಸೂರೆಗೊಂಡವು. ಸಂಭ್ರಮ ತಂಡ ನಡೆಸಿದ ರತ್ನನ ಪದಗಳನ್ನೇ ಆದರಿಸಿದ ಕಿರು ನಾಟಕ ವಿಶೇಷ ಮನ್ನೆಣೆಗೆ ಪಾತ್ರವಾಯಿತು. ಕನ್ನಡ ಸಾಹಿತ್ಯವನ್ನು ಪೋಷಿಸುವ ಧ್ಯೇಯದೊಂದಿಗೆ, ರಸ ಪ್ರಶ್ನೆ ವಿಜೇತರಿಗೆ ಕನ್ನಡ ಸಾಹಿತ್ಯ ಪರಿಷತ್ತಿನವರು ಪ್ರಕಟಿಸಿರುವ ಎರಡು ಪುಸ್ತಕ ಮಾಲಿಕೆಗಳನ್ನು ಕಾಣಿಕೆಯಾಗಿ ನೀಡಿದರು.

ಈ ನೆಲದ ಋಣ ಐ.ಟಿ ಕನ್ನಡಿಗನ ಮೇಲಿದೆ, ಕನ್ನಡ ಸಾಹಿತ್ಯ, ಸಂಗೀತ, ಸಿನೆಮಾ, ಮಾಧ್ಯಮವನ್ನು ಆತ ಬಳಸಬೇಕು, ಬೆಳೆಸಬೇಕು, ಎಲ್ಲೇ ಹೋದರೂ ಕನ್ನಡದಲ್ಲಿ ವ್ಯವಹರಿಸಲು ಹಿಂಜರಿಯಬಾರದು, ಇಷ್ಟಾದರೇ ಕರ್ನಾಟಕದ ಹೃದಯವಾದ ಬೆಂಗಳೂರಿನಲ್ಲಿ ಕನ್ನಡವನ್ನು ಅಳಿಸಲು ಯಾರಿಂದಲೂ ಆಗದು ಎನ್ನುವ ಸಂಭ್ರಮ ತಂಡದ ಹರೀಶಾ ಅವರ ಮಾತು ಸಭಿಕರನ್ನು ಚಿಂತನೆಗೆ ಹಚ್ಚಿತು. ಕಾರ್ಯಕ್ರಮದ ಕೊನೆಯಲ್ಲಿ ಎಲ್ಲರಿಗೂ ಕರ್ನಾಟಕದ ಬೇರೆ ಬೇರೆ ಭಾಗದ ವಿಶೇಷವನ್ನೊಳಗೊಂಡ ಭರ್ಜರಿ ಊಟ ಬಡಿಸಲಾಯಿತು. ತಮ್ಮ ಇಳಿ ವಯಸ್ಸಲ್ಲೂ, ಸಮಾರಂಭದ ಕೊನೆಯವರೆಗೂ ಹಾಜರಿದ್ದು, ಎಲ್ಲರೊಡನೆ ಬೆರೆತ ಸಾ.ಶಿಯವರು ನೆರೆದಿದ್ದ ಸಭಿಕರ ಗೌರವಕ್ಕೆ ಪಾತ್ರರಾದರು.

ವಂದನೆಗಳು,

ಸಿಸ್ಕೊ ಕನ್ನಡಿಗರು

ಚಿತ್ರಗಳು:

ವೇಲಂಕಣಿ ಸಾಫ್ಟವೇರ್ ನಲ್ಲಿ ನಾಡ ಹಬ್ಬ

2008-11-28T22:45:00.000-08:00

ಸಂಸ್ಥೆ: ವೇಲಂಕಣಿ ಸಾಫ್ಟವೇರ್ಸ್, ಬೆಂಗಳೂರು
ದಿನಾಂಕ: 8 ನವೆಂಬರ್ 2008

ಎಲ್ಲರಿಗೂ ನಮಸ್ಕಾರ,

ನಮ್ಮ ’ವೇಲಂಕಣಿ’ ಸಂಸ್ಥೆಯಲ್ಲಿ ನವಂಬರ್ ೮ ೨೦೦೮ ರಂದು ’ಕನ್ನಡ ರಾಜ್ಯೋತ್ಸವವನ್ನು’ ಉತ್ಸಾಹದಿಂದ ಆಚರಿಸಿದೆವು. ನಾನು ಈ ಸಂಸ್ಥೆ ಸೇರಿದಾಗಿನಿಂದ ಇದು ಎರಡನೆ ಕನ್ನಡ ರಾಜ್ಯೋತ್ಸವ. ದಿನಗಳು ಹೇಗೆ ಕಳೆಯುತ್ತಿವೆ ಅಂತ ಆಶ್ಚರ್ಯ ಆಗುತ್ತೆ. ನಿನ್ನೆ ಮೊನ್ನೆ ಅಷ್ಟೆ ನಾವು ಮೊದಲನೆ ರಾಜ್ಯೋತ್ಸವ ಮಾಡಿದೆವು ಅಂತ ಅನಿಸ್ತಿದೆ :) ಈ ಬಾರಿ ನಮ್ಮ ಮಾನವ ಸಂಪನ್ಮೂಲ ಇಲಾಖೆಯ ಸಹೋದ್ಯೋಗಿಗಳು ರಾಜ್ಯೋತ್ಸವವನ್ನು ಆಚರಿಸಲು ಅವರಾಗಿಯೇ ಮುಂದೆ ಬಂದು, ನಮಗೆ ಆ ದಿನ ನಡೆಯುವ ಕಾರ್ಯಕ್ರಮಗಳ ಬಗ್ಗೆ ತಿಳಿಸಿದರು. ಕಳೆದ ಬಾರಿಗೆ ಹೋಲಿಸಿದರೆ ಈ ಬಾರಿ ನಮ್ಮ ಸಹೋದ್ಯೋಗಿಗಳ ಉತ್ಸಾಹವು ಕೊಂಚ ಜಾಸ್ತಿಯೇ ಇತ್ತು ಅಂತ ಹೇಳ್ಬೇಕು. ಕಾರ್ಯಕ್ರಮದಲ್ಲಿ ತಮ್ಮನ್ನು ತೊಡಗಿಸಿಕೊಂಡ ರೀತಿ, ಧರಿಸಿದ್ದ ಸಾಂಪ್ರದಾಯಿಕ ತೊಡಿಗೆಗಳಿಂದ ಅದು ಸ್ಪಷ್ಟವಾಗಿತ್ತು :)

ಅಂದು ನಾವೆಲ್ಲರೂ ನಮ್ಮ ಸಂಸ್ಥೆಯ ಪಕ್ಕದ ಒಂದು ಸ್ಥಳದಲ್ಲಿ ಸರಿಯಾಗಿ ಸಂಜೆ ೪ ಘಂಟೆಗೆ ಸೇರಿದೆವು. ಕಾರ್ಯಕ್ರಮದ ನಿರೂಪಕರು ನಮ್ಮನ್ನೆಲ್ಲ ಸ್ವಾಗತಿಸುತ್ತ ನೆರೆದಿದ್ದ ಜನರನ್ನು ೨ ಸಾಲಿನಲ್ಲಿ ನಿಲ್ಲಿಸಿ ನಮ್ಮ ಸಂಸ್ಥೆಯ ಮುಂಭಾಗದಲ್ಲಿರುವ ಧ್ವಜಾರಾಹೋಣದ ಸ್ಥಳಕ್ಕೆ ಹೋಗಲು ಹೇಳಿದರು. ನಾವೆಲ್ಲ’ಸಿರಿಗನ್ನಡಮ್ ಗೆಲ್ಗೆ, ಸಿರಿಗನ್ನಡಮ್ ಬಾಳ್ಗೆ, ಜಯ ಕರ್ನಾಟಕ’ ಅಂತ ಘೋಷಗಳನ್ನು ಕೂಗುತ್ತ ಕನ್ನಡ/ಕರ್ನಾಟಕದ ಬಗ್ಗೆ ಬರೆದಿರುವ ಹಾಡುಗಳನ್ನು ಹಾಡುತ್ತ ನಡೆದೆವು.

ಕಾರ್ಯಕ್ರಮವು ವಿಘ್ನವಿನಾಶಕ ಗಣೇಶನ ಸ್ತುತಿಯಿಂದ ಶುರುವಾಯಿತು. ಅನಂತರ ನಿರೂಪಕರು ಕರ್ನಾಟಕದ ಉಗಮ, ರಾಜ್ಯೋತ್ಸವದ ಹಿನ್ನೆಲೆ, ’ಕರ್ನಾಟಕ’ ಎನ್ನುವ ಹೆಸರಿನ ಮತ್ತು ಹಳದಿ-ಕೆಂಪು ಬಣ್ಣದ ಧ್ವಜದ ಇತಿಹಾಸದ ಬಗ್ಗೆ ಸಂಕ್ಷಿಪ್ತವಾಗಿ ನೆರೆದಿದ್ದವರಿಗೆ ಇಂಗ್ಲೀಷಿನಲ್ಲಿ ತಿಳಿಸಿದರು. ನಿರೂಪಣೆಯ ಈ ಭಾಗ ಮಾತ್ರ ಆಂಗ್ಲ ಭಾಷೆಯಲ್ಲಿತ್ತು.

ತದನಂತರ ಕನ್ನಡದವರೇ ಆದ ನಮ್ಮ ಹಿರಿಯ ತಾಂತ್ರಿಕ ನಿರ್ದೇಶಕರೊಬ್ಬರು ಧ್ವಜಾರೋಹಣ ಮಾಡಿದರು. ಅವರು ಸಾಂಪ್ರದಾಯಿಕ ಉಡುಗೆಯಾದ ಪಂಚೆ ಮತ್ತು ಜುಬ್ಬಾ ಧರಿಸಿ ಬಂದಿದ್ದು ನಮಗೆಲ್ಲಾ ಅಚ್ಚರಿ ಮತ್ತು ಸಂತೋಷವನ್ನು ತಂದಿತ್ತು :) ೧೫ ನಿಮಿಷ ಮಾತಾಡಿದ ಅವರು ಕರ್ನಾಟಕ,ಕನ್ನಡ ಸಂಸ್ಕೃತಿ,ಕನ್ನಡಿಗರ ಸತ್ಕಾರ ಗುಣ ಹಾಗು ವಿಶಾಲ ಮನೋಭಾವ, ಕನ್ನಡ ಮಾತಾಡುವ ವಿಭಿನ್ನ ಶೈಲಿಗಳು ( ಮಂಗಳೂರು ಕನ್ನಡ, ಹುಬ್ಬಳ್ಳಿ ಕನ್ನಡ, ಹವ್ಯಕ ಕನ್ನಡ ಇತ್ಯಾದಿ ),ಕರ್ನಾಟಕ ಸಂಗೀತ, ಕೈಗಾರಿಕೆ ಹಾಗು ವಿವಿಧ ಕ್ಷೇತ್ರದಲ್ಲಿ ಭಾರತಕ್ಕೆ ಕನ್ನಡಿಗರ ಕೊಡುಗೆಗಳ ಬಗ್ಗೆ ಮಾತಾಡಿದರು. ಬೇರೆ ರಾಜ್ಯದಿಂದ ಇಲ್ಲಿಗೆ ಬಂದ ಜನರಿಗೆ ಕನ್ನಡ ಕಲಿಯಲು ಆಗ್ರಹಿಸಿದರು. ಕರ್ನಾಟಕವು ಒಂದು ರೀತಿ ವಿವಿಧ ಜಗತ್ತುಗಳು ಸಂಧಿಸುವ ತಾಣವಾಗಿದೆ ಮತ್ತು ಕರ್ನಾಟಕವು ಹವಾಗುಣ,ನೈಸರ್ಗಿಕ ಸಂಪನ್ಮೂಲಗಳು, ಔದ್ಯೋಗಿಕ ಅವಕಾಶಗಳು, ಸಾಮರಸ್ಯ ಇವೆ ಮುಂತಾದ ಅನುಕೂಲಗಳನ್ನು ಇಲ್ಲಿರುವವರಿಗೆ ಮತ್ತು ಕೆಲಸವನ್ನಿ ಅರಸಿ ಬರುವವರಿಗೆ ನೀಡುತ್ತದೆ. ಆದ್ದರಿಂದ ಇಲ್ಲಿ ನೆಲೆಸುವವರೆಲ್ಲರೂ ರಾಜ್ಯೋತ್ಸವದಂತ ದಿನಗಳನ್ನು ಆಚರಿಸಿ, ಆಚರಣೆಗಳಲ್ಲಿ ಪಾಲ್ಗೊಂಡು ಈ ರಾಜ್ಯಕ್ಕೆ ಒಂದು ವಿಧದಲ್ಲಿ ಕೃತಜ್ಙತೆಯನ್ನು ಸಲ್ಲಿಸಬೇಕು ಎಂದು ಹೇಳಿದರು. ಅಷ್ಟೇ ಅಲ್ಲದೆ, ಇಷ್ಟೆಲ್ಲಾ ಅನುಕೂಲಗಳನ್ನು ಒದಗಿಸುತ್ತಿರುವ ಈ ರಾಜ್ಯದಲ್ಲಿ ನೆಲೆಸಿರುವ ನಮಗೆಲ್ಲರಿಗೂ ಈ ಸ್ಥಳವನ್ನು, ಕನ್ನಡ ಭಾಷೆಯನ್ನು ಗೌರವಿಸಿ ಪೂಜಿಸುವುದು ನಮ್ಮ ಭಾಗ್ಯವೇ ಆದ್ದರಿಂದ ಬೇರೆಯವರು ತಾವು ಹೊರಗಿನವರು ಅಂತಂದುಕೊಳ್ಳದೆ ಮುಖ್ಯವಾಹಿನಿಯಲ್ಲಿ ಸೇರಿಕೊಳ್ಳಬೇಕು ಮತ್ತು ಸಾಧ್ಯವಾದರೆ ಈ ಸಂಸ್ಕೃತಿಗೆ ಈ ರಾಜ್ಯಕ್ಕೆ ಒಳ್ಳೆಯ ರೀತಿಯಲ್ಲಿ ಕೊಡುಗೆ ನೀಡಬೇಕು ಅಂತ ಹೇಳಿದರು. ತಮ್ಮ ಭಾಷಣದ ಕೊನೆಗೆ ’ಜೈ ಕರ್ನಾಟಕ’ ಎಂದು ೩ ಬಾರಿ ಹೇಳಿ ನಾವೆಲ್ಲರು ಅವರೊಟ್ಟಿಗೆ ಹೇಳುವಂತೆ ಮಾಡಿದರು.

ಇದಾದನಂತರ ವೇದಿಕೆ ನಮ್ಮದಾಯಿತು :) ೧೫-೨೦ ಸದಸ್ಯರಿದ್ದ ನಾವು ನಾಡಗೀತೆಯಾದ ಕು.ವೆಂ.ಪು ರವರ ’ಜಯ ಭಾರತ ಜನನಿಯ ತನುಜಾತೆ’ಯನ್ನು ಹಾಡಿದೆವು. ಗಾಯನದಲ್ಲಿ ಭಾಗವಹಿಸಿದವರೆಲ್ಲರೂ ನಾಡಗೀತೆ ಚೆನ್ನಾಗಿ ಬರಲು ಶಕ್ತಿ ಮೀರಿ ಪ್ರಯತ್ನಿಸಿದರು.ಹಾಡುವಾಗ ನಮ್ಮ ಸ್ನೇಹಿತರು ತೋರಿದ ಹೊಂದಾಣಿಕೆ ಮರೆಯಲಾರದಂತದು. ಏಕೆಂದರೆ ನಾವು ಅವತ್ತು ಕಾರ್ಯಕ್ರಮ ಶುರುವಾಗಲು ೩ ತಾಸು ಇದ್ದಾಗ ಮಾತ್ರ ಅಭ್ಯಾಸ ಮಾಡಿದ್ದೆವು. ಹಾಡುವ ರಾಗ, ಏರಿಳಿತಗಳು ಸರಿಯಾಗಿ ಬರುವಲ್ಲಿ ಯೂಟ್ಯೂಬ್ ನಲ್ಲಿ ನಮಗೆ ದೊರೆತ ನಾಡಗೀತೆಯ ದೃಶ್ಯಮುದ್ರಣದ ತುಣುಕು ಭಾರಿ ಸಹಾಯ ಮಾಡಿತು.

ನಂತರ ನಮ್ಮ ಸ್ನೇಹಿತರಿಬ್ಬರು ವೇದಿಕೆಗೆ ಬಂದು ನಮ್ಮ ಭಾಷೆಯ ಇತಿಹಾಸದ ಬಗ್ಗೆ ಕನ್ನಡದಲ್ಲಿ ಮತ್ತು ಇಂಗ್ಲೀಷಿನಲ್ಲಿ ಮಾತಾಡಿದರು. ಹಳಗನ್ನಡ,ನಡುಗನ್ನಡ ಮತ್ತು ಹೊಸಗನ್ನಡದ ಕಾಲ, ಆ ಕಾಲದ ಶ್ರೇಷ್ಠ ಕವಿಗಳು, ಜ್ಞಾನಪೀಠ ಪ್ರಶಸ್ತಿವಿಜೇತರು ಮತ್ತು ಅವರ ಕೃತಿಗಳ ಬಗ್ಗೆ ಬೆಳಕು ಬೀರಿದರು.

ಅನಂತರ ನಮ್ಮ ಸಹೋದ್ಯೋಗಿಗಳೊಬ್ಬರು ಕರ್ನಾಟಕವನ್ನು ಚಂದವಾಗಿ ವರ್ಣಿಸುವ ಚಿತ್ರಿಸಿರುವ ಕವಿ ನಿಸಾರ್ ಅಹ್ಮದ್ ಅವರ ’ಜೋಗದ ಸಿರಿ ಬೆಳಕಿನಲ್ಲಿ’ ಹಾಡನ್ನು ಸೊಗಸಾಗಿ ಹಾಡಿದರು.

ಕೊನೆಯದಾಗಿ ಆಡಳಿತ ಸಿಬ್ಬಂದಿಯಲ್ಲೊಬ್ಬರು ವೇದಿಕೆಗೆ ಬಂದು ವಂದನಾರ್ಪಣೆಯನ್ನು ಮಾಡಿದರು. ಕಾರ್ಯಕ್ರಮದ ನಿರೂಪಕರು ನಿರೂಪಣೆಯ ಮಧ್ಯೆ ತಮ್ಮ ಹಾಸ್ಯ ಮಿಶ್ರಿತ ಮಾತುಗಳಿಂದ ಜನರನ್ನು ನಗಿಸಿ ಕಾರ್ಯಕ್ರಮವನ್ನು ಚೆನ್ನಾಗಿ ನಡೆಸಿಕೊಟ್ಟರು. ಇದೆಲ್ಲಾ ಆದ ಮೇಲೆ ಮೈಸೂರ್ ಪಾಕನ್ನು ನೆರೆದಿದ್ದವರಿಗೆಲ್ಲಾ ಹಂಚಿದರು. ರಾಜ್ಯೋತ್ಸವ ಕಾರ್ಯಕ್ರಮವು ಚೆನ್ನಾಗಿ ನೆರವೇರಿದ ಕಾರಣವೂ ಸೇರಿ ಮೈಸೂರು ಪಾಕ್ ತುಂಬಾನೆ ಸಿಹಿ ಆಗಿತ್ತು :)

ಕಾರ್ಯಕ್ರಮವು ಕೇವಲ ೧ ಘಂಟೆ ಮಾತ್ರ ನಡೆದಿದ್ದರೂ ನಮಗೆಲ್ಲ ಮರೆಯಲಾರದ ಅನುಭವವನ್ನು ನೀಡಿತು.ಕಾರಣಾಂತರಗಳಿಂದ ಈ ಬಾರಿ ಸಾಂಸ್ಕೃತಿಕ ಕಾರ್ಯಗಳನ್ನು ಹಮ್ಮಿಕೊಳ್ಳಲಾಗಲಿಲ್ಲವಾದರೂ ನಮ್ಮ ಸಂಸ್ಥೆಯಲ್ಲಿ ರಾಜ್ಯೋತ್ಸವದ ಆಚರಣೆ, ಸಹೋದ್ಯೋಗಿಗಳು ತೋರುತ್ತಿರುವ ಉತ್ಸುಕತೆಯನ್ನು ನೋಡಿ ಸಂತಸವಾಗುತ್ತಿದೆ.ಇದೇ ರೀತಿ ಹುಮ್ಮಸ್ಸನ್ನು ಉತ್ಸಾಹವನ್ನು ಎಲ್ಲರೂ ತೋರುತ್ತಿದ್ದರೆ ಇನ್ನು ಮುಂದೆ ’ಕನ್ನಡ ರಾಜ್ಯೋತ್ಸವ’ವು ವೇಲಂಕಣಿ ಸಂಸ್ಥೆಯಲ್ಲಿ ಕಡ್ಡಾಯ ಆಚರಣೆಯಾಗಿ ಜನಪ್ರಿಯವಾಗುವದರಲ್ಲಿ ಯಾವುದೇ ಸಂಶಯವಿಲ್ಲ.

ವಂದನೆಗಳೊಂದಿಗೆ,
ವೆಲಂಕಣಿ ಕನ್ನಡಿಗ

ಚಿತ್ರಗಳು:

ನಿಮ್ಮ ಸಂಸ್ಥೆಯಲ್ಲೂ ನಾಡ ಹಬ್ಬ ನಡೆದಿತ್ತಾ?, ಅದರ ವರದಿ ಇಲ್ಲಿ ಬರಬೇಕಾ? ಹಾಗಿದ್ರೆ ಅದರ ವರದಿಯನ್ನು, ಕೂಡಲೆ kannadahabba@gmail.com ವಿಳಾಸಕ್ಕೆ ಮಿಂಚಿಸಿ.